كەزدەسۋ بارىسىندا نازارباەۆ زياتكەرلىك مەكتەپتەرى قىزمەتىنىڭ نەگىزگى ناتيجەلەرى مەن ولاردىڭ دامۋ پەرسپەكتيۆالارى تالقىلاندى.
مەملەكەت باسشىسى ەلىمىزدىڭ ورتا ءبىلىم بەرۋ جۇيەسىندە نازارباەۆ زياتكەرلىك مەكتەپتەرى ەرەكشە ءرول اتقاراتىنىن اتاپ ءوتتى.
– بۇل مەكتەپتەر بارلىعىنا ۇلگى بولۋى كەرەك. ءبىز ولاردىڭ تاجىريبەسىن جاڭا مەكتەپتەر اشاتىن كەزدە ەسكەرەتىن بولامىز. 2008 جىلدان بەرى زياتكەرلىك مەكتەپتەردى 5660 وقۋشى ءبىتىردى. ولاردىڭ بارلىعى دا ءۇش ءتىلدى ەركىن مەڭگەرگەن. ءبىز بۇكىل ەلگە قازاقستاندا ءۇش تىلدە ءبىلىم الۋ قولدان كەلەتىن ءىس ەكەنىن كورسەتتىك, – دەدى ەلباسى.
كۇلاش ءشامشيدينوۆا نۇرسۇلتان نازارباەۆقا زياتكەرلىك مەكتەپتەردىڭ وقىتۋشى قۇرامىن قالىپتاستىرۋ ماقساتىمەن جۇرگىزىلگەن جۇمىستار جونىندە مالىمدەدى.
– وسى جىلدار ىشىندە ءسىزدىڭ قولداۋىڭىزدىڭ ارقاسىندا كوپتەگەن جۇمىس اتقارىلدى. بىزدە 2800 مۇعالىم جۇمىس ىستەيدى. ولاردىڭ 195-ءى – شەتەلدىك وقىتۋشىلار, 183-ءى – «بولاشاق» حالىقارالىق باعدارلاماسى بويىنشا شەتەلدىڭ جەتەكشى وقۋ ورىندارىندا جانە نازارباەۆ ۋنيۆەرسيتەتىندە ءبىلىم العان تۇلەكتەر. بۇگىندە بىزدە 4 دوكتور, 22 عىلىم كانديداتى جانە 719 ماگيستر ساباق بەرەدى, – دەدى ك.ءشامشيدينوۆا.
سونىمەن قاتار ءبىلىم بەرۋ مەكەمەسىنىڭ باسشىسى وقۋشىلار كونتينگەنتىن قالىپتاستىرۋ كونكۋرستىق نەگىزدە جۇزەگە اسىرىلاتىنىن جانە تەك ۇمىتكەرلەردىڭ قابىلەتتەرىنە بايلانىستى انىقتالاتىنىن ايتتى.
كەزدەسۋ سوڭىندا ەلباسى زياتكەرلىك مەكتەپتەر جۇيەسىن ودان ءارى دامىتۋ جونىندە بىرقاتار ناقتى تاپسىرما بەردى.
