بۇگىندە ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى ەلباسى جولداۋىنداعى ون مىندەتتىڭ بارلىعى دا تسيفرلاندىرۋعا نەگىزدەلگەن. ەڭبەك جانە الەۋمەتتىك سالانى تسيفرلى جاڭعىرتۋ «تسيفرلى قازاقستان» باعدارلاماسى اياسىندا جۇزەگە اسىرىلادى. وسى رەتتە, ۆيتسە-مينيستر س.جاقىپوۆا بولاشاقتا ءۇش الەۋمەتتىك قىزمەت, ياعني جاسىنا بايلانىستى زەينەتاقى تاعايىنداۋ, بازالىق زەينەتاقى تولەمدەرى مەن بجزق-دان تولەنەتىن زەينەتاقى بويىنشا قۇجاتتاردى قابىلداۋ ء«بىر ءوتىنىش» قاعيداسىمەن جۇزەگە اسىرىلاتىنىن اتاپ ءوتتى.
بۇگىندە «ەڭبەك جانە الەۋمەتتىك سالانى تسيفرلاندىرۋ» تاقىرىبى ءوز كەزەگىندە الەۋمەتتىك كومەككە مۇقتاج جاندار ءۇشىن سەنىمدى سەرپىن ەكەنى راس. تسيفرلى تەحنولوگيالاردى كەڭ اۋقىمدا ەنگىزۋ بويىنشا ەلباسى تاپسىرماسىن ورىنداۋ ماقساتىندا ەڭبەك جانە الەۋمەتتىك قامسىزداندىرۋ سالاسىندا 7 باعىتتا جوعارى تەحنولوگياعا نەگىزدەلگەن جوبالار قولعا الىندى. س.جاقىپوۆانىڭ مالىمدەۋىنشە, ەلەكتروندى ەڭبەك بيرجاسى, ەڭبەك كەلىسىمشارتتارىن ەلەكتروندى تىركەۋ, ءوز-ءوزىن ەڭبەكپەن قامتىعانداردى ەلەكتروندى تىركەۋ, باقىلاۋدى ۇيىمداستىرۋعا ەلەكتروندى رۇقساتناما بەرۋ, ەلەكتروندى الەۋمەتتىك-مەديتسينالىق ساراپتاما, الەۋمەتتىك قىزمەتتەردىڭ ەلەكتروندى پورتالى, مۇقتاج ازاماتتاردىڭ الەۋمەتتىك رەگيسترى سىندى جاڭا جوبالار بولاشاقتا بىرىڭعاي اقپاراتتىق جۇيە ارقىلى قازاقستاندىقتاردى دۇنيەگە كەلگەن كۇنىنەن باستاپ ءومىر بويى «سۇيەمەلدەمەك». سونداي-اق بارلىق كەزەڭدە اۆتوماتتاندىرىلعان قىزمەتتەر كورسەتۋگە مۇمكىندىك بەرەدى.
جيىن بارىسىندا ۆيتسە-مينيستر مۇگەدەكتىك پەن ەڭبەككە قابىلەتتىلىكتەن ايىرىلۋ دەڭگەيىن بەلگىلەۋدىڭ جاڭا ەرەجەلەرىنە توقتالدى. ء«بىز وسى سالاداعى قىزمەتتەردى كومپوزيتتىك فورماتتا كورسەتۋگە كوشىرۋدى جۇزەگە اسىردىق. ەگەر بۇرىن مۇگەدەكتىكتى بەلگىلەۋ, جاردەماقىلاردى تاعايىنداۋ جانە ەڭبەك ەتۋ قابىلەتىنەن ايىرىلعان جاعدايدا الەۋمەتتىك تولەم الۋ ءۇشىن ادام ءۇش ۇيىمعا جۇگىنگەن بولسا, قازىر تەك ءبىر ۇيىمعا جۇگىنەدى. كەلەشەكتە بۇل وتىنىشتەر ەلەكتروندى تۇردە ە-gov ارقىلى قابىلداناتىن بولادى, ياعني مەديتسينالىق-الەۋمەتتىك ساراپتاما ءوتىنىش بەرۋشىنىڭ جەكە قاتىسۋىنسىز جۇزەگە اسىرىلادى دەپ جوسپارلاپ وتىرمىز. بۇل سونداي-اق ادامي فاكتوردى جويادى جانە سىبايلاس جەمقورلىق قاتەرلەرىن تومەندەتەدى», دەدى ول.
بۇدان كەيىن بىرەر ايدا ءوز تيىمدىلىگىن كورسەتىپ ۇلگەرگەن ەلەكتروندى ەڭبەك بيرجاسىنا توقتالعان ۆيتسە-مينيستر ونىڭ بازاسىندا ءوزىن-ءوزى جۇمىسپەن قامتىعان بارلىق ادامدار ءۇشىن مەملەكەتتىك كىرىس ورگاندارىندا وڭايلاتىلعان «تىركەلۋ-راسىمدەلۋ» مەحانيزمى ىسكە قوسىلاتىندىعىن اتاپ ءوتتى. الداعى ۋاقىتتا جۇمىس بەرۋشىلەر مەن جۇمىسكەرلەردىڭ ەڭبەك شارتتارىن بىرىڭعاي ەسەپكە الۋ جۇيەسى ەنگىزىلمەك. مىسالى, بيرجانىڭ العاشقى ناتيجەلەرىنە نازار سالاتىن بولساق, ءبىر جارىم ايدىڭ وزىندە ول ارقىلى 15 مىڭ جۇمىس ىزدەۋشى وزدەرىنىڭ ماماندىعى مەن وتىلىنە ساي كەلەتىن جۇمىس تاپقان. «بۇگىندە ەلەكتروندى بيرجادا 8 مىڭنان استام تۇيىندەمە جانە 30 مىڭنان استام بوس جۇمىس ورنى ورنالاستىرىلعان, ياعني بيرجا جۇمىس ىستەپ تۇر, وعان قوسا بارلىق 199 جۇمىسپەن قامتۋ ورتالىعى, جۇمىسقا ورنالاسۋ جونىندەگى 10-نان استام ينتەرنەت الاڭى جانە كەلەسى جىلدان باستاپ ىسكە كىرىسپەك جۇمىسپەن قامتۋ جەكە اگەنتتىكتەرىنىڭ سانى شامامەن ەكى ەسەگە وسەدى», دەيدى س.جاقىپوۆا.
تاعى ءبىر ايتا كەتەر جاعىمدى جاڭالىق, بۇدان بىلاي ەلەكتروندى فورماتقا اۋىستىرىلعان ەڭبەك شارتتارى قاعاز تۇرىندەگى ەڭبەك كىتاپشالارىنان باس تارتۋعا مۇمكىندىك بەرمەك. الداعى ۋاقىتتا تسيفرلانعان ەڭبەك شارتتارى ازاماتتاردىڭ كىرىستەرىن جالپىعا بىردەي دەكلاراتسيالاۋدى ەنگىزۋ ءۇشىن نەگىز بولماق.
ارينە ءبىر كۇندە بۇل مەحانيزمدەر ءوز ناتيجەلەرىن بەرە قويماس, دەيدى س.جاقىپوۆا. الايدا كورسەتىلەتىن قىزمەتتەر كولەمى تۇراقتى تۇردە وسۋدە. «وسى جىلى 19 ملن-نان استام قىزمەت, ونىڭ ىشىندە 17 پايىزى e-gov پورتالى ارقىلى كورسەتىلگەن. بارلىق قىزمەت الۋشىلار بويىنشا دەرەكتەر ونلاين رەجىمدە جاڭارتىلىپ, ازاماتتاردىڭ الەۋمەتتىك قۇقىقتارىن قامسىزداندىرۋدى مونيتورينگىلەۋگە جانە قاجەت بولعان جاعدايدا رەلەۆانتتى شەشىمدەر قابىلداۋعا مۇمكىندىك بەرەدى», دەدى ول.
بۇدان كەيىن الەۋمەتتىك ساقتاندىرۋ جۇيەسىنە قاتىستى ايتىپ وتكەن ۆيتسە-مينيستر مەملەكەتتىك الەۋمەتتىك ساقتانداندىرۋ قورىنا تولەنەتىن جارنالارعا تۇراقتى تۇردە مونيتورينگ جۇرگىزۋ ارقىلى كاسىپورىنداردىڭ جالاقى بويىنشا, ءاربىر جۇمىسكەردىڭ بيۋدجەتتىك ەمەس قورلارعا مىندەتتى تولەمدەرى بويىنشا بەرەشەگىن ايقىنداۋ مۇمكىندىگى بار ەكەندىگىن مالىمدەدى. ازىرگە بۇل اقپارات تەك اكىمدىكتەر مەن مەملەكەتتىك كىرىستەر كوميتەتىنە بەرىلگەن.
س.جاقىپوۆا سونداي-اق الەۋمەتتىك كومەك جۇيەسىنە قاتىستى ماسەلەلەرگە توقتالدى. ماسەلەن, بۇرىنعى اتاۋلى الەۋمەتتىك كومەكتىڭ, بالالارعا بەرىلەتىن مەملەكەتتىك جاردەماقى مەن كوپ بالالى وتباسىلارعا كورسەتىلەتىن ارناۋلى مەملەكەتتىك كومەكتىڭ ورنىنا جىل باسىنان باستاپ جاڭا فورماتتاعى اتاۋلى الەۋمەتتىك كومەك ەنگىزىلگەن بولاتىن. «ونى الۋ ءۇشىن ازاماتتار جۇمىسپەن قامتۋ ورتالىقتارىنا جۇگىنەتىن بولادى. بۇدان ءارى اتاۋلى الەۋمەتتىك كومەكتى ءوتىنىش بەرۋ ەمەس, پرواكتيۆتى ءتاسىل ارقىلى كورسەتۋ جوسپارلانۋدا, ياعني الەۋمەتتىك قىزمەتتەر مەملەكەتتىك قولداۋ شارالارىن ومىرلىك قيىن جاعدايعا تاپ بولعان ادامنىڭ جۇگىنۋىن كۇتپەي-اق كورسەتەتىن بولادى», دەيدى س.جاقىپوۆا.
ميراس اسان,
«ەگەمەن قازاقستان»
