قاراپ وتىرساق, كىشكەنتاي عانا اۋىلداردىڭ ءوز تىرشىلىگى مەن تانىمال دا سىيلى جاندارى, ءوز «قوجاناسىرلارى» بار. وزدەرىنشە داۋرەن كەشىپ, داۋىردەن وتەدى.
قىزىلوردالىق بايىرعى ءفوتوتىلشى بولات وماراليەۆتىڭ شىعارماشىلىق قورجىنى ءدال وسىنداي تانىلماي وتكەن ءبىرتۋار جانداردىڭ تاعدىرىنا تولى.
– 2000 جىلدارى گازەت تاپسىرماسىمەن قىزىلوردا وبلىسى, سىرداريا اۋدانىنداعى ساكەن سەيفۋللين اتىنداعى شارۋاشىلىقتا جۇرگەنمىن. كۇرىش وراعىنىڭ كۇيىپ تۇرعان ۋاعى. ءبىز فوتورەپورتاج جاساماق بولىپ, كۇرىش جينايتىن قويمانىڭ الدىنا بارساق, ءبىراز ادام ىردۋ-دىردۋ بولىپ, شۋلاسىپ جاتىر جاتىر ەكەن.
جاقىنداپ بارسام, مىنا سۋرەتتەگى كوپبول دەگەن جىگىتتىڭ موينىنا قۇرداستارى ارقايسىسى 50 كيلولىق ءۇش قاپتى ارتىپ قويىپتى. ءبىز ەندى عانا ءتورتىنشى قاپتى ارقاسىنا سالايىن دەپ تۇرعان جەرىنە تاپ كەلىپپىز.
– ال سالىڭدار, سالىڭدار!, – دەپ ءداۋ قارا دا قىزۋلانىپ قويمايدى. ءجۇزى ك ۇلىم قاعادى. موينىنداعى ءۇش بىردەي قاپتى شىبىن قونعانداي ەلەپ تۇرعان ءتۇرى جوق. قاۋمالاپ تۇرعانداردان سۇراساق, كوپبول دەگەن اۋىلدىڭ اۋىردى مىڭق دەمەي ارقالاپ جۇرە بەرەتىن ازاماتى ەكەنىن بىلگەندەي بولدىق.
سول كەزدە كوپبولدىڭ ايەلى كەلىپ قالدى دا:
– ويباي, توقتا, تاستا انا قاپتاردى! بەلىن سىندىراسىڭدار! بۇعان ءبارىبىر, تاعى ون قاپ سالساڭدار دا ءماز بوپ تۇرا بەرەدى. دەنساۋلىق سەندەرگە ەمەس, وعان كەرەك قوي, – دەپ شىنىندا دا شىج-بىج بولدى. جينالعانداردىڭ بىرەۋى كۇلىپ, بىرەۋى تاعى قانشا قاپ كوتەرەدى دەگەندەي, اتتەگەن-ايلارىن ايتىپ, شۋلاسىپ جاتىر.
موينىنداعى قاپتارىنان بوساعان ساتىندە, كوپبولدان سۇرايمىز عوي:
– باۋىرىم, شتانگا, كۇرەسكە باردىڭ با؟ باسقا دا سپورت تۇرلەرىنە قاتىستىڭ با؟
– ويباي جوق! نەنىڭ سپورتى؟! مەنىڭ سپورتىم كۇرىش قويماسىنىڭ 50 كيلولىق قاپتارى عوي. قايبىر جىلى كينوعا تۇسۋگە شاقىرعان, بىراق بارعان جوقپىن.
– نەگە بارمادىڭىز؟ – دەيمىز ءبىز دە قويماي.
– ورىسشا بىلمەيمىن, – دەپ ريازسىز ىرجيىپ كۇلدى.
سول كوپبولدى ءبىر-ەكى جىل بۇرىن قايتىس بولدى دەپ ەستىدىم. نەدەن قايتىس بولعانىنان حابارىم بولمادى, دەيدى سۋرەتتىڭ اۆتورى.
بۇل دا ءبىر ءومىر!
ايناش ەسالي,
«ەگەمەن قازاقستان»
الماتى
سۋرەتتى تۇسىرگەن بولات وماراليەۆ
