- وزبەكالى جانىبەكوۆ وقۋلارىنا مەنىڭ شاكىرتتەرىم وسىمەن ەكىنشى مارتە قاتىسىپ وتىر. بىلتىر ءبىزدىڭ ۋنيۆەرسيتەتتىڭ ەكى ستۋدەنتى تۇركىستانعا بارعان ەدى. بيىل بەس ستۋدەنت ساپار شەگىپ, ۇشەۋى بايانداما جاسادى, - دەيدى باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پروفەسسورى دامەتكەن سۇلەيمەنوۆا.
1991 جىلى اشىلعان قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە الەمنىڭ 32 ەلىنەن كەلگەن جاستار ءبىلىم الادى. قازىرگى تاڭدا ۋنيۆەرسيتەتتە 10 مىڭعا جۋىق ستۋدەنت قازاق, تۇرىك, ورىس جانە اعىلشىن تىلدەرىندە وقىپ ءجۇر ەكەن. مۇنداي ۇلكەن ورتامەن جاقىن ارالاسىپ, ءبىلىم بايگەسىنە بىرگە ءتۇسۋ ورالدىق ستۋدەنتتەر ءۇشىن وتە ماڭىزدى بولماق.
ءبىر قىزىعى, جاس عالىمدار جول اقىسىن وزدەرى كوتەرگەن. ال تۇركىستانداعى قوناق ءۇي, تاماقتانۋ, ت.ب. شىعىندى كونفەرەنتسيانى ۇيىمداستىرۋشىلار ءوز موينىنا الىپتى. «تۇركىستاندىقتار ءبىزدى ىلتيپاتپەن قارسى الدى. تاريحى مول قالانى ارالاپ, وتىرار قالاسىنىڭ ورنىن, ارىستانباب پەن ازىرەتى سۇلتان كەسەنەلەرىن زيارات ەتىپ, تاريحي تانىمىمىزدى كەڭىتىپ قايتتىق» دەيدى ورالدىق شاكىرتتەر.
قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ اكادەميگى, تاريح عىلىمدارىنىڭ دوكتورى تۇرسۇن حازرەتالى جۇرگىزگەن كونفەرەنتسيادا نەگىزىنەن وزبەكالى جانىبەكوۆتىڭ ءومىربايانى, قىزمەتى تۋرالى باياندامالار وقىلعان. ال ورالدان بارعان جاس عالىمدار نەگىزىنەن الاش تاقىرىبىنا, تۇركىستان مەن باتىس قازاقستان ءوڭىرىنىڭ بايلانىسىنا توقتالىپتى. باتىس قازاقستان يننوۆاتسيالىق-تەحنولوگيالىق ۋنيۆەرسيتەتى تاريح ماماندىعىنىڭ 2 كۋرس ستۋدەنتى پەريزات بولتەكوۆا «بەكەت اتانىڭ ءومىربايانى مەن سوپىلىق قىزمەتى» اتتى بايانداما جاساسا, 3 كۋرس ستۋدەنتى باقىتگۇل دياروۆا «ورال قازاقتارىنىڭ سەزىندە قاراستىرىلعان مەملەكەتتىك ماسەلەلەر», 4 كۋرس ستۋدەنتتەرى جانار باحيتجانوۆا - «الاش قايراتكەرى بەركىنعالي اتشىباەۆ», بەكزات الماعاليەۆ - «الاش قايراتكەرى قالدىباي اسانوۆ» تاقىرىبىنداعى زەرتتەۋلەرىن ورتاعا سالعان. جاس عالىمداردىڭ تىرناقالدى ەڭبەكتەرى باعالانىپ, بارىنە دە ارنايى سەرتيفيكات تابىس ەتىلدى.
- شاكىرتتەرىمدى ستۋدەنت كەزىنەن عىلىمعا باۋلىپ, ىزدەنىستەرىن ۇنەمى ۇشتاپ جۇرەمىن. كەلەشەكتە وزگە دە وقۋ ورىندارىمەن عىلىمي-تاجىريبەلىك بايلانىستى جالعاستىرامىز دەگەن ۇمىتتەمىز. مۇنداي ساپارلار جاس عالىمداردىڭ ساناسىندا ماڭگى قالادى, عىلىمعا قىزىعۋشىلىعى ويانادى. بۇل باستامانى قولداعان وقۋ ورنى باسشىلارىنا, جول قاراجاتىن كوتەرگەن اتا-انالارعا العىس ايتامىن دەيدى الاشتانۋشى, تاريح عىلىمدارىنىڭ كانديداتى دامەتكەن سۇلەيمەنوۆا.
قازبەك قۇتتىمۇرات ۇلى
«ەگەمەن قازاقستان»
ورال قالاسى
