كەش بارىسىندا جۋىردا عانا جارىق كورىپ, بايان جانعال ۇلىنىڭ ءومىربايانى مەن ەڭبەك جولىنا ارنالىپ, ونى جاقسى بىلگەن, بىرگە قىزمەت اتقارعان جانداردىڭ ەستەلىكتەرىمەن تولىقتىرىلعان «اعىن سۋدىڭ تۇنىعى ەدى» كىتاپتىڭ تۇساۋى كەسىلدى.
زەرەندى اۋدانىنىڭ تاعى ءبىر ەڭبەك ارداگەرى مۇحيت قابدەشەۆ جازعان كىتاپتىڭ كىرىسپەسىندە: «قۇرمەتتى وقىرمان!
اۋىل بيلەگەن, اۋدان, وبلىس باسقارعان ادامدار قايدا جوق. بىزدە دە جەتكىلىكتى. بىراق كوبىسى كەتە سالىپ, كوڭىلدەن وشكەن. اتتان تۇسكەن سوڭ نەمەسە دۇنيەدەن وزعاننان كەيىن ەسىمى دە ۇمىتىلعان. ارينە ەشكىمدى كۇشتەپ سۇيكىمدى ەتە المايسىز. ال جاقىن تانىسا دا, جەتە تانىماسا دا ادامداردىڭ جىلى لەبىزىنە يە بولاتىن تۇلعالار دا بولادى. سونداي ەل سۇيىنگەن ازاماتتاردىڭ ءبىرى – بايان جانعالوۆ.
بيىل بايان اعانىڭ قايتىس بولعانىنا بەس جىل تولدى. ءالى دە اعامىز ەلدىڭ ەسىندە, اتى جۇرت اۋزىندا.
مەن اعانىڭ باسشىلىعىمەن ون جىلدان استام قىزمەت ىستەگەن, زەينەت دەمالىسىنا شىققان سوڭ دا جانىنا جاقىن جۇرگەن شاكىرتتەرىنىڭ ءبىرىمىن. اعامىز بىزدەردى, ءبىز سياقتى باسقا دا بولاشاققا بەت تۇزەگەن جاس تۇلەكتەردى بالاسىنداي ءسۇيىپ, بالاپانىنداي باۋلىپ, كوڭىلدىڭ قىبىن, ءىستىڭ جىگىن تابۋعا, قيىن تۇيىندەردى شەبەر شەشۋگە ۇيرەتتى. ءبىزدىڭ ارامىزدان اعا سياقتى ەل بيلەگەن تالاي ازاماتتار شىقتى.
وسى ارادا كارى مەن جاستىڭ دا, ۇلكەن مەن كىشىنىڭ دە قۇرمەتىنە, ماقتانىشىنا اينالاتىنداي بايان اعانىڭ قانداي قاسيەتى بار دەگەن زاڭدى سۇراق تۋادى. بۇل سۇراقتىڭ جاۋابىن مەنەن بۇرىن باسقا شاكىرتتەرى, زامانداستارى ايتسىن دەپ ويلادىم دا, ولارمەن حابارلاستىم.
مەنىڭ ۇسىنىسىمدى ەسكەرۋسىز قالدىرماي, بايان اعا تۋرالى ەستەلىكتەرىمەن بولىسكەن بارلىق ازاماتتارعا ايتار العىسىم شەكسىز. سىزدەردى اعامىزدىڭ رۋحى قورعاپ, قولداپ, قورشاپ ءجۇرسىن, يگى ىستەرىڭىزگە باعىت, باعدار بەرسىن دەپ تىلەيمىن» دەگەن سوزدەر جازىلعان.
ەستەلىك كىتاپتا قازاق كسر جوعارعى كەڭەسىنىڭ توراعاسى بايكەن ءاشىموۆتىڭ, اتاقتى جازۋشىلار ءابدىجامىل نۇرپەيىسوۆتىڭ, ەستاي مىرزاحمەتوۆتىڭ, كەڭەس وداعىنىڭ باتىرى, كوكشەتاۋ وبلىستىق پارتيا كوميتەتىنىڭ بۇرىنعى ءبىرىنشى حاتشىسى ا.كلەششەۆتىڭ, سوتسياليستىك ەڭبەك ەرى فەدور مورگۋننىڭ, باسقا دا بەلگىلى مەملەكەت قايراتكەرلەرىنىڭ, اقىن-جازۋشىلاردىڭ كوكشە ەلىنىڭ ارداقتى تۇلعاسىنا ارناعان ءىلتيپات لەبىزدەرى مەن پىكىرلەرى, قۇتتىقتاۋلارى, ونى جاقسى بىلگەن, بىرگە قىزمەت اتقارعان تۇلعالاردىڭ ەستەلىكتەرى ورىن العان.
القالى جيىندا ب.جانعالوۆتىڭ باسشىلىعىندا قىزمەت اتقارعان, بۇگىندە ەڭبەك ارداگەرلەرى, بۇرىنعى «پۋحالسك» كەڭشارىنىڭ ديرەكتورى مەيرامبەك قيىقوۆ, زەرەندى ورتالىق اۋرۋحاناسىنىڭ بۇرىنعى باس دارىگەرى سەرىك يبراەۆ, سوتسياليستىك ەڭبەك ەرى سارتاي جۇماعاليەۆ, «ۆيكتوروۆسكوە» جشس ديرەكتورى ۆلاديمير اندريۋحين, قازاق كۇرەسىنەن «قازاقستان بارىسى» جوباسىن دامىتۋ قورى كەڭەسىنىڭ توراعاسى ارمان شوراەۆ, ەڭبەك ارداگەرلەرى قاسىمحان قۇسايىنوۆ, يۆان ۆينيتسكي, ەسىمبەك اكىموۆ, تىلەكەن تولەباەۆ, كۇلاش راقىمجانوۆا, بايان اتانىڭ ۇلدارى مۇراتبەك پەن بانۇرجان, قىزى باقىتجان, كەلىنى زۋراش, باسقا دا تۋعان-تۋىسقاندارى ايتۋلى تۇلعانىڭ ۇيىمداستىرۋ قابىلەتتەرى, ادامگەرشىلىگى تۋرالى عيبراتتى ەستەلىكتەر ايتتى.
شارا سوڭىندا اۋدان اكىمى م.ءمۇستافيننىڭ اتىنان اكەسىن ەسكە الۋ كەشىنەن ەستەلىك رەتىندە ۇلى مۇراتبەك جانعالوۆقا اۋلەتتىڭ ۇلى باباسى قاناي ءبيدىڭ فارفوردان جاسالعان شاعىن ءمۇسىنىن ۇسىندى. بايان جانعال ۇلىنىڭ ومىرسەرىگى ناعيما اجەيگە كەڭەس وداعىنىڭ باتىرى مالىك عابدۋلليننىڭ 100 جىلدىعىنا ارنالىپ شىعارىلعان مەرەكەلىك مەدال تابىس ەتىلدى.
قايرات قازياكپاروۆ, جۋرناليست
اقمولا وبلىسى,
زەرەندى اۋدانى
