ەندىگى ساتتە كورەرمەن ءۇشىن اكتەر الەمى تىلسىمعا اينالىپ قالۋى كەرەك. ونەردىڭ زاڭى سونداي! سەبەبى ساحنا – كيەلى مەكەن. وعان تەك قۇپيالىلىق قانا جاراسادى.
بىراق ءبىزدىڭ كورەرمەننىڭ سپەكتاكلدەن كەيىنگى «سپەكتاكلى» ەندى باستالدى. تايلى تۇياعى قالماي ساحنانىڭ ارعى بەتىنە اعىلىپ جاتىر. سۋرەتكە تۇسۋگە... ءسويتىپ, الەۋمەتتىك جەلى ارقىلى اكتەرمەن جاقسى قارىم-قاتىناسىن جاھانعا جاريا ەتىپ ماقتانۋعا... ال الگىندە عانا ماعىناسى كۇردەلى, ارەكەتى اۋىر قويىلىمدى اياقتاعان اكتەر دەمىن الىپ, قارا تەرگە مالشىنعان كەيپىن ەندى قالپىنا كەلتىرۋگە وقتالا بەرگەنى سول ەدى, ونەر يەسىن مەجەلى جەرىنە جەتكىزبەدى. ورتا جولدان توقتاتىپ, قولتىقتاپ الىپ, جارق-جۇرق سۋرەتكە تۇسۋشىلەردىڭ قاراسى دا, كەزەگى دە تولاستار ەمەس. امال جوق, اكتەر جىلى عانا جىميىپ, كورەرمەننىڭ تىلەگىن ءۇنسىز ورىنداۋدا. سەبەبى بۇل – تەاتر مادەنيەتى.
ءيا, مادەنيەت قاي جەردە دە, كىم-كىمگە دە قاجەت. ول, اسىرەسە, تەاتر الەمىندە. ايتسە دە, بۇگىنگى شەكتەن تىس جاريالىلىق, ونەرىمەن قوسا جەكە ءومىرىن دە كۇللى عالامنىڭ تالقىسىنا ۇسىنۋ, ءار باسقان قادامىن, قىدىرعان, دوستارىمەن باس قوسقان, ءتۇرلى كەشتەردە كوڭىل كوتەرگەن سۋرەتتەرىن ۇزدىكسىز الەۋمەتتىك جەلىگە جۇكتەۋ, توي-تومالاقتىڭ ءتورىن بەرمەي, تويحانالاردا «حالتۋرا»دەڭگەيىندە ونەر كورسەتۋ – مۇنىڭ بارلىعى دا اكتەردىڭ سىر مەن سۇلۋلىققا تولى جۇمباق الەمىن تىم قادىرسىزدەندىرىپ جىبەرگەندەي اسەر بەرەتىنى بار. قالا بەردى, قاراپايىم ءسوز ساپتاۋىنداعى جۇيەسىزدىك پەن تايازدىق, دۇرىسى بىلىمسىزدىك تە ءارتىس ادامنىڭ ابىرويىن قاراپايىم كورەرمەننىڭ الدىندا جىعىپ بەرىپ جاتقانداي ما؟..
ولاي دەپ كەسىپ پىكىر ءبىلدىرۋىمىز سەبەپسىز ەمەس. وسىدان ءبىراز بۇرىن زامانداس اكتەرمەن ساپارلاس بولۋ مۇمكىندىگى بۇيىردى. جول قىسقارتۋ ءۇشىن ونەر جايلى, ىستەپ جۇرگەن جۇمىسى, الداعى جوسپارلارى تۋرالى اڭگىمە قوزعادىق. جاڭا رولگە دايىندىق ۇستىندە ەكەن. «جاقىندا پرەمەرا» دەدى. ءرول ءتول كلاسسيكامىزدان بۇيىرىپتى. باستى كەيىپكەردىڭ ءبىرى. پىكىر الماسا كەلە تۇسىنگەنىمىز – الگى ساحناگەر سومداماق بەينەسىن, سول زاماننىڭ ءداۋىر تىنىسىن زەرتتەپ-زەردەلەۋ بىلاي تۇرسىن, ءوز كەيىپكەرىنە تيەسىلى رەپليكادان باسقاسىن, ياعني پەسانى تولىق وقىماعان بولىپ شىقتى. الگىندەگى عانا قىزىقتى اڭگىمەگە قۇلشىنىپ تۇرعان كوڭىلىمىز سۋ سەپكەندەي باسىلدى.
تاعى دا ويىمىزعا ەستەلىكتەردەن وقىپ تاڭىرقاسقان, ءتانتى بولىسقان رەجيسسەر اسقار توقپانوۆتىڭ اباي بەينەسىن شىعارۋ بارىسىنداعى اكتەر قاليبەك قۋانىشباەۆپەن دايىندىعى ءتۇستى. ابايداي الىپ بەينەسىن تۋدىرۋ ءۇشىن شىڭعىستاۋعا دەيىن بارىپ, سول ايماقتىڭ تىنىس-تىرشىلىگىمەن, ادامدارىنىڭ مىنەز-قۇلقىمەن تانىسىپ, توم-توم كىتاپتى جاتا-جاستانا وقىعان اكتەر ەڭبەگى سوندا اڭىزداي كورىندى. بىراق ول ءتىپتى دە قيال-عاجايىپ ەمەس, ونەر يەسىنىڭ سومداماق رولىنە دەگەن سۇيىسپەنشىلىگى, كۇندى تۇنگە, اپتانى ايعا جالعاعان جانكەشتى ەڭبەگىنىڭ جەمىسى ەدى. ناتيجەسىندە, ساحنالانعانىنا 80 جىلعا جۋىق وتسە دە, قاليبەك قۋانىشباەۆتىڭ كەيىپتەۋىندەگى سول اباي كۇنى بۇگىنگە دەيىن سومدالىپ جاتقان اقىن بەينەسىنىڭ ەتالونىنداي. ساپالى ىزدەنىس, تىڭعىلىقتى دايىندىق, كەيىپكەرىنە دەگەن شەكسىز ماحاببات پەن جۇمىسىنا دەگەن سۇيىسپەنشىلىك اكتەر ەسىمىن ماڭگىلىك ەتتى. اباي بەينەسى قاليبەك قۋانىشباەۆ ويىنى ارقىلى قالىڭ كورەرمەننىڭ كوڭىلىنە بەرىك بەكىدى. ساحناگەر ەسىمى اڭىزعا اينالدى.
ال ەندى قازىرگى اكتەرلەر جۇمىسىن بارلاپ كورەيىكشى. باس-اياعى ءبىر-ەكى اپتادا كوز ىلەسپەس جىلدامدىقپەن گاملەت سىندى كۇرمەۋى قيىن كۇردەلى رولدەرگە دە كوزسىز باتىرلىقپەن بارا بەرەتىن عالامات جەدەل ساحناگەرلەر ويىنى نەلىكتەن قاليبەك قۋانىشباەۆتىڭ ورنىن ءالى باسا الماي كەلە جاتىر؟..
سەبەپ – بۇگىنگى اكتەرلەردىڭ ىشكى دايىندىعىنان بۇرىن, سىرتقى اسەر ەتۋ, جارق-جۇرق جارناماعا, الەۋمەتتىك جەلى ارقىلى بار ءومىرىن كوپشىلىك الدىنا جايىپ سالۋعا دەگەن قىزىعۋشىلىعىنىڭ ءوز كاسىبىنە دەگەن ماحابباتىنان باسىم ءتۇسۋى. وسىنىڭ سالدارىنان كورەرمەن ءۇشىن اكتەر الەمى قۇپيالىلىعىن جويىپ, جالاڭاشتاندى. قورا-قوپسى, ءۇي-جايدىڭ ماڭايىنداعى اڭگىمەنى قاۋزايمىز دەپ ءجۇرىپ, ونەر وزىنە عانا ءتان تەكتىلىگىنەن ايىرىلىپ قالعانداي. شەكتەن تىس جاريالىلىق پەن قولجەتىمدىلىكتىڭ سالدارىنان قارابايىر كۇيگە تۇسكەن اقسۇيەك ونەر – تەاتر كەيبىر ساتتە ءوزىنىڭ ءتول پەرزەنتتەرىنە وكپەلىدەي كورىنەدى...
نازەركە جۇماباي,
«ەگەمەن قازاقستان»
