مىندەتتى سەنات اتقاراتىن بولادى

كەشە قايرات ءماميدىڭ توراعالىق ەتۋىمەن بولعان پارلامەنت سەناتى بيۋروسىنىڭ وتىرىسىندا ءماجىلىس بولماعان كەزدەگى پارلامەنتتىڭ زاڭ شىعارۋ مىندەتتەرى تۋرالى ايتىلدى, دەپ حابارلادى پارلامەنت سەناتىنىڭ ءباسپاسوز قىزمەتى. ق.ءمامي اتاپ وتكەندەي, پرەزيدەنت ن.نازارباەۆتىڭ جارلى­عى­مەن تومەنگى پالاتانىڭ وكى­لەت­تىگى توقتاتىلدى. ءماجىلىستىڭ جاڭا قۇرامى سايلانعانعا دەيىن قا­زاق­ستان رەسپۋبليكاسى كونستيتۋ­تسي­يا­سى­نىڭ 55-بابىنا سايكەس, پار­لامەنتتىڭ زاڭ شىعارۋ مىندەتىن سەنات ورىندايتىن بولادى. قازىرگى كەزدە سەنات قاراۋىندا 15 زاڭ جوباسى, ءماجىلىس اپپا­را­تىنان الىنعان زاڭ جوبالارىنىڭ ىشىندە پارلامەنتتىڭ 5-ءشى سەس­سياسىنىڭ اشىلۋىندا مەملەكەت باسشىسى بەلگىلەگەن زاڭ جوبا­لا­رى بار. بۇل زاڭ جوبالارى ەلى­مىز­دىڭ الەۋمەتتىك-ەكونوميكالىق دا­مۋى مەن حالىقارالىق مىندەتتەمەلەرىن ورىنداۋدى زاڭ­نا­مالىق تۇرعىدا قامتاماسىز ەتەدى. ءبارىن قوسقاندا, سەنات 54 زاڭ جوباسىن قابىلداۋ جونىندەگى جۇ­مىستاردى قولعا الاتىن بولدى. ق.ءماميدىڭ ايتۋىنشا, سەناتتا جوس­پارلى تۇردە جۇمىستار جۇرگى­زى­لەدى جانە قابىلداناتىن زاڭ­دار­دىڭ ساپاسىنا باسا نازار اۋدارىلادى. بيۋرو وتىرىسىندا ماجىلىستە ماقۇلدانعان جانە پارلامەنتتىڭ تومەنگى پالاتاسى اپپاراتىنان سۇراتىپ الىنعان زاڭ جوبالارى كوميتەتتەر مەن سەنات اپپا­را­تىنا بەرىلدى. بيۋرو وتىرىسىندا سونداي-اق بيىلعى 24 قاراشادا بولا­تىن كەزەكتى سەنات وتىرىسىنىڭ كۇن تارتىبىنە ۇسىنىستار قا­رال­دى. الداعى وتىرىستا حالىق­ارالىق كەلىسىمدەر, كونۆەنتسيالار جانە شارتتاردى راتيفيكاتسيالاۋ ءجو­نىندەگى بىرقاتار زاڭ جوبالارىن تالقىلاۋ جوسپار­لانىپ وتىر. دەپۋتاتتار «نەكە (ەرلى-زاي­ىپ­تىلىق) جانە وتباسى تۋرالى» كودەكس جوباسىن, «نوتاريات تۋ­رالى» زاڭعا وزگەرىستەر مەن تو­لىقتىرۋلار ەنگىزۋ تۋرالى», «قا­زاقستان رەسپۋبليكاسىنىڭ كەي­بىر زاڭنامالىق اكتىلەرىنە بانك قىز­مەتىن جانە قارجى ۇيىمدارىن تاۋەكەلدەردى ازايتۋ تۇرعىسىنان رەتتەۋ ماسەلەلەرى بويىنشا وزگە­رىس­تەر مەن تولىقتىرۋلار ەنگىزۋ تۋرالى» زاڭ جوبالارىن قا­راي­تىن بولادى.