اقمادي سارباسوۆتىڭ ايتۋىنشا, 2017 جىلدىڭ قورىتىندىسى بويىنشا بۇكىلالەمدىك ەكونوميكالىق فورۋمىنىڭ جاھاندىق باسەكەگە قابىلەتتىلىك يندەكسىنىڭ «ەڭبەك نارىعىنىڭ تيىمدىلىگى» فاكتورى بويىنشا قازاقستان 140 ەلدىڭ ىشىندە 35-ءشى ورىنعا يە بولدى. بۇل جاڭارتىلعان ەڭبەك زاڭناماسىنىڭ عانا ەمەس, سونىمەن بىرگە الەۋمەتتىك سەرىكتەستەرمەن بىرگە قابىلداناتىن جۇيەلىك شارالاردىڭ دا ناتيجەسى.
«وتكەن جىلى ۇشجاقتى كوميسسيا ەڭبەكاقى بويىنشا قارىزى بار 305 كاسىپورىندى انىقتادى. 2017 جىلدىڭ قورىتىندىسىندا جۇمىس بەرۋشىلەر تاراپىنان 22,1 مىڭ جۇمىسشىعا 3,1 ملرد تەڭگە بەرەشەك ءوندىرىلدى. جۇمىسشىلاردى قىسقارتۋدى جوسپارلاعان 75 كاسىپورىندا 3,7 مىڭ قىزمەتكەردى جۇمىستان بوساتپاۋعا باعىتتالعان شارالار قابىلداندى, ال 185 مىڭنان استام جۇمىسشىسى بار 422 كاسىپورىن ەڭبەك جانە الەۋمەتتىك زاڭنامانى ءجيى بۇزاتىن كاسىپورىندار رەتىندە تاۋەكەلگە ءجيى ۇشىرايتىندار قاتارىندا», دەدى باس ەڭبەك ينسپەكتورى.
جانە دە ول 2017 جىلى جەكە ەڭبەك كەلىسىمشارتتارىنىڭ سانى 60 مىڭعا ارتقانىن, بۇگىنگى كۇنى قىزمەتكەرلەردى قىسقارتۋدىڭ الدىن الۋعا باعىتتالعان 115 مىڭ مەموراندۋم جاسالعانىن, سونىڭ ناتيجەسىندە 2,8 ملن جۇمىس ورنى ساقتالىپ قالعانىن باياندادى.
اقمادي سارباسوۆتىڭ ايتۋىنشا, 2017 جىلى ازاماتتاردىڭ وتىنىشتەرى بويىنشا 9 920 جوسپاردان تىس تەكسەرۋ جۇرگىزىلگەن.
«ولاردىڭ باسىم بولىگى جالدامالى جۇمىسشىلار جانە جۇمىستان بوساتىلعاندار. ولاردىڭ شاعىمى بويىنشا 14,9 مىڭنان استام زاڭ بۇزۋشىلىق انىقتالدى. تەكسەرىس ناتيجەسىندە 467 ملن تەڭگە ايىپپۇل سالۋ تۋرالى سانكتسيالار بەرىلدى», دەدى كوميتەت توراعاسى.
ونىڭ پىكىرىنشە, ەڭبەك قاۋىپسىزدىك جاعدايلارىن قامتاماسىز ەتۋ ماسەلەلەرىندە وڭ وزگەرىستەر بايقالادى. سوڭعى 3 جىلدا ءوندىرىس ورىندارىندا زارداپ شەككەندەر قاتارى 16 پايىزعا ازايعان.
«ەكونوميكانىڭ سالالارى بويىنشا ەڭ كوپ زارداپ شەگەتىن جۇمىسشىلار كەن-مەتاللۋرگيالىق كەشەندەردە –16,0 پايىز جانە قۇرىلىس يندۋسترياسىندا 15,2 پايىز بولىپ تىركەلگەن. جاڭا ەڭبەك كودەكسى قاۋىپسىز ەڭبەك جاعدايلارىن جاقسارتۋ ءۇشىن وندىرىستىك كەڭەستەر قۇرۋدى قاراستىرادى. بۇگىندە 12 مىڭنان استام وسىنداي كەڭەس قۇرىلعان كاسىپورىندار اراسىندا 140 جۇمىس بەرۋشىگە «سەنىم سەرتيفيكاتى» تابىستالدى. ەسكە سالا كەتەيىك, جۇمىس بەرۋشىلەرگە ەڭبەك زاڭناماسىنىڭ تالاپتارىنا سايكەس دەكلاراتسيا قاعيدالارى نەگىزىندە سەنىم سەرتيفيكاتتارى بەرىلەدى. مۇنداي كۋالىكتى العاندارعا ءۇش جىل ىشىندە تەكسەرىس جۇرگىزىلمەيدى», دەدى ول.
راۋان قايدار,
«ەگەمەن قازاقستان»
