جاقىندا ءبىز يۋليانىڭ اناسى سۆەتلانا گەننادەۆنامەن تىلدەسكەن ەدىك. ول بىلاي دەيدى.
– يۋليانىڭ اكەسى ەۆگەني گالىشەۆ قىزى دەگەندە شىعاردا جانى بولەك بولاتىن. ەكەۋمىز دە ەركەلەتىپ وسىردىك, بەتىنەن قاقپادىق. مۇمكىن, ءوز بەتىنشە شەشىم قابىلداۋ, العان بەتىنەن قايتپايتىن وجەتتىك ءسابي كەزىنەن قانىنا سىڭگەن بولار. التى جاسىندا بي ۇيىرمەسىنە جازىلدى. ونى ۇناتپاعان سوڭ ەندى عانا ۇيىمداستىرىلعان فريستايلدىڭ موگۋل تۇرىنە جازىلدى. بۇل اسا قاۋىپتى سپورت, تاۋدان تومەن قاراي قۇلدىراعاندا جانىمىزدى شۇبەرەككە تۇيەتىنبىز. «بالام فريستايل قاۋىپتى ەكەن, باسقا سەكتسياعا جازىل» دەگەنىمىزگە قۇلاق اسپادى. العاشقى باپكەرى اننا كورنىشەۆا يۋلياعا مول تاجىريبەسىن ۇيرەتتى. الايدا ول ەكى جىلدان كەيىن وتباسى جاعدايىنا بايلانىستى المانياعا قونىس اۋداردى. يۋليانىڭ بولاشاعىنان ءۇمىت كۇتكەن اننا دارىندى بالالارعا ارنالعان سپورت مەكتەبىنىڭ باپكەرى ۆيكتور لەمەشكوعا (قازىر فريستايلدىڭ موگۋل تۇرىنەن ەلىمىزدىڭ باس جاتتىقتىرۋشىسى) قىزىمىزدى تاپسىرىپ كەتتى.
قىزىمىزدى اكەسى ەكەۋمىز كەزەك-كەزەك جاتتىعۋلارعا اپارىپ جۇردىك. امال بار ما, وتاعاسى قازىر ارامىزدا جوق, ەرتەرەك قايتىس بولىپ كەتتى. ال جاتتىعاتىن جەرى جاقىن ەمەس, ەداۋىر شالعايدا. بارىپ-قايتقانىمىزعا التى-جەتى ساعات ۋاقىت كەتەتىن. ال سوندا وقۋى قايدا قالادى؟ شارشاعان ساتتە «وسى فريستايلدى قويساڭشى» دەگەندە, بىزگە الا كوزىمەن قاراپ, رەنجىپ, سويلەسپەي قوياتىن. يۋليا العاشقى جەڭىسىنە نەبارى 11 جاسىندا 2003 جىلى رەسەيدىڭ سانكت-پەتەربۋرگ قالاسىندا وتكەن كورشى مەملەكەتتىڭ كۋبوگى جارىسىندا جەتىپ, توپ جاردى. ارادا ءۇش جىلدان كەيىن ەل بىرىنشىلىگىندە كۇمىس القانى يەلەنىپ, سپورت شەبەرى نورماسىن ورىندادى. 2007 جىلى الەم چەمپيوناتىنا قاتىسىپ, شەبەرلىگىن شىڭداي ءتۇستى. بۇدان كەيىن 2008 جىلى ەۋروپانىڭ ەكى دۇركىن چەمپيونى اتاندى. بىرلەسىپ ونەر كورسەتۋدە الەم چەمپيونى اتاندى.
– يۋليانىڭ ارمانى فريستايلدان وليمپيا ويىندارىنىڭ چەمپيونى نەمەسە جۇلدەگەر اتانۋ ەدى, – دەپ اڭگىمەسىن جالعاستىردى سۆەتلانا گەننادەۆنا. – كانادانىڭ ۆانكۋۆەر قالاسىندا وتكەن اق وليمپيا ويىندارىندا تومەن قاراي سىرعىعان كەزدە ءسال قاتەلىك جىبەرگەن يۋليا 11-ورىندى قاناعات تۇتتى. الايدا ول سوچيدەگى وليمپياداعا قالاي دا ءبىر مەدال الامىن دەپ باردى. جانكۇيەرلەر يۋليانىڭ باعىن قازىلاردىڭ بايلاعانىن كوزدەرىمەن كوردى. ونى جەتىنشى ورىنعا سىرعىتىپ, سۋپەر فينالعا جىبەرمەي قويدى. شىنىندا يۋليانىڭ كەم دەگەندە قولا مەدالدى الاتىنى ءسوزسىز ەدى. سوچيدەن كەلگەن سوڭ ول فريستايلدى تاستايمىن دەپ بۇلقان-تالقان بولدى. دەسەك تە, ءوزى جانىنداي جاقسى كورەتىن سپورتتى, باپكەرلەرى مەن ارىپتەستەرىن قيمادى. تاعى دا جاتتىعۋلار, شەتەلدەرگە ساپارلار جالعاسا بەرەدى. ال يۋليانىڭ سوڭعى ەكى-ءۇش جىلدا عانا الەم كۋبوگى كەزەڭدەرىندە العان التىن, كۇمىس, قولا مەدالدارى جەتەرلىك. قىسقى ازيا ويىندارىندا, وتكەن جىلى الماتىدا جالاۋىن كوتەرگەن ستۋدەنت-جاستاردىڭ ۋنيۆەرسياداسىندا التىن القانى ۋىستاپ الىپ, قازاقستاننىڭ ابىرويىن اسقاقتاتتى. قىزىم بيىل قازان ايىندا 26 جاسقا تولادى. راس ول قاتتى شارشادى. بىراق ءدال قازىر فريستايلدى تاستايمىن دەگەن ءسوزدى ەستىگەنىم جوق. ءالى دە بولسا ەل نامىسى ءۇشىن بايراقتى جارىستارعا قاتىسۋدى ويلايدى.
يۋليا نە دەيدى؟
– كىندىك قانىم تامعان وزەندەر ورنەكتەگەن وسكەمەنىمدى قاتتى ساعىنىپ قالىپپىن. پحەنچحاندا دا ءدال وسى ساتتەگىدەي تولقىعان جوقپىن دەسەم ارتىق ايتقانىم ەمەس. ارينە جەڭىسكە جەتكەن كەزدەگى ءساتتى قالاي ۇمىتايىن. ءسىز ءبىرىنشى بولىپ مەنى قۇتتىقتاپ, باتاڭىزدى بەردىڭىز, سۋرەتكە ءتۇسىرىپ الدىڭىز. مادەنيەت جانە سپورت ءمينيسترى ارىستانبەك مۇحامەدي ۇلى مەن ونىڭ ورىنباسارى س.مۇسايبەكوۆ ەكەۋى الاقانىنا سالىپ الپەشتەدى, جۇرەكجاردى ىستىق لەبىزىن ءبىلدىردى. ال ەلسيار قاناعاتوۆ اعامىزدىڭ كەلەسى وليمپيادادا التىن القا ال دەگەنى مەنى جىگەرلەندىردى.
مارقۇم اكەمدى ەسكە الدىم, ول اناممەن بىرگە مەن سپورتتىڭ كۇردەلى ءتۇرىن تاڭداعان كەزدە, قولدادى, رۋح بەردى. ماقسات بيىك, ەندى ءتورت جىلدان كەيىن بەيجىڭدە وتەتىن اق وليمپياداعا قاتىسىپ, ءومىر بويى ارمانداعان – التىن القاما قول جەتكىزسەم دەيمىن. ارمان الداماسا كەرەك. ارمان الدا, جول ۇزاق, يۋليا دەگەن قىزدارىڭىزدان الداعى ۋاقىتتا دا قۋانتاتىن جاڭالىقتاردى كۇتە بەرىڭىزدەر, – دەپ يۋليا گالىشەۆا اعىنان جارىلدى.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
وسكەمەن
