اتالعان كورمەگە سۋرەتشىنىڭ «كوبەلەك», «كوگەرشىندەر كوزىندەگى مۇڭ», «كوكتەم», «گارمونيا» سەكىلدى 18 جىلدان بەرى جيناقتالعان تۋىندىلارى قويىلدى. بۇل كۇنى مۋزەي كورمەسىنە تارازدىق تۇرعىندار كوپتەپ جينالىپ, شىعارماشىلىق يەسىنىڭ شىنايى شابىتپەن ورىلگەن شىعارمالارىنا كۋا بولدى.
تاتيانا شەلۋدچەنكوۆا اۋليەاتا وڭىرىنە اكريل تەحنيكاسىن قولدانۋ ارقىلى اينەك بەتىنە سۋرەت سالۋ ونەرىن دامىتقان تۋىندىگەر رەتىندە تانىمال. وسىدان ون ءۇش جىل بۇرىن العاشقى شىعارماشىلىق كورمەسىن كوپشىلىككە ۇسىنعان سۋرەتشىنىڭ ءتۇرلى تەحنيكانىڭ كومەگىمەن جاسالعان تۋىندىلارى كۇنى بۇگىنگە دەيىن كوپشىلىك نازارىندا. سودان بەرى تىنىمسىز شىعارماشىلىق ىزدەنىستە كەلە جاتقان تاتيانانىڭ بۇل جولعى كورمەسى دە كەلۋشىلەردىڭ سۋرەت ونەرىنە دەگەن قىزىعۋشىلىعىن وياتتى. سۋرەتشىنىڭ ء«ومىر. ماحاببات. شابىت!» اتتى كورمەسىنىڭ اشىلۋ سالتاناتىندا وبلىستىق تاريحي-ولكەتانۋ مۋزەيى ديرەكتورىنىڭ ورىنباسارى عاليا ءالىمجانوۆا تاتيانا تالانتىنىڭ قىر-سىرىنا توقتالىپ, ونىڭ سۋرەت ونەرىندە وزىندىك قولتاڭباسى قالىپتاسقانىن جەتكىزدى. سونداي-اق بەلگىلى سۋرەتشى ايدارحان سيحاەۆ ارىپتەسىنىڭ كاسىبي شەبەرلىگىنىڭ جوعارى ەكەنىن ايتىپ, تۋىندىلارىنا وڭ باعا بەردى.
ءوز سوزىندە تاتيانا شەلۋدچەنكوۆا شىعارماشىلىعىن باعالاپ, تالانتىن تانىپ كورمەگە كەلگەن كوپشىلىككە جۇرەكجاردى لەبىزىن ءبىلدىرىپ, سۋرەت ونەرىندە ءارى قاراي دا ەڭبەك ەتە بەرەتىنىن, جوسپارلارىنىڭ دا جەتكىلىكتى ەكەنىن جەتكىزدى. راسىندا دا تىلسىم الەمنەن سىر تارتىپ, جۇمباق كۇيدە جان تۇكپىرىندە عاجايىپ ءبىر سەزىمدى وياتاتىن سۋرەتشىنىڭ شىنايى شىعارماشىلىعى كوپشىلىكتىڭ ىقىلاسىنا يە بولدى.
حاميت ەسامان,
«ەگەمەن قازاقستان»
جامبىل وبلىسى
