وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ەرلان جاڭاباەۆتىڭ ايتۋىنشا, سوڭعى جىلدارى قىزىلوردا قالاسى جانە اۋدان ورتالىقتارىندا جولاۋشىلاردى زاڭسىز تاسىمالداۋشىلاردىڭ سانى ارتتى. ماسەلەن, 8 جانە 11 ورىنعا لايىقتالعان "حۋنداي ستارەكس" (وڭتۇستىك كورەيادان شىعارىلاتىن) ماركالى 100-گە جۋىق اۆتوكولىك يەلەرى شيەلى كەنتىنەن قىزىلوردا قالاسىنا جولاۋشىلاردى زاڭسىز تاسىمالداپ كەلگەن.
"بۇل ازاماتتاردىڭ قىزمەتىندە قاۋىپسىزدىك شارالارى ساقتاۋعا قاتىستى ورەسكەل زاڭ بۇزۋشىلىقتار بار. بىرىنشىدەن, ولاردا ساقتاندىرۋ پوليستەرى, ەكىنشىدەن, جولاۋشى تاسىمالداۋعا ارنالعان ليتسەنزيالارى جوق. كولىكتەرى تاسىمالداۋشىلار رەەسترىنە ەنگىزىلمەگەن, مارشرۋت باعىتى مەن ۋاقىتى ناقتىلانعان گرافيك جوق. جۇرگىزۋشىلەر مەديتسينالىق باقىلاۋدان, ال كولىكتەرى تەحنيكالىق تەكسەرىستەن وتپەگەن. سوندىقتان, مۇنداي تاسىمالداۋشىلار ادامداردىڭ ومىرىنە ۇلكەن قاۋىپ تۋدىرادى", - دەدى ەرلان جاڭاباەۆ.
زاڭسىز تاسىمالداۋشىلارعا تۇسىندىرمە جۇمىستارى جۇرگىزىلدى.
ء"بىز تاسىمالداۋشىلارمەن كەزدەسىپ, تۇسىندىرمە جۇمىستارىن جۇرگىزدىك. ولارعا زاڭ تالاپتارىنا ساي جۇمىس جاساۋ ءۇشىن جىل سوڭىنا دەيىن اۆتوكولىكتەرىن اۋىستىرۋعا ۋاقىت بەردىك. 16 ورىندى اۆتوبۋس بولۋى قاجەت. سونىمەن قاتار, وسى ۋاقىتتا ولار بارلىق قۇجاتتارىن زاڭعا سايكەس رەتتەۋى كەرەك. ولاردىڭ كولىكتەرىن نەسيەگە الىپ, وتباسىن اسىراپ وتىرعاندىعىن ەسكەرىپ تۇسىنىستىك تانىتتتىق", - دەدى ەرلان جاڭاباەۆ.
وبلىستىق اكىمشىلىك پوليتسيا باسقارماسى باسشىسىنىڭ مىندەتىن اتقارۋشى ايبەك قۇلماعانبەتوۆ جىل باسىنان بەرى ايماقتا اتقارىلىپ جاتقان رەيدتىك تەكسەرۋلەر تۋرالى ايتتى.
"قر ىشكى ىستەر مينيسترلىگىنىڭ تاپسىرماسىنا سايكەس 2018 جىلدىڭ 22 قاڭتارىنان 18 اقپان ارالىعىندا "اۆتوبۋس" شاراسى وتكىزىلدى. ناتيجەسىندە 1408 زاڭ بۇزۋشىلىق انىقتالدى. 27 اقپان مەن 1 ناۋرىز ارالىعىندا جەرگىلىكتى پوليتسيا قىزمەتى, وبلىستىق جولاۋشىلار كولىگى جانە اۆتوبوميل جولدارى باسقارماسى جانە كولىكتىك باقىلاۋ ينسپەكتسياسىمەن بىرىگىپ رەيد وتكىزدىك, تاسىمالداۋشىلارعا تۇسىندىرمە جۇمىسىن جۇرگىزدىك. ناتيجەسىندە 5 زاڭسىز تاسىمالداۋشى ايىپپۇل تولەدى. ولاردىڭ ءىسى رەسپۋبليكاداعى قولدانىستاعى زاڭناماعا سايكەس سانكتسيامەن سوتقا جولداندى", - دەدى ايبەك قۇلماعانبەتوۆ.
