«سيريالىقتار ەل كونستيتۋتسياسىنا وزگەرىستەردى, ونىڭ ايماقتىق جانە اكىمشىلىك قۇرىلىمى, پرەزيدەنتتىك جانە پارلامەنتتىك سايلاۋلاردى قوسا العاندا قاجەتتى زاڭنامالىق رەفورمالار جۇرگىزۋ ارقىلى وزدەرىنىڭ بولاشاقتاعى ساياسي جۇيەلەرىن قۇرۋدى باستاۋى ءتيىس», - دەدى ول ەلوردادا باستالعان سيرياداعى احۋالدى رەتتەۋ جونىندەگى استانا پروتسەسىنىڭ كەپىلگەر ەلدەرى سىرتقى ىستەر مينيسترلەرىنىڭ كەزدەسۋىندە. قايرات ءابدىراحمانوۆتىڭ پايىمىنشا, جاڭا قادامدار قابىلداۋ قاجەتتىگى تۋىنداپ وتىر.
«الەمدىك قوعامداستىق بىرقاتار قاۋىپتى قاقتىعىسقا كۋا بولىپ وتىر. بۇل زورلىق-زومبىلىقتىڭ ءتىپتى دەەسكالاتسيا اۋماعىندا دا وسىمىنە اكەلدى. اتالعان جاڭا قارۋلى ارەكەتتەر ايەلدەر مەن بالالاردى قوسا العاندا بەيبىت تۇرعىنداردىڭ اراسىندا كوپتەگەن ءولىم-ءجىتىمنىڭ بولۋىنا ىقپال ەتتى. ءبىز ءالى دە سيريالىق حالىقتىڭ ازاپقا تولى تاعدىرى دوعارىلۋى ءتيىس دەگەن ۇستانىمدامىز. سيريانىڭ قاراپايىم ازاماتتارىنا اتالعان جانتۇرشىگەرلىك قاقتىعىس بارىسىندا وتە ۇلكەن نۇقسان كەلدى. بۇگىندە سيريادا بايقالىپ وتىرعان جايتتار وڭىرلىك تۇراقتىلىققا قاۋىپ ءتوندىرىپ قانا قويماي ساياسي رەتتەۋ جولدارىن ىزدەۋدەگى كۇش-جىگەردى دە بۇزادى. استانادا قول جەتكىزىلگەن كەلىسىمدەر تەك قانا قاعازدا قالىپ قويماۋى ءتيىس. ولار سەزىلەتىندەي ناتيجەلەر جاساۋى ءتيىس», - دەدى قايرات ءابدىراحمانوۆ. سونىمەن قاتار ول قازاقستان سيرياداعى احۋالدى رەتتەۋ جونىندەگى استانا پروتسەسىنىڭ كەپىلگەر ەلدەرى سىرتقى ىستەر مينيسترلەرى سيرياداعى سوعىستى توقتاتۋ جانە دەەسكالاتسيا ايماقتارىن بەلگىلەۋ بويىنشا كەلىسىمدى قاتاڭ ورىنداۋ ءۇشىن قوسىمشا كونسۋلتاتيۆتىك قادام جاسايتىندىعىنا سەنىم ارتاتىندىعىن باسا ايتتى. «جەر-جەردە شيەلەنىستىڭ ءورشي ءتۇسۋى اياسىندا ءبىز نەگىزگى وڭىرلىك جانە حالىقارالىق سۋبەكتىلەر بارىنشا قاجەت دەپ سانايمىز. ءبىرىنشى كەزەكتە رەسەي مەن اقش اتالعان ماسەلە بويىنشا كونسترۋكتيۆتى ديالوگتى باستاۋلارى قاجەت. سيريا احۋالىن رەتتەۋدەگى وسى ەكى ىقپالدى كۇشتەردىڭ تابىستى ىنتىماقتاستىعى بارلىق تاراپتاردىڭ جانە تولىقتاي العاندا سيريا حالقىنىڭ مۇددەسىنە جاۋاپ بەرەتىن بولادى», - دەدى سىرتقى ىستەر ءمينيسترى.
قازاقستان تاراپى جانجالدىڭ ودان ارى ۋشىعا ءتۇسۋى ەش تاراپقا دا پايدا اكەلمەيدى. سيريا حالقىن ودان ارى ازاپقا تۇسىرە بەرەتىن بولادى, دەپ ەسەپتەيدى. «قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى, بۇل جانجالدىڭ بەيتاراپ ءارى ءادىل بىتىمگەرى رەتىندە سيرياداعى قانتوگىستى تەز ارادا توقتاتۋ جانە احۋالدى بەيبىت جولمەن رەتتەۋگە ءۇمىت ارتا وتىرىپ, مۇددەلى تاراپتارعا قاجەتتى بارلىق كومەكتى كورسەتە بەرۋىن جالعاستىرادى», - دەپ تۇيىندەدى ءسوزىن قايرات ءابدىراحمانوۆ.
