ەلباسى ءوزىنىڭ جولداۋىندا ادەتتەگىدەي الەۋمەتتىك سالاعا زور نازار اۋداردى. ونىڭ ىشىندە قوعامنىڭ ءارتۇرلى ساتىلارى بار. عالىمدار, ستۋدەنتتەر, وقۋشىلار زەينەتكەرلەر مەن جۇمىسكەرلەر, قوعامنىڭ ءار مۇشەسى بولاشاقتا ءوزىنىڭ دامۋ جولدارىن وسى جولداۋدان ايقىن كورە الاتىنىنا سەنىمدىمىن. ارينە باستى ماقسات – دامىعان 30 ەلدىڭ قاتارىنا قوسىلۋ. بۇل اينالىپ كەلگەندە ءومىردىڭ ساپاسىن جوعارى كوتەرۋ بولىپ تابىلادى.
نۇرسۇلتان نازارباەۆ بيىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا جۇزەگە اسىرىلۋى ءتيىس 10 مىندەت ايقىندالعانىن اتاپ ءوتتى. ءبىلىم بەرۋ سالاسىنىڭ قىزمەتكەرى بولعاندىقتان, بىزگە ادام كاپيتالىنىڭ جاڭا ساپاسىنا قاتىستى جەتىنشى مىندەت كوپ وي سالىپ وتىر.
پرەزيدەنت بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەتتىگىن ايتادى. ء«بىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ بولۋعا ءتيىس. 2019 جىلدىڭ 1 قىركۇيەگىنە قاراي مەكتەپكە دەيىنگى ءبىلىم بەرۋ ىسىندە بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ بىرىڭعاي ستاندارتتارىن ەنگىزۋ قاجەت», دەيدى ەلباسى. ورتا ءبىلىم بەرۋ سالاسىندا جاڭارتىلعان مازمۇنعا كوشۋ باستالدى, بۇل 2021 جىلى اياقتالاتىن بولادى. مەملەكەت باسشىسى اتاپ وتكەندەي, بۇل – مۇلدە جاڭا باعدارلامالار, وقۋلىقتار, ستاندارتتار جانە كادرلار. پەداگوگتاردى وقىتۋ جانە ولاردىڭ بىلىكتىلىگىن ارتتىرۋ جولدارىن قايتا قاراۋ كەرەك بولىپ وتىر.
تاراز مەملەكەتتىك پەداگوگيكالىق ۋنيۆەرسيتەتىنىڭ مونيتورينگ جانە پەداگوگيكالىق زەرتتەۋلەر ورتالىعى ءوڭىر مەكتەپتەرىمەن تىعىز بايلانىس ورناتىپ, زەرتتەۋلەر جۇرگىزىپ كەلەدى. ورتالىقتىڭ ماقساتى – وبلىسىمىزداعى 451 مەكتەپكە كەشەندى ادىستەمەلىك قولداۋ كورسەتۋ جۇمىسىن ۇيلەستىرۋ, جاڭارتىلعان مازمۇندا شىعارىلىپ جاتقان وقۋلىقتار مەن وقۋ-ادىستەمەلىك قۇرالدارىن زەردەلەۋ, وقۋ ءۇردىسىن جاڭعىرتۋ باعىتىندا اتقارىلىپ جاتقان جۇمىستارعا مونيتورينگ جۇرگىزۋ. وسى مونيتورينگ ناتيجەسىندە كەلەسىدەي مالىمەت جيناقتالدى. اتاپ ايتقاندا, بۇگىندە جامبىل وبلىسىنداعى 2 مەكتەپتىڭ (تاراز قالاسى, №41 گيمنازيا; ت.رىسقۇلوۆ اۋدانى №1 مەكتەپ-ليتسەي) 3-سىنىپتارىندا (271 وقۋشى) جاڭا ستاندارتقا ساي ازىرلەنگەن وقۋلىقتار مەن وقۋ-ادىستەمەلىك كەشەندەرى, وقۋ جوسپارلارى مەن باعدارلامالار سىناقتان وتكىزىلۋدە.
جاڭارتىلعان ءبىلىم بەرۋ مازمۇنى بويىنشا 675 مەكتەپ اكىمشىلىگى, 5082 باستاۋىش جانە نەگىزگى سىنىپتاردا ساباق بەرەتىن پەداگوگتار ءبىلىم جەتىلدىرۋ كۋرستارىنان وتسە, 556 مۇعالىم ترەنەرلەردى دايىنداۋ كۋرستارىندا ءبىلىمىن جەتىلدىردى. الايدا بۇل جەتكىلىكسىز. وسى ورايدا تاراز مەملەكەتتىك پەداگوگيكالىق ۋنيۆەرسيتەتى كەشەندى جۇمىس اتقارىپ جاتىر. اتاپ ايتقاندا, بيىلعى 3-كۋرس ستۋدەنتتەرى 2019 جىلى وقۋ ورنىن ءتامامداپ, ورتا مەكتەپتەرگە جاس مامان رەتىندە جاپپاي ءۇشتىلدى ءبىلىم بەرۋ پروتسەسىنە كىرىسكەلى تۇر. وسىعان وراي ستەيكحولدەرلەردىڭ ۇسىنىستارىن ەسكەرە وتىرىپ, جاڭارتىلعان ءبىلىم بەرۋ مازمۇنىنا سايكەس ەلەكتيۆتى پاندەر وقىتىلۋدا.
ء«بىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋ ساپاسىن كۇشەيتۋ كەرەك. بۇل – جاستاردى جاڭا تەحنولوگيالىق قالىپقا دايىنداۋدىڭ ماڭىزدى شارتى», دەيدى پرەزيدەنت. ءبىزدىڭ جوعارى وقۋ ورنىندا دۋبلين ديسكريپتورلارىنا سايكەس مودۋلدىك ءبىلىم بەرۋ باعدارلامالارى ەنگىزىلدى. تاراز قالاسىنداعى №5 مەكتەپ-گيمنازياسىنىڭ بازاسىندا ەكسپەريمەنتالدى-تاجىريبەلىك الاڭ اشىلىپ, ۋنيۆەرسيتەتتىڭ پروفەسسور-وقىتۋشىلار قۇرامى فيزيكا, بيولوگيا, حيميا, ينفورماتيكا پاندەرىن ءتىل مەن مازمۇندى كىرىكتىرىپ وقىتۋ تەحنولوگياسى بويىنشا ۇزدىكسىز وقىتۋ سەمينارلارى سەرياسىن وتكىزىپ, تەوريالىق-ادىستەمەلىك قولداۋ كورسەتىلۋدە. تاراز مەملەكەتتىك پەداگوگيكالىق ۋنيۆەرسيتەتىنە گەرمانيا, ۇلىبريتانيا, بەلارۋس, رەسەيدەن ساراپشى عالىمدار شاقىرىلىپ, جاراتىلىستانۋ باعىتىنداعى وقۋ پاندەرىن اعىلشىن تىلىندە وقىتاتىن مەكتەپ مۇعالىمدەرىنە ارنالعان ء«تىل مەن مازمۇندى كىرىكتىرىپ وقىتۋ تەحنولوگياسىن (CLIL) قولدانۋ قاعيدالارى» باعىتىندا حالىقارالىق وقىتۋ سەمينارلار سەرياسى ۇيىمداستىرىلىپ جاتىر. كەمبريدج ۋنيۆەرسيتەتى جانە زلين ۋنيۆەرسيتەتىنىڭ ىنتىماقتاستىعى اياسىندا ء«ۇشتىلدى ءبىلىم بەرۋ جاعدايىندا تىلدىك ورتاعا ەنۋ جانە كىرىكتىرىلگەن وقىتۋ» اتتى بىرلەسكەن جوبا CLIL تەحنولوگياسىنا نەگىزدەلىپ, 5ۆ011200-«حيميا», 5ۆ011400-«تاريح» ءبىلىم بەرۋ باعدارلامالارى بويىنشا ىسكە اسىرىلىپ, ءبىرىنشى كەزەڭى اياقتالدى.
جولداۋدا «جوعارى وقۋ ورىندارى شەتەلدەردىڭ جەتەكشى ۋنيۆەرسيتەتتەرىمەن, عىلىمي ورتالىقتارىمەن, ءىرى كاسىپورىندارىمەن جانە ترانسۇلتتىق كورپوراتسيالارمەن بىرلەسكەن جوبالاردى بەلسەندى تۇردە جۇزەگە اسىرۋى قاجەت» دەپ ايتىلعانداي, «قازاقستان رەسپۋبليكاسىندا ءۇشتىلدى ءبىلىم بەرۋ ساياساتىن جۇزەگە اسىرۋ اياسىندا ورتا ءبىلىم بەرەتىن مەكتەپتەردە ءپان مەن ءتىلدى كىرىكتىرە وقىتۋ تەحنولوگياسىن (CLIL) ەنگىزۋ» جالپى سوماسى 41 ملن تەڭگە بولاتىن عىلىمي-زەرتتەۋ جوباسى قولعا الىندى. جوباعا انگليانىڭ كەمبريدج ۋنيۆەرسيتەتىنىڭ, گەرمانيانىڭ گامبۋرگ ۋنيۆەرسيتەتى مەن چەحيانىڭ زلين ۋنيۆەرسيتەتىنىڭ عالىمدارى قاتىساتىن بولادى. جولداۋدا جوعارى ءبىلىم بەرۋ جۇيەسىنە قاتىستى ايتىلعان مىندەتتەردى ورىنداۋعا تارمپۋ ۇجىمى ايانباي اتسالىسادى.
مەملەكەت باسشىسى بەلگىلەپ بەرگەن ون كەشەندى مىندەتتى ءىس جۇزىنە اسىرۋ ماقساتىندا جۇمىلا ەڭبەك ەتىپ, بىرلىگىمىزدى بەرىك, بەرەكەمىزدى باياندى ەتە بەرۋ باستى پارىزىمىز بولماق.
داريا قوجامجاروۆا,
تاراز مەملەكەتتىك پەداگوگيكالىق ۋنيۆەرسيتەتىنىڭ رەكتورى, ۇعا اكادەميگى
