قالىڭ قاردى كۇرەپ قويىپ, جاساندى الاڭداعى ويىنداردى باستاعان پاۆلودار قالاسىندا بىرىنشىلىكتىڭ العاشقى گولى دا سوعىلدى. ويىننىڭ نەبارى 5-مينۋتىندا پاۆەل شابالين ەسەپ اشىپ, «ەرتىستى» العا شىعاردى. كۇننىڭ سۋىقتىعىنا قاراماستان «ەرتىس» – «اتىراۋ» ويىنىنا ءبىرشاما جانكۇيەر كەلدى. ءتىپتى ولاردىڭ ءبىرى ماتچ بارىسىندا الاڭعا جۇگىرىپ شىقتى. جانكۇيەرلەردىڭ فۋتبولدى ساعىنعاندىعىنىڭ ءبىر بەلگىسى بولار, جالپى 6 ويىنعا 30 مىڭ جانكۇيەر كەلىپتى. ايتپاقشى, الگى الاڭعا جۇگىرىپ شىققان نازىك جاندى كورەرمەنىمىز 5 ايلىق كورسەتكىش كولەمىندە ايىپپۇل تولەدى. ال ەڭ باستىسى يسپانيالىق باپكەرى بار پاۆلودارلىق «ەرتىس» 2:1 ەسەبىمەن جەڭىسكە جەتتى. ەسەپ 2:1 بولعانىمەن, ءۇش گولدى دا «ەرتىس» ويىنشىلارى سوقتى. دورۋ پوپوديۋك ەسەپتى ەسەلەگەننەن كەيىن, الەكساندر كيسليتسين ءوز قاقپاسىنا دوپ سوعىپ الدى.
كۇن رايىنىڭ ىڭعايلىلىعىنا بايلانىستى شىرايلى شىمكەنت جەرى ادەتتەگىدەي العاشقى بىرنەشە تۋردى ءوز الاڭىندا وتكىزەدى. وزگە قالالاردا كۇن جىلىعانىن كۇتىپ ءجۇرىپ, كوپ ۇپاي جيناپ الاتىن ادەتى ەمەس پە؟ «ورداباسى» بۇل جولى دا عايىپتان تايماي, قاراعاندىدان كەلگەن «شاحتەردى» 2:1 ەسەبىمەن جەڭدى. ماۋسىمارالىق ۇزىلىستە پەرم قالاسىنىڭ «امكار» كومانداسىنا اۋىسىپ كەتە جازداعان ەركەبۇلان تۇڭعىشباەۆ ەسەپ اشتى. ال ودان كەيىن قازاقستانعا قايتا ورالعان چەرنوگوريالىق دامير كوياشەۆيچ تارازى باسىن تەڭەستىردى. جەڭىسكە دەگەن جىگەر كورسەتكەن گەورگي دەرمەندجيەۆتىڭ شاكىرتتەرى ەسەپتى 2:1 قىلىپ, جەڭىستى ج ۇلىپ اكەتتى. گول اۆتورى يۆان ناگاەۆ.
الماتىداعى «ورتالىق» ستاديوندا سەنساتسيا تىركەلە جازدادى. پرەمەر-ليگاعا قايتا ورالعان «قىزىلجار» گول سوعىپ, الماتىلىقتاردى تىعىرىققا تىرەدى. الايدا, الاڭعا الماسىپ كىرگەن يساەل مەن ارشاۆين ويىن اياقتالۋعا 10 مينۋت قالعاندا 2 گول سوعىپ «قايراتقا» 3 ۇپاي اپەردى. «قىزىلجار» كەم دەگەندە تەڭ ناتيجەگە قول سوزۋعا لايىقتى ەدى. جالپى العاندا پرەمەر-ليگامىزدىڭ العاشقى تۋرىندا تەڭ ناتيجە مۇلدە تىركەلگەن جوق.
جەر ءجانناتى جەتىسۋدا تالدىقورعاندىق جانكۇيەرلەر ءوز كومانداسىنىڭ ءالسىز ەكەنىنە كوز جەتكىزدى. جاڭبىرلى كۇنى الىستان جايباراقات سوققى جاساعان باۋىرجان تۇرىسبەك «توبىل» ءۇشىن ماڭىزدى 3 ۇپاي اكەلدى. بۇل جەردە قاقپاشى دجۋراحون باباحانوۆتىڭ ورەسكەل قاتەلىگى ورىن الدى. شاماسى دميتري وگاي مەن رۋسلان بالتيەۆ تاندەمى تالدىقورعاندىق كلۋبتا كوپ قىزمەت ەتە قويمايدى-اۋ دەگەن تۇجىرىمعا كەلدىك. قىرۋار قارجى ءبولىنىپ, پرەمەر-ليگاعا قايتا ورالىپ تۇرعاندا وبلىستىڭ ابىرويىن شاشۋ ەشكىمگە دە كەرەك ەمەس.
ستانيمير ستويلوۆ كەتكەلى بەرى تىزگىندى قولىنا العان گريگوري بابايان جاراپ تۇر. ول باپكەر بولعالى بەرى «استانا» ەكى ويىن وتكىزدى. ەكەۋىندە 3:0 ەسەبىمەن جەڭدى. الدىمەن سۋپەركۋبوكتا «قايراتتى», ەندى مىنە بىرىنشىلىكتىڭ ءبىرىنشى تۋرىندا «اقجايىقتى». بۇل ماتچتا كوزگە تۇسكەن سول باياعى مارين توماسوۆ. حورۆاتيالىق لەگيونەر الدىمەن ايىپ دوبىنان ەسەپ اشسا, كەيىننەن بۇرىشتاما كوتەرىپ, ونىڭ پاسىنان سەرگەي مالىي ەسەپتى ەسەلەي ءتۇستى. ال ويىننىڭ نۇكتەسىن جاراقاتىنان ايىعىپ شىققان سەرىكجان مۇجىقوۆ قويدى.
قىزىقتىڭ كوكەسى قىزىلوردادا بولدى. جەرگىلىكتى «قايسار» جاستارى 21-گە تولماعان جاس فۋتبولشىلاردان جەڭىلىپ قالدى. «اقتوبە» كومانداسىنىڭ باسىنان ءوتىپ جاتقان قيىندىق بارلىعىنا بەلگىلى. كلۋب قارىزعا بەلشەسىنەن باتىپ, جاڭادان العان فۋتبولشىلارىن تىركەي الماي, الاڭعا شىعارمادى. سەبەبى وتكەن جىلدارى وزگە لەگيونەرلەردىڭ جالاقىسىن بەرمەگەن. سوندىقتان وسى ويىنعا سامات سماقوۆ باسقاراتىن كلۋب قوسالقى قۇرامىمەن كەلدى. كەلدى دە 1:0 ەسەبىمەن جەڭىسكە جەتتى. «اقتوبەلىك» شابۋىلشى ابات ايىمبەتوۆتى شالىپ قۇلاتقانى ءۇشىن تورەشى قىزىلوردالىقتاردىڭ قاقپاسىنا 11 مەترلىك ايىپ دوبىن بەلگىلەدى. اسلانبەك كاكىموۆ ەش ويلانباستان جەڭىستى گولدى سوقتى. ايتپاقشى, وسى ويىندا «اقتوبە» ساپىندا 10 قازاق فۋتبولشىسى الاڭعا شىققانىن ايتا كەتەيىك.
ءسوز سوڭىندا سانداردى سويلەتسەك. 6 ويىندا نەبارى 3-اق ەسەپ تىركەلدى. ياعني, 3 ماتچ 2:1, 2 ويىن 0:1, ءبىر ماتچ 3:0 بولىپ اياقتالدى. ال بارلىعى 14 گول سوعىلىپ, ونىڭ تەڭ جارتىسىن, ياعني 7-ءۋىن لەگيونەرلەر سالدى. بۇل وتكەن جىلعى ءبىرىنشى تۋرمەن سالىستىرعاندا اناعۇرلىم كوپ. 14 دوپتىڭ 6-ۋى ءبىرىنشى تايمدا سوعىلسا, قالعان 8-ءى ەكىنشى تايمنىڭ ەنشىسىندە. ەندى كەلەسى تۋر ويىندارى 17 ناۋرىز كۇنى وتەدى.
ەرمۇحامەد ماۋلەن,
«ەگەمەن قازاقستان»
