قىزدار ۋنيۆەرسيتەتىنىڭ ستۋدەنتتەرى قاتىسقان جيىندا تەاتر مايتالمانى جاستاردىڭ كوكەيلەرىندە جۇرگەن ساۋالدارىنا جاۋاپ بەرىپ, ءوزىنىڭ ونەرگە قالاي كەلگەنى تۋراسىندا, ۇلتجاندى ازامات رەتىندە تولعاندىرىپ جۇرگەن ماسەلەلەر جايىندا اڭگىمەلەدى. سونىمەن قاتار, مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى تۋرالى ءسوز قوزعاپ, ونداعى باسىم باعىتتاردىڭ وسكەلەڭ ۇرپاققا بەرەر تاعىلىمى مەن تاربيەسى مول ەكەندىگىن جەتكىزدى. سىر-سۇحبات فورماتىندا ۇيىمداستىرىلعان كەش بارىسىندا ب. تۇرىس ستۋدەنتتىك شاقتا باسىنان وتكەرگەن قىزىقتى جايتتاردى ايتىپ, دومبىرامەن ءان شىرقادى. سونداي-اق, تەاتر ونەرى حاقىندا دا وي ءبولىستى.
– اكتەر, جالپى ونەر ادامى ساناسىندا ساڭىلاۋ بولسا, كۇندەلىكتى وي ۇستىندە جۇرەدى. مەن تەاتر ساحناسىنداعى كەيىپكەرلەرىمنىڭ بەينەسىندە, تەلەباعدارلامالاردا كوڭىلدى كورىنگەنمەن, كوپ ويلانىپ جۇرەتىن اداممىن. سىرتتاي كورىپ قالعاندار: «نەمەنە باسىڭ سالبىراپ, ەڭسەڭ ءتۇسىپ كەتكەن؟» – دەپ سۇراپ جاتادى. شىنايى ونەر تەرەڭنەن تارتادى. بەرىلگەن وبرازدى ساحناعا الىپ شىعا سالىپ, قويىلىم بىتكەسىن باسقا ادامعا اينالىپ كەتە بارسام, نەنىڭ بايانى بولماق؟ ومىرگە دە, ونەرگە دە پايىم مەن زەردە كەرەك, – دەدى ءوز سوزىندە بەكجان تۇرىس.
كەزدەسۋ سوڭىندا قىزدار ۋنيۆەرسيتەتىنىڭ ستۋدەنتتەرى تەاتر ساڭلاعىنا ەمەن-جارقىن سۇحباتى ءۇشىن ريزاشىلىعىن ءبىلدىرىپ, ءوز ونەرلەرىن كورسەتتى.
بەكجان تۇرىس اكادەميالىق دراما تەاتردىڭ ساحناسىندا ەلۋگە تارتا ءرول وينادى. ول ۇلتتىق, الەمدىك كلاسسيكا مەن زاماناۋي دراماتۋرگيادا سومداعان قايتالانباس وبرازدارىمەن حالىقتىڭ ىستىق ىقىلاسىنا بولەنگەن اكتەر. 30 جىلعا جۋىق ۋاقىت ارالىعىندا تەاتر ساحناسىنان بولەك, كينو مەن تەلەۆيزيا سالاسىنداعى ەڭبەگىمەن دە جۇرتشىلىققا كەڭىنەن تانىمال. اكتەردىڭ درامالىق رولدەرى كورەرمەنىن ەگىلتسە, كومەديالىق رولدەرىندە ەرىكسىز ەزۋگە كۇلكى ءۇيىرىلدىرىپ, ءبىر كۇلدىرىپ الادى. كۇلدىرىپ وتىرىپ, جىلاتاتىن دا كەزى كوپ.
– «ونەردىڭ ميسسياسى – ۇلتقا قىزمەت ەتۋ» دەپ بىلەتىن ونەر يەسى وزىندىك ۇستانىمدارىمەن, بەرىك كوزقاراسىمەن, ونەرگە دەگەن ادالدىعىمەن, بولمىسىنداعى قاراپايىمدىلىعىمەن, ادامگەرشىلىكتىڭ اق جولىن كەسىپ وتپەس مىنەزىمەن قادىرلى. ءىزىن جالعاۋشى ءىنى-قارىنداستارىنا ايتار اقىلىمەن باعالى. سوندىقتان دا الدىڭعى تولقىن اعالاردىڭ ويى مەن پايىمى ءبىز ءۇشىن قىمبات, – دەيدى وقۋ ورنىنىڭ ستۋدەنتتەرى.
