«قازاق تەلەۆيزياسىنىڭ حابار تاراتا باستاعانىنا 60 جىل تولۋىمەن قۇتتىقتايمىن. بۇگىندە قوعام ءومىرىنىڭ تىنىس-تىرشىلىگىن تەلەديدارسىز كوزگە ەلەستەتۋ قيىن. سوندىقتان, بۇل وتاندىق تەلەۆيزيانىڭ مىڭداعان قىزمەتكەرلەرىن عانا ەمەس, قازاقستاندىقتاردىڭ ورتاق مەرەيلى مەرەكەسى دەپ ايتۋعا بولادى. وسى جىلداردا سىزدەر رەسپۋبليكامىزدىڭ كۇردەلى وتكەنى مەن بۇگىنگى قازاقستاننىڭ سان-سالالى, وزەكتى پروبلەمالارىن دەر كەزىندە تاسپاعا ءتۇسىرىپ, وتانىمىزدىڭ بەينەلى شەجىرەسىن جازىپ كەلەسىزدەر.
1958 جىلدىڭ كوكتەمىندە اشىلعان قازاقستان تەلەۆيزياسى بۇگىن دە كوپتەگەن تەلەارنالاردان تۇراتىن, مىڭداعان كاسىبي ماماندار ەڭبەك ەتەتىن, ۇزدىك تەحنيكامەن جابدىقتالىپ, تەحنولوگيالارعا ارقا سۇيەيتىن اۋقىمدى سالاعا اينالىپ وتىر. سونىڭ ىشىندە 60 جىلدان بەرى كورەرمەننىڭ ۇزدىكسىز كوزايىمى بولىپ كەلە جاتقان قازاق تەلەۆيزياسىنىڭ قارا شاڭىراعى - «Qazaqstan» ۇلتتىق ارناسىنىڭ الاتىن ورنى ەرەكشە. وتاندىق تەلەجۋرناليستيكا ۇرپاقتار ساباقتاستىعىن ساقتاي وتىرىپ, ءوز قاتارىن كاسىبي ماماندارمەن ۇدايى تولىقتىرۋدا.
ولار وزدەرىنىڭ قاۋىرت تا قاجىرلى ەڭبەگى ارقىلى قىزىعى مەن قيىندىعى قات-قابات جاۋاپتى قىزمەتتەرىن ابىرويمەن اتقارۋدا. مەملەكەت ءوز تاراپىنان قازاق تەلەۆيزياسىنىڭ زامان تالابىنا ساي دامۋى ءۇشىن بارلىق مۇمكىندىكتەردى جاساۋدا. تمد اۋماعىندا بالاماسى جوق «قازمەديا» ورتالىعىنىڭ قۇرىلۋى - وسىنىڭ ايقىن دالەلى», - دەلىنگەن قۇتتىقتاۋدا.
پرەزيدەنت ءوز قۇتتىقتاۋىندا, ەلىمىز رۋحاني جانە الەۋمەتتىك جاڭعىرۋدى جۇزەگە اسىرۋعا قىزۋ كىرىسكەنىن, قازىرگى تاڭدا جۋرناليستەرگە جۇكتەلەتىن مىندەت اۋقىمى وتە ۇلكەن ەكەنىن اتاپ وتەدى.
«سىزدەر جاھاندانۋ داۋىرىندە سىرتتان اعىلاتىن اقپارات اعىنىنا لايىقتى توسقاۋىل قويىپ, كورەرمەندەر ساناسىنا ءوز ۇلتتىق قۇندىلىقتارىمىزدى دارىتىپ, جاستارىمىزدىڭ بويىنا قازاقستاندىق پاتريوتتىق سەزىمدى قالىپتاستىرۋعا, الەمگە تاۋەلسىز وتانىمىز تۋرالى شىنايى اقپارات تاراتۋعا, قىزمەت ەتۋگە تيىسسىزدەر. وسى ابىرويلى مىندەتتەردى جۇزەگە اسىرۋدا بارشاڭىزعا زور دەنساۋلىق پەن باقىت, ىزدەنىمپازدىق پەن جاڭا شىعارماشىلىق تابىس تىلەيمىن», - دەپ اتاپ وتكەن مەملەكەت باسشىسى.
