تۇركى اكادەمياسى ابايدىڭ, الاش قايراتكەرلەرىنىڭ رۋحاني ۇستازى بولعان, جاديتشىلدىك قوزعالىسىنىڭ نەگىزىن قالاۋشى عۇلاما شيھابۋتدين ءمارجانيدىڭ 200 جىلدىعىنا وراي بيىلعى جىلدى «مارجاني جىلى» دەپ جاريالايدى. بۇل داتانى اكادەميا ۇجىمى تاتارستاندىق ارىپتەستەرىمەن بىرلەسىپ اتاپ ءوتۋدى جوسپارلاپ وتىر.
بۇدان بولەك, تۇركى حالىقتارىنىڭ اۋىز ادەبيەتى ۇلگىلەرىن جيناقتاپ, اسىرەسە قازاق فولكلورى ءۇشىن اسا قىمبات قازىنا قالدىرعان زەرتتەۋشى, رەسەي تۇركىتانۋ مەكتەبىنىڭ نەگىزىن قالاعان كورنەكتى عالىم ۆاسيلي ۆاسيلەۆيچ رادلوۆتىڭ بيىل دۇنيەدەن وتكەنىنە 100 جىل تولادى. وسىعان بايلانىستى اكادەميا 2018 جىلدى «رادلوۆ جىلى» دەپ جاريالايدى. بۇل داتاعا بايلانىستى قازاقستاندا جانە ماسكەۋدە رەسەي عىلىم اكادەمياسىنىڭ شىعىستانۋ ينستيتۋتىمەن بىرلەسىپ القالى شارالار وتكىزۋ جوسپارلاندى. سونىمەن بىرگە, اكادەميا رادلوۆتىڭ «تۇركى حالىقتارى اۋىز ادەبيەتىنىڭ ۇلگىلەرى» اتتى كوپتومدىعىن الداعى ۋاقىتتا جاڭا سەريامەن تولىق جاريالاماق.
بريفينتگە اكادەميانىڭ نەگىزگى باعىتى – تۇركولوگيا ەكەنىن ايتقان د.قىدىرالى ۇيىمنىڭ ىرگەلى جوبالارىنا اتسالىسىپ, قولداۋ كورسەتكەن, بىرلەسىپ كىتاپ شىعارۋعا ىقپال ەتكەن رەسەي فەدەراتسياسىنىڭ تۇركولوگتار كوميتەتىنە العىس ءبىلدىردى.
ايتا كەتۋ كەرەك, TWESCO رەسەي فەدەراتسياسىنىڭ عىلىمي-زەرتتەۋ ۇيىمدارىمەن جانە عالىمدارىمەن تىعىز ىنتىماقتاستىق ورناتقان. ماسكەۋلىك تانىمال شىعىستانۋشى ءامىر ءناجىپتىڭ «حIV عاسىرداعى تۇركى تىلدەرىنىڭ سالىستىرمالى-تاريحي سوزدىگى» اتتى 4 تومدىق ىرگەلى ەڭبەگى, دميتري ناسيلوۆ, يگور كورمۋشين, اننا دىبولاردىڭ «درەۆنەتيۋركسكي سلوۆار» اتتى الەمگە ايگىلى ەڭبەگىنىڭ اكادەميادا جارىق كورۋى سول شىعارماشىلىق ىنتىماقتاستىقتىڭ ايقىن كورىنىسى.
