حالىقارالىق ەڭبەك ۇيىمىنىڭ مالىمەتتەرى بويىنشا دۇنيە ءجۇزى بويىنشا شامامەن 62 ميلليوننان استام ادامعا جۇمىس ورىندارى جەتىسپەيدى. جاستار اراسىنداعى جۇمىسسىزدىق ەلدەگى جالپى جۇمىسسىزدىق دەڭگەيىنە قاراعاندا 2 ەسە جوعارى, ال ايەلدەر اراسىندا ەرلەرگە قاراعاندا 26% جوعارى. ايەلدەر قاۋىمىنىڭ ەڭبەكاقىسى ەرلەرگە قاراعاندا 20% تومەن. دۇنيە ءجۇزى بويىنشا 313 ميلليون جۇمىس ىستەيتىندەر تاۋلىگىنە 1,25 اقش دوللارىنا كۇن كورۋدە.
قر كاسىپوداقتار فەدەراتسياسىنىڭ توراعاسى باقىتجان ءابدىرايىم قازاقستان كاسىپوداقتارى ەلىمىزدىڭ ەكونوميكاسىنا ازاماتتارىمىزدىڭ, شاعىن جانە ورتا بيزنەستىڭ قوساتىن ۇلەستەرىن ۇلعايتۋىنا, تۇرعىنداردىڭ ءتيىمدى جۇمىسپەن قامتاماسىز ەتىلۋىن ارتتىرۋعا مۇمكىندىك بەرەتىن قازاقستان پرەزيدەنتى نۇرسۇلتان نازارباەۆتىڭ بەس الەۋمەتتىك باستاماسىنان ۇلكەن ءۇمىت كۇتەتىندىگىن اتاپ ءوتتى.
كونفەرەنتسيادا بەلگىلى ەكونوميستەر, ساراپشىلار مەن قوعامدىق پىكىردىڭ كوشباسشىلارى ءسوز سويلەدى.
قولدانبالى ەكونوميكانى زەرتتەۋ ورتالىعىنىڭ عىلىمي جەتەكشىسى جاقسىبەك كۇلەكەەۆ ەڭبەك نارىعىنىڭ ماسەلەلەرى مەن ەڭبەك ەتۋ قابىلەتىنىڭ ساپاسىن ارتتىرۋ تۋرالى ايتتى.
«تالاپ» قولدانبالى زەرتتەۋ ورتالىعىنىڭ ديرەكتورى راحىم وشاقباەۆ ەڭبەك نارىنىعىڭ وزەكتى ماسەلەلەرىن تالداۋ ناتيجەلەرىن كورسەتتى.
اۋىلداعى ءوزىن-ءوزى قامتۋشىلارعا قانداي كومەك تۇرلەرى قاجەتتىگى جانە وسى ماسەلەنىڭ ءتۇيىندى شەشىمدەرى تۋرالى اۋىل شارۋاشىلىق كووپەراتيۆتەرىنىڭ ۇلتتىق وداعى تورالقالىعىنىڭ توراعاسى تولەۋتاي راحىمبەكوۆ ايتىپ ءوتتى.
كونفەرەنتسياعا قاتىسۋشىلار جاڭا جۇمىس ورىندارىن قۇرۋ, جاستار جانە اۋىل جاستارى ءۇشىن الەۋمەتتىك ساتىلاردى ۇلعايتۋ, قر ەكونوميكاسىن جاڭعىرتۋ, ەڭبەك ونىمدىلىگىن ارتتىرۋ قازاقستاندىق ەكونوميكانىڭ كۇن تارتىبىندەگى ءتۇيىندى ماسەلەلەر بولىپ تابىلادى دەگەن پىكىرگە كەلدى.
سونداي-اق, جيىنعا قاتىسۋشىلار بيزنەس قاۋىمداستىقتىڭ مەملەكەت پەن ازاماتتاردىڭ الەۋمەتتىك ارىپتەستىگىنە وزىندىك ۇلەستەرىن قوسۋى تيىستىگىنە سەنىمدى. بيزنەستىڭ الەۋمەتتىك ينۆەستيتسيالارى الەۋمەتتىك ماڭىزدى ماسەلەلەرى بار اۋدانداردا ەڭبەك نارىعىن قۇرۋمەن قاتار, وسى ماسەلەلەردىڭ شەشىمىن تابۋدا ماڭىزدى ءرول اتقارادى.
قازاقستان كاسىپوداقتارى ءوز قۇزىرەتى مەن مۇمكىندىكتەرىنىڭ اياسىندا مەملەكەتتىك ورگاندار الدىندا الەۋمەتتىك-ەڭبەك قاتىناستارىنىڭ وزەكتى ماسەلەلەرىن كوتەرۋگە جانە قازاقستانداعى ادام كاپيتالى يندەكسىن دامىتۋعا نيەتتى.
