ەلباسى نۇرسۇلتان نازارباەۆ قىرعىز رەسپۋبليكاسىنىڭ پرەزيدەنتى سوورونباي جەەنبەكوۆكە, تاجىكستان رەسپۋبليكاسىنىڭ پرەزيدەنتى ەمومالي راحمونعا, وزبەكستان رەسپۋبليكاسىنىڭ پرەزيدەنتى شاۆكات ميرزيوەۆكە, سونداي-اق تۇرىكمەنستان مەدجليسىنىڭ ءتورايىمى اكدجا نۇربەردىەۆاعا قوشەمەت ءبىلدىردى.
مەملەكەت باسشىسى ىشكى وڭىرلىك ماسەلەلەردى شەشۋ ءۇشىن تۇراقتى كونسۋلتاتيۆتىك جۇمىس كەزدەسۋلەرىن وتكىزۋ باستاماسى وزبەكستان پرەزيدەنتى ش.ميرزيوەۆكە تيەسىلى ەكەنىن اتاپ ءوتتى.
– تۋىندايتىن بارلىق ماسەلەلەردى ءبىز بىرلەسىپ شەشە الامىز. ءبىزدىڭ كەزدەسۋىمىز بارىمىزگە ورتاق ناۋرىز مەيرامى قارساڭىندا ءوتۋىنىڭ سيمۆولدىق ءمانى بار. قازاقستان كورشىلەرىمەن, اسىرەسە, تاريحى, مادەنيەتى, دۇنيەتانىمى, دۇنيەنى سەزىنۋى ورتاق ورتالىق ازيا ەلدەرىمەن تىعىز ەكونوميكالىق ىنتىماقتاستىق ورناتۋعا ءاردايىم ۇمتىلىس تانىتتى, – دەدى نۇرسۇلتان نازارباەۆ.
قازاقستان پرەزيدەنتى ورتالىق ازيا ەلدەرىنىڭ الەۋەتىن بىرىكتىرۋدىڭ, ىشكى وڭىرلىك ساۋدانى ارتتىرۋدىڭ, وڭىرلىك قاۋىپسىزدىكتى قامتاماسىز ەتۋدىڭ جانە حالىقتارىمىزدىڭ جاقىنداسۋىنىڭ ماڭىزدىلىعىن اتاپ ءوتىپ, جوعارى دەڭگەيدەگى وسىنداي كونسۋلتاتيۆتىك كەزدەسۋلەردى وتكىزۋدىڭ ارتىقشىلىقتارىنا توقتالدى.
– ەلدەرىمىز اراسىنداعى ساياسي ىنتىماقتاستىق ماسەلەسى بويىنشا ەلەۋلى جەتىستىككە قول جەتكىزگەنىمىزدى ايتقىم كەلەدى. ءبىز سىرتقى ساياسات ۆەدومستۆوسى باسشىلارى اراسىندا ديالوگ ورناتا الدىق. نيۋ-يوركتە بىرىككەن ۇلتتار ۇيىمى قاۋىپسىزدىك كەڭەسىنىڭ وتىرىسى كەزىندە سىزدەردىڭ سىرتقى ىستەر مينيسترلەرىڭىزدى كورىپ, ريزا بولدىم. وسىلايشا زور قولداۋ كورسەتتىڭىزدەر. ءبىز ءاردايىم ءبىر-بىرىمىزگە قولداۋ كورسەتىپ ءجۇرۋىمىز كەرەك, – دەدى نۇرسۇلتان نازارباەۆ.
مەملەكەت باسشىسى ورتالىق ازيا ەلدەرىنىڭ بارلىق كوشباسشىلارىنىڭ ەرەكشە كۇش-جىگەر تانىتقانىن اتاپ ءوتىپ, ءوڭىر ەلدەرى اراسىنداعى وتكەن جىلعى مەملەكەتارالىق ىنتىماقتاستىقتى نىعايتۋ ۇدەرىسىنە وڭ باعا بەردى.
بۇدان بولەك, نۇرسۇلتان نازارباەۆ ورتالىق ازيا ەلدەرىنىڭ قازاقستانمەن قارىم-قاتىناستى دامىتۋ ماسەلەسىنە نازار اۋداردى.
– 2017 جىلى سىزدەردىڭ ەلدەرىڭىزدىڭ ارقايسىسىنا جىبەرىلگەن قازاقستان ەكسپورتى 35 پايىزعا جەتتى. ۇكىمەتارالىق كوميسسيالاردىڭ وتىرىستارى وتكىزىلۋدە. شەكارالاردا جاڭا بەكەتتەر اشىلۋدا. پاسپورت تەكسەرۋ ءتارتىبى جەڭىلدەتىلۋدە. جاڭا جولدار مەن كوپىرلەر سالىنۋدا. شەكارالارعا قاتىستى كەلىسىمدەر جاسالۋدا. كولىك قاتىناسى ورناتىلۋدا. جاڭا اۋە رەيستەرى اشىلىپ, جۇردەك پويىزدار جونەلتىلۋدە, – دەدى قازاقستان پرەزيدەنتى.
سونىمەن بىرگە, مەملەكەت باسشىسى ءوڭىردىڭ جەتەكشى دەرجاۆالارى – رەسەي فەدەراتسياسىمەن جانە قىتاي حالىق رەسپۋبليكاسىمەن بايلانىستاردى ودان ءارى نىعايتۋ قاجەتتىگىن اتاپ ءوتتى.
سوڭىندا نۇرسۇلتان نازارباەۆ وتكىزىلىپ جاتقان كەزدەسۋدىڭ تابىستى بولاتىنىنا, ونىڭ ناتيجەلەرى وڭىردەگى بارلىق حالىقتىڭ يگىلىگىنە قىزمەت ەتەتىنىنە سەنىم ءبىلدىردى.
سودان كەيىن قىرعىز رەسپۋبليكاسىنىڭ پرەزيدەنتى س.جەەنبەكوۆ ءسوز سويلەدى. ول وڭىرىمىزدە ءوزارا ءتيىمدى ىنتىماقتاستىق ورناتۋدىڭ ماڭىزدى ەكەنىن اتاپ ءوتتى.
– بۇگىنگى كەزدەسۋ ءبىزدىڭ دوستىق جانە تاتۋ كورشىلىك قارىم-قاتىناستارىمىزدى جاڭعىرتىپ, جانداندىرا تۇسەدى. وسى باسقوسۋ ەلدەرىمىز بەن حالىقتارىمىزدىڭ ودان ءارى جاقىنداسۋىنا باعىتتالعان ورتاق ۇمتىلىستارىمىزعا تىڭ سەرپىن بەرەدى. قوناقجايلىق تانىتىپ, ورتالىق ازيا ەلدەرى باسشىلارىنىڭ كەزدەسۋىن ۇيىمداستىرعانى ءۇشىن نۇرسۇلتان نازارباەۆقا ريزاشىلىعىمدى بىلدىرەمىن, – دەدى قىرعىز رەسپۋبليكاسىنىڭ پرەزيدەنتى.
تاجىكستان رەسپۋبليكاسىنىڭ پرەزيدەنتى ە.راحمون سويلەگەن سوزىندە ورتالىق ازيانىڭ كولىك-ترانزيت الەۋەتىن دامىتۋ, سۋ جانە ەنەرگەتيكا رەسۋرستارىن ءتيىمدى پايدالانۋ, مادەنيەت سالاسىنداعى ءوزارا ءىس-قيمىل جانە وڭىرلىك قاۋىپسىزدىكتى نىعايتۋ ماسەلەلەرىنە توقتالدى.
– ءبىز تەرروريزم, ەكسترەميزم, ەسىرتكىنىڭ زاڭسىز اينالىمى, ترانسۇلتتىق ۇيىمداسقان قىلمىس, ءدىني راديكاليزم سياقتى قاۋىپسىزدىككە تونەتىن سىن-قاتەرلەرگە قارسى ءتيىمدى ءارى جەدەل ارەكەت ەتۋ ءۇشىن بارلىق تەتىكتەردى پايدالانۋىمىز كەرەك. بۇل ماسەلەلەردى شەشۋ ىقپالداستىعىمىزدىڭ باسىم مىندەتى سانالادى. ويتكەنى ءبىر ەلدەگى جاعدايدىڭ وزگەرۋى بۇكىل وڭىردەگى احۋالعا تەرىس ىقپال ەتۋى مۇمكىن, – دەدى ە.راحمون.
وزبەكستان رەسپۋبليكاسىنىڭ پرەزيدەنتى ش.ميرزيوەۆ ساۋدا-ەكونوميكالىق ىنتىماقتاستىقتى جانە وڭىرلىك قاۋىپسىزدىك پەن تۇراقتىلىقتى قامتاماسىز ەتۋ سالاسىندا مەملەكەتارالىق ىقپالداستىقتى دامىتۋدىڭ ماڭىزدىلىعىن اتاپ ءوتتى.
– ءبىزدىڭ بارلىق بىرلەسكەن ءىس-قيمىلىمىز, جوبالارىمىز بەن باعدارلامالارىمىز ءوزارا سەنىم مەن قۇرمەتتى نىعايتىپ, حالىقتارىمىزدىڭ مۇددەسىنە ساي كەلەتىن ءارى ەلدەرىمىز تاراپىنان تولىق قولداۋ تاباتىن تىعىز وڭىرلىك ىنتىماقتاستىقتى ناقتى جاڭا مازمۇنمەن بايىتا تۇسەتىنى ءسوزسىز, – دەدى وزبەكستان پرەزيدەنتى.
تۇرىكمەنستان مەدجليسىنىڭ ءتورايىمى ا.نۇربەردىەۆا تۇرىكمەنستان پرەزيدەنتى گۋربانگۋلى بەردىمۇحامەدوۆتىڭ جۇمىس كەزدەسۋىنە قاتىسۋشىلارعا ارنالعان ۇندەۋىن وقىپ بەردى.
– ورتالىق ازياداعى جاقىن كورشىلەرمەن ىنتىماقتاسۋ تۇرىكمەنستاننىڭ سىرتقى ساياسي ستراتەگياسىنىڭ باسىمدى اسپەكتىلەرىنىڭ ءبىرى بولىپ سانالادى. ءبىزدىڭ ەل ەكىجاقتى جانە كوپجاقتى فورماتتاعى بارلىق باعىتتار بويىنشا تەڭ قۇقىلى جانە سەنىمدى ديالوگتى ىلگەرىلەتۋگە جان-جاقتى قولداۋ بىلدىرە وتىرىپ, وڭىردەگى ەلدەرمەن اۋقىمدى ىقپالداستىق ورناتۋدى كوزدەيدى.
