ال وبلىستىق قازاقستان حالقى اسسامبلەياسىنىڭ باستاماسىمەن العىس ايتۋ مەرەكەسى قارساڭىندا وڭتۇستىكتە باستالعان ونكۇندىكتىڭ ءار كۇنى جان جىلۋىنا, مەيىرىم شاپاعاتىنا بولەنگەن دەپ ايتسا دا بولادى.
وبلىستا «جان جىلۋى» اكتسياسى اياسىندا جالعىزباستى جانە الەۋمەتتىك تۇرعىدا از قامتىلعان وتباسىلارعا كومەك كورسەتىلىپ, بالالار ۇيلەرىندە قايىرىمدىلىق شارالارى ءوتتى. ەتنومادەني بىرلەستىكتەردىڭ وكىلدەرى تولە بي اۋدانىنداعى №2 بالالار ءۇيىنىڭ, سايرام اۋدانىنداعى «باۋىرجان» وتباسىلىق نەگىزدەگى بالالار ءۇيىنىڭ جانە ارىس قالاسىنداعى ت.تاجىباەۆ اتىنداعى وتباسى ۇلگىسىندەگى بالالار اۋىلىنىڭ تاربيەلەنۋشىلەرىنە كوتەرىڭكى كوڭىل كۇي سىيلاۋ جانە العىس ايتۋ كۇنىنىڭ ءمانىن ۇعىندىرۋ ماقساتىندا ءىس-شارالار ۇيىمداستىرىپ, سىيلىقتار تارتۋ ەتتى.
– قيىن-قىستاۋ كەزەڭدە قازاق جەرىنە كۇشتەپ قونىس اۋدارىلعان ءتۇرلى ەتنوستاردىڭ بۇگىنگى ۇرپاقتارى رەتىندە ءبىزدىڭ قيىنشىلىقتا پانا بولعان قازاق حالقىنا ايتار العىسىمىز شەكسىز. قازاقتىڭ باۋىرمالدىعىنىڭ ارقاسىندا ءوسىپ-وندىك. ورتاق وتانىمىزدىڭ وركەندەۋىنە ۇلەس قوسۋدى پارىزىم دەپ ساناپ, قايىرىمدىلىق شارالارىنا ۇنەمى قاتىسىپ وتىرامىن. بۇگىن «قايىرىمدىلىق كۇنى» اياسىندا وڭىرىمىزدەگى ەتنومادەني بىرلەستىكتەر بالالارعا قۋانىش سىيلاۋدى ءجون سانادىق. مۇنداي يگى شارالار ادامداردىڭ اراسىن جاقىنداتىپ, بىرلىكتى نىعايتا تۇسەدى, – دەيدى وبلىستىق تۇرىك ەتنومادەني بىرلەستىگىنىڭ توراعاسى لاتيفشا اسانوۆ.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
