ول كەزدە كەڭەستىك يدەولوگيا بولعاندىقتان مەملەكەتتىڭ ساياساتىنا قارسى كەلەتىن ءار ءسوزدى ءجىتى قاداعالاپ وتىراتىن. بىراق رەداكتورلاردىڭ ءوز مۇددەسى بولاتىن. ول الدىنا كەلگەن شىعارمانى جاقسى ەتىپ شىعارۋ, يا ناشار شىعارمالاردىڭ جارىق كورۋىنە جول بەرمەۋ. مەن بىلەتىن مىقتى رەداكتور – بەكسۇلتان نۇرجەكە- ۇلى. ول كىسى مەنىڭ ەكى كىتابىما رەداكتور بولدى. ءوزى باسپانىڭ باس رەداكتورى ەدى. سوندا ءار ءسوزدىڭ ءوز ورنىندا تۇرۋىنا, ءار سويلەمنىڭ دۇرىس قۇرىلۋىنا اسا ءمان بەرەتىن.
رەداكتورلىق دەگەن – ادام بويىنداعى قاسيەت. جازۋشى ءوزى سەزبەگەن, بىلمەگەن دۇنيەنى رەداكتور تۇيسىگىمەن سەزىپ, كورە الادى. باسى ارتىق ءسوز, ءتىپتى, ءبىر وقيعا شىعارمادان وقشاۋ, بۇلتيىپ تۇرۋى مۇمكىن. ءتىپتى كەرىسىنشە وقيعالاردى بايىتا ءتۇسىپ, قالامگەر كوتەرگەن ماسەلەنى دامىتۋعا تۋرا كەلەدى. وسىنداي ەسكەرتۋلەر جازۋشى ءۇشىن كەرەك. رەداكتور قاتال, ءارى جاناشىر. جازۋشىعا جاماندىق ويلاعاننان شۇيلىكپەيدى. كەرىسىنشە جاقسىسىن جارقىراتىپ كورسەتۋگە كۇش سالادى. كەڭەس زامانىنداعى رەداكتورلاردا وسى قاسيەت بولدى ما بىلمەيمىن. بىراق دوس-رەداكتورلار بولدى.
ءابدىجامىل نۇرپەيىسوۆتىڭ «قان مەن تەر» رومانى وندىرىسكە كەتىپ بارا جاتقاندا, زەينوللا قابدولوۆ بىرنەشە جەرىنە ەسكەرتۋ ايتىپتى. سوندا نۇرپەيىسوۆ وندىرىستەگى جۇمىستى توقتاتىپ قويىپ, رومانىن تۇزەدى. قادىر مىرزاليەۆ «جۇلدىز» جۋرنالىنا جۇمىسقا تۇرعاندا قاليحان ىسقاقتىڭ تارتپادا جاتىپ قالعان «قوڭىر كۇز ەدى» پوۆەسىن تاۋىپ الىپ, جۋرنالعا باستىرادى. كەيىن سول شىعارماسىنان باستاپ قاليحان ىسقاقتىڭ اتى شىعا باستايدى. بۇل كورە ءبىلۋ. جاقسى شىعارما تارتپادا نەگە ۇزاق ۋاقىت جاتىپ قالعان؟ سونى كورە بىلەتىن رەداكتوردىڭ بولماعانىنان. بۇعان ادەبي تانىم, تالعام كەرەك.
ادەبي رەداكتورلىق دەگەن, ءتىپتى مەملەكەت مۇددەلى بولاتىن كاسىپ. ويتكەنى ادەبي رەداكتور بولسا, قازىرگىدەي حالتۋرا قاپتاپ كەتپەيدى. يا جارىمجان, شيكى دۇنيەلەر شىقپايدى.
نەسىپبەك داۋتاي ۇلى,
جازۋشى
