تسيفرلىق تەڭسىزدىكتى جويۋ – ۋاقىت تالابى

وسىعان بايلانىستى, ەلىمىزدىڭ اۋىل­دىق جەرلەرىن ساپالى, جىلدام ينتەرنەتپەن قامتۋ ماسەلەسى الاڭداتۋشىلىق تۋعىزۋدا. قازاقستان رەسپۋبليكاسى اق­پارات جانە كوممۋنيكاتسيالار مي­نيسترلىگىنىڭ دەرەكتەرىنە قاراعاندا, بۇگىن­گى تاڭدا 1269 ەلدى مەكەن عانا جىل­دام­دىعى سەكۋندىنا 512 مەگابيت جانە ودان جوعارى كەڭجولاقتى ينتەرنەتپەن قامتىلعان. قابىلدانعان «تسيفرلى قازاقستان» مەملەكەتتىك باعدارلاماسىندا «قازاقستان رەسپۋبليكاسىنىڭ اۋىلدىق ەلدى مەكەندەرىن تالشىقتى-وپتيكالىق بايلانىس جەلىلەرى تەحنولوگياسى بو­يىنشا كەڭجولاقتى ينتەرنەتكە قول­جەتىمدىلىكپەن قامتاماسىز ەتۋ» جوباسى بويىنشا 1249 اۋىلدىق ەلدى مەكەن­دى 2021 جىلعا قاراي عانا جوعارى جىل­دام­دىقتى ينتەرنەتپەن قامتاماسىز ەتۋ جو­س­پار­لانعان. دەمەك, اۋىلدىق ەلدى مەكەن­دەردى كەڭجولاقتى ينتەرنەتپەن تولىق قامتۋ ءالى دە وزەكتى.

اعىمداعى جىلدىڭ قاڭتار ايىنان باس­تاپ, 2 مىڭنان استام ادام تۇراتىن اۋىلدىق وكرۋگتەردە 4 دەڭگەيلى بيۋدجەت ەنگىزىلۋدە, ال 2020 جىلدان باستاپ جەر­گىلىكتى ءوزىن-ءوزى باسقارۋ بيۋدجەتىن جاپ­پاي ەنگىزۋ كوزدەلۋدە. سونداي-اق جاقىن ارادا ەلەكتروندىق ەڭبەك بيرجاسىن, ەلەكتروندىق دەنساۋلىق پاسپورتىن جانە ەمدەلۋشىنىڭ جەكە كابينەتىن قولدانىسقا ەنگىزۋ جوسپارلانىپ وتىر. بۇعان قوسا ەلىمىزدە ورتا ءبىلىم بەرۋ جۇيەسىن رەفورمالاۋ پروتسەسى جۇرگىزىلىپ جاتىر, بۇل دەگەنىمىز ەلەكتروندى قۇجات اينالىمىن عانا ەمەس, وقىتۋشىلار مەن وقۋشىلاردىڭ زاماناۋي اقپاراتتىق تەحنولوگيالاردى جاپپاي قولدانۋىن قاجەت ەتەدى. ال 2020 جىلعا قاراي ءبىز مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋگە دايىن بولۋىمىز قاجەت.

وسى اتالعان رەفورمالار مەن ەلى­مىزدىڭ الەۋمەتتىك-ەكونوميكالىق دامۋى جولىنداعى باسقا دا كوپتەگەن مىن­دەت­تەردى جۇزەگە اسىرۋ اۋىلدىق ەلدى مەكەن­دەردەگى تسيفرلىق تەڭسىزدىكتى جوي­ماي, مۇمكىن بولمايتىنى ايدان انىق. سوندىقتان كوتەرىلىپ وتىرعان ماسە­لەنىڭ ماڭىزدىلىعىن ەسكەرە وتىرىپ, ءبىز پرەمەر-مينيستر باقىتجان ساعىن­تاەۆتىڭ اتىنا ساۋال جولداپ, تومەندەگى سۇراقتارعا جاۋاپ بەرۋىن وتىندىك:

1. اۋىلدىق ەلدى مەكەندەردى كەڭ­جولاقتى ينتەرنەتپەن قامتۋ ماقساتىندا ىسكە اسىرىلىپ جاتقان مەملەكەتتىك باعدارلامالارعا مونيتورينگ جۇرگىزۋ جانە ولاردى جۇيەلەندىرۋ جۇمىستارى ۇكىمەتتىڭ جوسپارىندا بار ما؟

2. اتالعان ماسەلەلەردى شەشۋ ءۇشىن الداعى ەكى جىل كولەمىندە قانشا قاراجات ءبولۋ كوزدەلگەن؟

3. اۋىلدىق ەلدى مەكەندەردى جانە اۋدانداردى ساپالى ينتەرنەتپەن قامتاماسىز ەتۋ ءۇشىن جەرگىلىكتى ات­قارۋشى ورگانداردىڭ بيۋدجەتىندە قارا­جات قاراستىرىلعان با؟

ناريمان تورەعاليەۆ,

سەنات دەپۋتاتى