مەملەكەت باسشىسىنىڭ حالىققا بيىلعى جولداۋىنىڭ نەگىزگى ەرەجەلەرىن ءتۇسىندىرۋ ماقساتىندا قۇرىلعان رەسپۋبليكالىق اقپاراتتىق توپ قۇرامىندا اتىراۋعا كەلگەن ەنەرگەتيكا ۆيتسە-ءمينيسترى بولات اقشولاقوۆ وسىنداي جەتىستىكتەردى اتاپ ايتتى. «ەلباسى جولداۋىندا كورسەتىلگەن 10 مىندەت ۇكىمەتتىڭ ناقتى ءىس-شارالارىندا كورىنىس تابادى, – دەدى ول ايماقتاعى ەنەرگەتيكا سالاسىندا ەڭبەك ەتەتىن ۇجىمدارمەن كەزدەسۋدە. – مىسالى ءبىرىنشى مىندەت – ءوندىرىستى تەحنولوگيالىق جاڭارتۋ جانە تسيفرلاندىرۋ. ەنەرگەتيكا مينيسترلىگى ءوز قۇزىرەتى شەگىندە 2017 جىلدان باستاپ ەنەرگەتيكا سەكتورىندا جانە ەكولوگيا سالاسىندا تسيفرلاندىرۋدىڭ بىرقاتار جوبالارىن جۇرگىزەدى. 2018 جىلى اتىراۋ جانە شىمكەنت مۇناي وڭدەۋ زاۋىتتارىندا اۆتوماتتاندىرىلعان ءوندىرىستى باسقارۋ تورو جۇيەسىن ەنگىزۋ اياقتالادى. ناتيجە رەتىندە جابدىقتىڭ سەنىمدىلىگىن 8-10%-عا ارتتىرۋعا, جوندەۋ شىعىندارىن 10%-عا تومەندەتۋگە, جوسپارلى جىلدىق جوندەۋ جۇمىستارىنىڭ مەرزىمىن 45 كۇننەن 25 كۇنگە دەيىن تومەندەتۋگە مۇمكىندىك بەرەدى. جولداۋدىڭ مىندەتتەرىن ورىنداۋ شەڭبەرىندە بىزگە شيكىزاتتى وڭدەۋدى تەرەڭدەتۋ قاجەت. سونداي-اق بيىل «ەمبىمۇنايگاز», «قازگەرمۇناي» مەكەمەلەرىنىڭ كەن ورىندارىندا «ينتەللەكتۋالدى كەن ورنى» جانە «قازاتومونەركاسىپ» كەن ورىندارىندا «تسيفرلى كەنىش» قاناتقاقتى جوبالارى جۇزەگە اسىرىلادى. 2018 جىلدىڭ «جەڭىل جەڭىستەر» جوسپارىنا «قازمۇنايگاز ونىمدەرى» بازاسىندا استانادا «بايلانىسسىز اۆتوجانارماي قۇيۋ ستانسالارى» قاناتقاقتى جوباسى پىسىقتالۋدا».
جيىندا بىلگەنىمىزدەي, اتالعان مينيسترلىك «تسيفرلى قازاقستان» مەملەكەتتىك باعدارلاماسىنا بىرقاتار جوبالاردى قوسۋدى قاراستىرىپ جاتىر. ولاردىڭ قاتارىندا «تسيفرلى كەنىش», «تسيفرلى ەلەكتر ستانساسى», «ەلەكتر ەنەرگيانى كوممەرتسيالىق ەسەپتەۋدىڭ اۆتوماتتاندىرىلعان جۇيەسى», «اقىلدى جەلىلەر» سەكىلدى جاڭاشىلدىقتار بار.
اتىراۋدا ەنەرگيا تاپشىلىعى جوق
الايدا وڭىرلىك ەلەكتر كومپانياسىنىڭ جەلىلەرى مەن قۇرىلىستارىنىڭ 20 %-ى توزعان. جىل سوڭىنا دەيىن يەسىز قالعان ەلەكتر جەلىلەرى مەن بارلىق ترانسفورماتورلىق ستانسا ەنەرگيا تاسىمالداۋ ۇيىمدارىنىڭ بالانسىنا بەرىلەدى. «سونىڭ ناتيجەسىندە ەلەكترمەن جابدىقتاۋ سەنىمدىلىگىنىڭ ارتۋى مەن اۋىتقۋ تومەندەۋى ءتيىس, – دەدى ۆيتسە-مينيستر. – وسى باعىتتاعى جۇمىستى جالعاستىرۋ قاجەت. ەلباسى قويعان مىندەتتى ورىنداۋ ءۇشىن ەلەكترمەن جابدىقتاۋ ساياساتىن قايتا قاراستىرۋ جانە دەرەكتەردى تسيفرلاندىرۋ, ۇردىستەردى اۆتوماتتاندىرۋ بويىنشا جاڭا تەحنولوگيالار ەنگىزۋگە ەرەكشە نازار اۋداراتىن مەزگىل جەتتى».
تابيعي رەسۋرستاردى ءتيىمدى پايدالانىپ, ەكولوگيالىق قاۋىپسىزدىكتى قامتاماسىز ەتۋ بويىنشا دا قولعا الىناتىن شارالار قاتارى كوپ. تۇرمىستىق قاتتى قالدىقتاردى قايتا وڭدەۋ ماسەلەسى دە كۇن تارتىبىندە تۇر. ەنەرگەتيكا ۆيتسە-ءمينيسترى بولات اقشولاقوۆ اتىراۋ وبلىسىندا وندىرىستىك قالدىقتاردىڭ كولەمى 81,7 مىڭ توننادان 72,5 مىڭ تونناعا دەيىن ازايعانىنا توقتالدى. ايماقتا ءارتۇرلى قاتتى قالدىقتار پوليگوندارىنىڭ سانى 71-گە جەتكەن, بىراق سونىڭ ونى عانا ەكولوگيالىق تالاپتار مەن سانيتارلىق نورمالارعا سايكەس كەلەدى. ەكولوگيالىق قاۋىپسىزدىكتى قامتاماسىز ەتۋ ماقساتىندا بيىل مينيسترلىك پەن وبلىستىق اكىمدىك بىرلەسىپ, ءبىراز شارالاردى جوسپارلاپ وتىر. بولات اقشولاقوۆ ەنەرگەتيكا مينيسترلىگىندە قولدانىستاعى ەكولوگيالىق كودەكسكە تولىقتىرۋلار مەن وزگەرىستەر ەنگىزۋ ءۇشىن مۇددەلى ورگاندار وكىلدەرىنەن جۇمىس توبى قۇرىلعانىن حاباردار ەتتى.
مۇنايشىلار جولداۋدى قولدايدى
مەملەكەت باسشىسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋى اتىراۋلىق مۇنايشىلار قاۋىمىنا دا جىگەر بەردى. «ەمبىمۇنايگاز»اق باسقارما توراعاسىنىڭ بيزنەستى دامىتۋ جونىندەگى ورىنباسارى باۋىرجان بالجانوۆتىڭ ايتۋىنشا, «تسيفرلى قازاقستان» مەملەكەتتىك باعدارلاماسىن جۇزەگە اسىرىپ, وندىرىسكە جاڭا تەحنولوگيالاردى ەنگىزۋ ماقساتىندا كومپانيادا 2016 جىلدان باستاپ «تسيفرلى كەن ورنى» جوباسى جۇزەگە اسىرىلىپ جاتىر. جولداۋدا ايتىلعان ادامي كاپيتالدى دامىتۋ ماسەلەسىنە دە «ەمبىمۇنايگازدا» ايرىقشا كوڭىل بولىنەدى. سوڭعى ەكى جىلدا اكتسيونەرلىك قوعامنىڭ قۇرىلىمدىق بولىمشەلەرىندە دۋالدى ءبىلىم بەرۋ ارقىلى 64 جاس تاجىريبەدەن ءوتىپ, 16-سى قىزمەتكە قابىلدانعان. ەل ەكونوميكاسىنىڭ دامۋىنا ەلەۋلى ۇلەس قوسىپ كەلە جاتقان كاسىپورىن قايىرىمدىلىق جاساۋدى دا قاپەردەن شىعارمايدى. ايتالىق, سوڭعى بەس جىلدا 2 ملرد تەڭگەدەن استام قاراجات دەمەۋشىلىك پەن قايىرىمدىلىق شارالارىنا جۇمسالدى.
ەنەرگەتيكا ۆيتسە-ءمينيسترى بارلىق وڭىرلەردە بالالار تەحنوپاركتەرى مەن بيزنەس-ينكۋباتورلار جەلىسى قۇرىلاتىنىن دا ايتتى. جىل سوڭىنا دەيىن بارلىق مەديتسينالىق مەكەمەلەر اقپاراتتىق جۇيەمەن تولىقتاي قامتاماسىز ەتىلەدى. «اتقارىلعان ءىستىڭ ءبارى ءوڭىر حالقىنىڭ ىنتىماعى مەن ەلباسىنىڭ كورەگەن ساياساتىنىڭ ناتيجەسى, – دەدى بولات اقشولاقوۆ. – مۇمكىندىكتەردى بەلسەندى پايدالانىپ, ەل دامۋىنا ۇلەسىمىزدى قوسۋ, كاسىپقويلىق, ىسكەرلىك دەڭگەيىمىزدى جوعارىلاتۋ بارىمىزگە ورتاق مىندەت». بۇل مىندەتتەن اتىراۋلىق مۇنايشىلار دا تىس قالماق ەمەس.
باقىتگۇل باباش,
«ەگەمەن قازاقستان»
اتىراۋ
