وليمپيادا شارتى بويىنشا قاتىسۋشىلار جالپى ءبىلىم دەڭگەيىن انىقتاۋ ماقساتىندا التى كلاستەرلىك باعىتتار: فيزيكا, گەوگرافيا, حيميا-بيولوگيا, اعىلشىن ءتىلى, ادەبيەت, تاريح پاندەرى بويىنشا باق سىنادى. ءار كلاستەردە قاتىسۋشىلار ءۇش ءپان بويىنشا تەست تاپسىردى. بارلىق گرانتتار مەن جەڭىلدىكتەر قاتال تۇردە تەك تاڭداعان باعىت بويىنشا تەڭدەي ءبولىندى.
سونىمەن, العاشقى ورىندار مەن 4 جىلعا ارنالعان 100% گرانتتار 6 باعىت بويىنشا ەلىمىزدىڭ تۇكپىر-تۇكپىرىنەن قاتىسقان جەڭىمپازدارعا بۇيىردى. ايتا كەتكەن ءجون گرانت يەگەرلەرى ۇلتتىق بىرىڭعاي تەستىلەۋدەن بوساتىلمايدى, الايدا جوعارى وقۋ ورنىنا قابىلدانۋ ءۇشىن ولارعا تەك 50 ۇپاي جارامدى.
«جوبانىڭ باستى ماقساتى – ەلباسىنىڭ ادامي كاپيتالدى جاڭعىرتۋعا باعىتتالعان حالىققا جولداۋىن جۇزەگە اسىرۋعا نەگىزدەلگەن. سونىمەن قاتار تالاپكەرلەرگە ەمتيحان الدىندا بولاشاق ماماندىعىن تاڭداپ,ءبىلىم دەڭگەيى مەن قابىلەتىن تەكسەرۋگە قولداۋ كورسەتۋ. جازعى مەزگىلدە ەمتيحانان سوڭ تالاپكەرلەردىڭ باسىم كوپشىلىگىن ماماندىقتى دۇرىس تاڭداۋ ماسەلەسى الاڭداتادى. جوباعا قاتىسۋ ارقىلى تۇلەكتەر الدىن الا تاڭداۋ جاساپ, وزىنە قاجەتتى 6 كلاستەرلىك باعىت بويىنشا مۇمكىندىگىن سىناپ, دۇرىس شەشىم قابىلداۋعا دايىن بولادى. وليمپيادانىڭ تاعى ءبىر ەرەكشەلىگى – بالالارعا ۇلتتىق بىرىڭعاي تەستىلەۋ الدىندا پسيحولوگيالىق كومەك بەرۋىندە»,- دەيدى جوبانىڭ ۇيىمداستىرۋشىلارى.
ەسكە سالا كەتەيىك, رەسپۋبليكالىق SPT وليمپياداسى 2018 جىلدىڭ 4-ناۋرىزىندا تەستىلەۋ فورماتىندا ەلىمىزدىڭ 19 ءىرى قالاسى مەن شالعاي اۋداندارىندا ءبىر مەزگىلدە ءوتتى. ءىس-شاراعا رەسپۋبليكا بويىنشا 12 مىڭنان اسا تالاپكەر قاتىستى.
