كورمەدە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ مەكتەپ-ينتەرنات, كوللەدج, سونداي-اق كەسكىندەمە, ءمۇسىن جانە ديزاين فاكۋلتەتىنىڭ پروفەسسور-وقىتۋشىلارى مەن ستۋدەنتتەرىنىڭ ءار الۋان تاقىرىپتاعى ەڭبەكتەرى كوپشىلىك نازارىنا ۇسىنىلدى. بۇل ماڭىزدى ءىس-شارانىڭ ماقساتى مەن مازمۇنى جايىندا ونەر اكادەمياسىنىڭ تاربيە ءىسى جونىندەگى پرورەكتورى شىڭعىس قۇلبەك ۇلى:
– جولداۋدا ايتىلعان رۋحاني قۇندىلىقتاردى ونەر تىلىمەن ناسيحاتتاۋدى ماقسات تۇتتىق. بارشا ادامزاتقا ورتاق ونەر تىلىمەن جەتكىزە ءبىلۋ – ۇلكەن جاۋاپكەرشىلىك. الەمگە تانىمال سۋرەتشىلەرىمىزدىڭ كورمەسى تەك ەل ىشىمەن شەكتەلىپ قالمايدى. يتاليادا, فرانتسيادا وسىنداي كورمە وتكىزەمىز. ايتا كەتەر جايت, كورمەگە بارلىق جەردە بىردەي ءدال الماتىداعىداي جاعداي جاسالا بەرمەيدى, – دەدى.
جىل سايىن مەتروپوليتەن اۋماعىندا وتىزعا جۋىق ءتۇرلى مادەني-كوپشىلىك ءىس-شارا وتكىزىلەدى. كەسكىندەمە, ءمۇسىن جانە ديزاين فاكۋلتەتىنىڭ دەكانى, قازاقستاننىڭ ەڭبەك سىڭىرگەن قايراتكەرى, پروفەسسور باۋىرجان نۇربەك ۇلى كورمەنى مۋزەيدە ەمەس, جول تورابىندا وتكىزۋدىڭ وزىندىك ارتىقشىلىعى بار ەكەنىن تىلگە تيەك ەتتى.
– كورمەگە قويىلعان ونەر تۋىندىلارى سان ءتۇرلى تاقىرىپتاردى قامتىدى. قازىر اقپاراتتىڭ, جارنامانىڭ زامانى. قاربالاس تىرشىلىكتەن قولى بوسامايتىن قالا تۇرعىندارىندا ۋاقىت تاپشى. مەتروپوليتەندە كورمە وتكىزگەندەگى ماقساتىمىز – مىڭ قاتپارلى جەر استىمەن جول جۇرەتىن جولاۋشىلارعا ەرەكشە كوڭىل كۇي سىيلاۋ. «بۇلاق كورسەڭ, كوزىن اش» دەگەندەي, جاس تالانتتاردى ەلگە تانىتۋ. كورمەگە ەلدىگىمىزدى تانىتاتىن, ەرەكشەلىگىمىزدى ايقىندايتىن تاڭداۋلى كارتينالار قويىلدى. «استانا – ارداعىم» بايقاۋىندا ۇزدىك دەپ تانىلعان تاڭداۋلى تۋىندىلاردىڭ دەنى – ءبىزدىڭ شاكىرتتەردىڭ ەڭبەگى. اتاپ ايتقاندا, قازاقستاننىڭ «100 جاڭا ەسىم» جوباسىندا ۇزدىك دەپ تانىلعان انار ءابجانوۆانىڭ جۇمىستارى ءبىر توبە. ونىڭ شىعارماشىلىعىنىڭ باستى ەرەكشەلىگى – تاقىرىپتارىنىڭ سان تۇرلىلىگى, الۋان ءتۇستى بوياۋدى قۇبىلتا بىلەتىندىگى. ول 2001 جىلدان بەرى رەسپۋبليكالىق, حالىقارالىق كورمەلەرگە قاتىسىپ ءجۇر. حالىقارالىق ونەر بايگەسىنىڭ جۇلدەگەرى. تۋىندىلارى قازاقستان, يتاليا, شۆەيتساريا, فرانتسيا, تۇركيا, اقش, جاپونيادا جەكە كوللەكتسيالاردا ساقتالعان. ونىڭ لۋۆر مۋزەيىنە قويىلعان ەڭبەكتەرى الەم سۋرەتشىلەرىن تاڭعالدىرعان. ءبىزدىڭ تالانتتى سۋرەتشىلەرىمىزدىڭ ارقايسىسىنىڭ ورنى بولەك. اسىرەسە جاستاردىڭ بەينەلەۋ ونەرىن تىڭ تاقىرىپتاردا دامىتىپ جاتقاندىعى قۋانتادى. بولاشاقتىڭ تىزگىنى جاستاردىڭ قولىندا, – دەدى ول ويىن تۇيىندەپ.
الماتىدا كورمە اتاۋلى ءجيى وتەدى. بىراق بۇل كورمەنىڭ ارتىقشىلىعى – كوركەمونەردىڭ بارلىق سالاسىن قامتۋعا باعىتتالعاندىعىندا. كەسكىندەمە جانە ءمۇسىن كافەدراسىنىڭ مەڭگەرۋشىسى, پروفەسسور, كوركەمسۋرەت اكادەمياسىنىڭ اكادەميگى بولات تۇرعىمباەۆتىڭ ايتۋىنشا, تاريحي تاقىرىپتاعى كورمەلەردى وتكىزۋدىڭ ماڭىزى زور.
– كورمە استانانىڭ 20 جىلدىعىنا ارنالدى. كوپشىلىك نازارىنا كەيىنگى 5-6 جىل كولەمىندە سالىنعان كارتينالار, مۇسىندەردى ۇسىندىق. سۋرەت, ءمۇسىن ونەرىنىڭ ءار باعىتىن قامتىدىق. ءبىرى استانانىڭ كورىنىستەرىن, ەندى ءبىرى ەلباسىنىڭ بەت-بەينەسىن ارقاۋ ەتتى. ونەر ءوز زامانىمەن بىرگە داميدى. قازىرگى جاستار ينتەرنەت ارقىلى شەتەلدەگى جاڭالىقتاردان جان-جاقتى حاباردار. ءبىر قۋانتارلىعى, قازىرگى جاستار جاڭاشا ويلايدى. شاكىرتتەرىمىزدىڭ جاڭاشىلدىققا ۇمتىلىسى ەرەكشە, – دەيدى ول.
كورمەدەگى ەڭ عاجاپ دەگەن تاقىرىپتىق تۋىندىنىڭ ءبىرى – «ەلباسى» كارتيناسى. سۋرەتشى داۋرەن بەكنازار كارتيناعا بۇگىنگى كەزەڭدى عانا ەمەس, بەدەرلى بولاشاقتى دا بەينەلەگەن. «كارتينادا تاۋەلسىز ەل ءومىرىنىڭ ەڭ جارقىن ساتتەرىن قامتۋعا تىرىستىم. وتكەن تاريحتى بەينەلەۋمەن قاتار ەلباسىنىڭ بولاشاق ءۇشىن جاساعان جوسپارلارىن دا اسپەتتەدىم. كەلەشەك ۇرپاق ءۇشىن جاسالعان جۇمىستاردى ناسيحاتتاسام دەيمىن. تاۋەلسىزدىكتىڭ ءاربىر جىلى تاريح. ماقساتىم – ەلباسىنىڭ تۇلعاسىن جان-جاقتى ەتىپ كورسەتۋ. سوندىقتان كارتينانىڭ اتاۋىن «ەلباسى» دەپ اتادىم. پرەزيدەنت بەينەسىنىڭ توڭىرەگىنە استانانىڭ ەڭ ساۋلەتتى عيماراتتارىنىڭ ءبارىن ءبىر كارتيناعا سىيدىرۋ ارينە مۇمكىن ەمەس» دەيدى «ەلباسى» كارتيناسىنىڭ اۆتورى.
مەتروپوليتەندە استانانىڭ 20 جىلدىعىنا وراي ۇيىمداستىرىلعان ادەمى ءبىر شۋاق شاشقان كەرىم كورمەنىڭ ىقىلاس تانىتار كەيپى كوز ارباي بەرەدى.
ايالداماعا توقتاعان ەلەكتروۆوز سالدەن سوڭ كەلەسى ستانساعا قاراي جوڭكيدى. المالىعا كەلگەن جولاۋشىعا قۇشاعىن ايقارا اشقان استاناعا ارنالعان عاجاپ كورمە وزىنە ەلىكتىرىپ الادى. ونەرلى جاستاردىڭ اسپەتتى شىعارمالارى ىنتىقتىرا تۇسەدى. الدىڭىزدا استانانىڭ اراي شاشقان ايشىقتى كورىنىستەرى كوز اربايدى ەكەن.
...كوز الدىڭىزدا اراي شاشقان التىن ايدارلى استانا.
ساپارباي پارمانقۇل,
«ەگەمەن قازاقستان»
الماتى
