كەزدەسۋدىڭ العاشقى ساتىنەن-اق الاڭ يەلەرى بىردەن شابۋىلعا كوشتى. سونىڭ ناتيجەسىندە ليونەل مەسسي نەبارى 3-مينۋتتا تيبو كۋرتۋا قاقپاسىنان ساڭىلاۋ تاۋىپ ۇلگەردى. وسىدان كەيىن لوندوندىقتار العا قاراي «لاپ» قويدى. ۆيلليان مەن ازار باستاعان شابۋىل ءۇستى-ۇستىنە ۇدەي بەردى. ايىپ الاڭىنا قاراي اۋەلەگەن ءاربىر دوپ قاۋىپ تۋدىرىپ جاتتى.
20-مينۋتتا الاڭنىڭ ورتالىق تۇسىندا مەسسي ءوزىنىڭ بۇرىنعى قارسىلاسى فرانسەسك فابرەگاستان دوپتى تارتىپ الىپ, قاقپا ماڭىنا قاراي ۇمتىلدى. ەكى-ءۇش قارسىلاسىنىڭ قىسپاعىندا قالعاندىقتان دوپتى وڭ قاپتالدان كەلە قالعان وسمان دەمبەلەگە جىبەردى. فرانتسيالىق جارتىلاي قورعاۋشى جويقىن سوققىسىمەن قاقپانى تۋرا كوزدەپ, باسىمدىقتى ارتتىرا ءتۇستى. وسىلايشا ول «بارسەلوناداعى» العاشقى گولىن سالدى.
لوندوندىقتار وسىدان كەيىن دە قارقىنىن باسەڭدەتپەدى. شابۋىلدارىنىڭ دەنى قاپتالداعى ماركوس الونسو, ۆيكتور موزەس, ۆيلليان سەكىلدى جىلدام ويىنشىلارى ارقىلى ءوربىپ جاتتى. العاشقى تايم اياقتالار تۇستا ايىپ دوبىن ورىنداعان ماركوس الونسو توعىزدىقتى كوزدەگەنمەن, دوپ تاعى دا باعاناعا ءتيىپ كەتتى.
كەزدەسۋدىڭ ەكىنشى بولىگى ءدال وسى ستسەناريمەن جالعاستى. «چەلسي» قاۋىپتى شابۋىلداردى ءجيى ۇيىمداستىرعانمەن, كاتالونيالىق ويىنشىلار ءوز مۇمكىندىكتەرىن كۇتۋمەن بولدى. سونداي ساتتەردىڭ بىرىندە ليونەل مەسسي ەكىنشى گولىن سوعىپ ۇلگەردى. 63-مينۋتتا لۋيس سۋارەستىڭ پاسىنان كەيىن ايىپ الاڭىنا ەنگەن ول ءۇش قارسىلاسىنىڭ اراسىنان كۋرتۋانىڭ ەكى اياعىنىڭ اراسىن ءدال كوزدەپ, سوڭعى دوپتى سالدى. بۇل ارگەنتينالىق شابۋىلشىنىڭ چەمپيوندار ليگاسىنداعى 100-گولى بولدى.
ءۇشىنشى دوپ انتونيو كونتە شاكىرتتەرىنىڭ ءۇمىتىن سوندىرگەندەي بولدى. سەبەبى, وسى گولدان كەيىن «چەلسيدىڭ» وتكىر شابۋىل ۇيىمداستىرۋى سايابىرسىپ قالدى. ويىن سوڭىنا دەيىن وسى ەسەپ ساقتالىپ, كەلەسى كەزەڭگە «بارسەلونا» جولداما الدى. وسىلايشا كاتالون كومانداسى 11 جىل قاتارىنان چەمپيوندار ليگاسىنىڭ 1/4 فينالىنا شىعىپ, جاڭا رەكورد ورناتتى.
ايتا كەتەرلىك تاعى ءبىر جايت, «چەلسي» بەينە ءبىر 2012 جىلعى «بارسەلونانىڭ» كۇيىن قۇشقانداي اسەر قالدىردى. گول سوعار ساتتەرى كوپ بولعانمەن ساتتىلىك سەرىك بولمادى. ال «كوك-انارلار» ساۋاتتى قورعانىپ, مۇمكىندىكتەرىن ءتيىمدى پايدالانا ءبىلدى.
