بۇل ماسەلەنىڭ اۋىل تۇرعىندارىن تولعاندىرا باستاعاندىعىنا ءبىراز ۋاقىت بولدى. سەبەبى تۇسىنىكتى, اۋىلداردا جىل وتكەن سايىن تۇرعىندار قولىنداعى مال سانى كوبەيىپ, وسىنىڭ ناتيجەسىندە اۋىل ماڭايىنداعى جايىلىمدىق ءورىس تارىلا تۇسۋدە. بۇعان اۋىل ماڭايىنداعى جەرلەردىڭ كەزىندە ۇزاق مەرزىمگە جالعا بەرىلىپ كەتكەندىگى دە اسەر ەتۋدە. اتالعان زاڭ جوباسىندا وسى پروبلەمانى شەشۋ جولدارى قاراستىرىلعان. ول قانداي جولدار؟
وسى سۇراققا جاۋاپ ىزدەپ اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتى توراعاسىنىڭ ورىنباسارى گۇلجاحان بيمەنديناعا حابارلاسقان ەدىك.
– جالپىلاي ايتساق, زاڭ جوباسىندا حالىقتى تولعاندىراتىن, وسى بويىنشا قۇرىلعان جەر كوميسسياسىندا تالقىلانعان ماسەلەلەر بويىنشا وزگەرىستەر مەن تۇزەتۋلەر ەنگىزۋ قاراستىرىلىپ وتىر. اۋىلدار ماڭايىنداعى جەر تەلىمدەرىنىڭ ماسەلەسىن شەشۋ دە وسىنداي ۇلكەن ءتورت وزگەرىستىڭ قاتارىنا شىعارىلدى.
زاڭ جوباسى ازىرلەنبەس بۇرىن ءبىز اۋىلدار ماڭايىنداعى جەرلەرگە قاتىستى زەرتتەۋ, تالداۋ جۇمىستارىن جۇرگىزدىك. سول تۇستا كوپتەگەن قاتەلىكتەر 1993 جىلدارى اۋىلداردىڭ باس دامۋ جوسپارلارىن جاساعان كەزدە جىبەرىلگەندىگىن اڭعاردىق. ول كەزدەرى, ارينە اۋىلدارداعى مال سانى ازايعان تۇس ەدى. سوندىقتان اۋىل ماڭايىنداعى كوپتەگەن جەرلەر جەكەمەنشىك قولىنا بەرىلمەسە دە ۇزاق مەرزىمگە جالعا بەرىلىپ قويىلعان ەكەن. ەندى وسى پروبلەمانى شەشۋ ءۇشىن اۋىل ماڭايىنداعى جەرلەردى مەملەكەت مۇقتاجىنا قايتا قايتارىپ الۋ نورمالارى ەنگىزىلدى. ال قانداي جەر تەلىمدەرىن قايتارىپ الۋ كەرەكتىگىن جەرگىلىكتى اكىمدىكتەردىڭ ءوزى انىقتايدى. ويتكەنى جەرگىلىكتى جەر مەن حالىقتىڭ پروبلەماسى ەڭ اۋەلى سولارعا تانىس قوي. اۋىل ماڭايىنداعى جەر تەلىمدەرى كەرى قايتارىپ الىنعان سوڭ, ول جەرلەردى اۋىل تۇرعىندارى بىرلەسىپ پايدالانادى. بۇل جەرلەر ەكىنشى رەت ەشكىمگە جالعا نەمەسە جەكەشەلەندىرۋگە بەرىلمەيدى, – دەدى گۇلجاحان امانگەلدىقىزى.
ونىڭ ايتۋى بويىنشا, الداعى ۋاقىتتا مۇنداي ماسەلەلەردى حالىقتىڭ تالاپ-تىلەگىن ەسكەرە وتىرىپ شەشۋ ءۇشىن تەڭ جارتىسى جەرگىلىكتى حالىق وكىلدەرىنەن, تەڭ جارتىسى مەملەكەتتىك ورگاندار وكىلدەرىنەن تۇراتىن كوميسسيالار قۇرىلىپ, جۇمىس ىستەيتىن بولادى. قانداي جەردى جالعا بەرىپ, قانداي جەردى ساتۋ كونكۋرسىنا شىعارۋعا بولاتىندىعىن, ال قانداي جەر مەملەكەت مەنشىگىندە قالدىرىلاتىندىعىن مىنە, وسى كوميسسيا انىقتايدى ەكەن.
سۇڭعات ءالىپباي,
«ەگەمەن قازاقستان»
