اگەنتتىكتىڭ اقتوبە وبلىسى بويىنشا دەپارتامەنتى وتكەن جىلى 23 رەت ارنايى رەيد وتكىزىپ, مەملەكەتتىك اۆتوكولىكتەردى جەكە شارۋالارعا پايدالانۋدىڭ 33 دەرەگىن انىقتادى. ونىڭ سىرتقى سيپاتىنا كوز جۇگىرتسەك, ءبىرىنشى كەزەكتە مۇنىڭ ءوزى جۇرگىزۋشىلەردىڭ كىناسى بولىپ شىعادى. ويتكەنى دەپارتامەنتتەن الىنعان دەرەكتەر كوپ جاعدايلاردا قىزمەتتىك كولىكتەردى جۇرگىزۋشىلەر ءوز مەنشىگىندەي كورىپ كەلگەنىن كورسەتەدى. ءسويتىپ ولار قىزمەتتىك كولىكتەردى تاكسي رەتىندە پايدالانىپ, تۇرعىنداردى تاسىعان.
ارينە, مۇنداي جاعدايدا جانارماي شىعىنىن رۋلدە وتىرعاندار قالتاسىنان شىعارمايتىنى بەلگىلى. بۇل مەملەكەتتىك اۆتوكولىكتەرگە بەرىلەتىن تولەماقىلار مەن تالوندار ەسەبىنەن جابىلادى. ەكىنشىدەن, كەزدەيسوق جۇرىستەر مەملەكەتتىك اۆتوكولىكتىڭ مەرزىمىنەن بۇرىن توزۋى مەن ەسكىرۋىنە دە اسەر ەتەدى. سودان كەيىن مەملەكەتتىك مەكەمەلەر تاراپىنان تاعى دا جىلجىمالى قۇرالدار ساتىپ الۋعا تاپسىرىستار بەرىلىپ جاتادى. ەكى ارادا بيۋدجەت قارجىسى شىعىن بولادى.
ءبىر قىزىعى, ءتىپتى قىزىعى ەمەس-اۋ, تۇسىنىكسىزدىگى, مۇنداي تەرىس كورىنىستەر ورىن العان كەزدە تارتىپتىك شارالار وسى ۋاقىتقا دەيىن تەك مەملەكەتتىك مەكەمەلەردىڭ جۇرگىزۋشىلەرىنە قاتىستى عانا قولدانىلىپ كەلىپتى. سوندا وزدەرىنە بەكىتىلىپ بەرىلگەن مەملەكەتتىك اۆتوكولىكتەردىڭ ءجۇرىس-تۇرىسىنا باقىلاۋ جاسامايتىن, بۇل جونىندە وزدەرىنە جۇكتەلگەن جاۋاپكەرشىلىكتى سەزىنبەيتىن مەكەمە باسشىلارى سۇتتەن اق, سۋدان تازا بولىپ قالا بەرە مە؟
الداعى ۋاقىتتا مۇنداي جاعداي بولمايدى. كەلەسى كەزەكتە ءبىز وسىنداي كورىنىستەرگە جول بەرگەن, باقىلاۋدى ءوز بەتىمەن جىبەرگەن مەكەمە باسشىلارىن دا جاۋاپكەرشىلىككە تارتۋ ماسەلەسىن ويلاستىرىپ وتىرمىز, – دەيدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسى بويىنشا دەپارتامەنتىنىڭ باسشىسى قايىرجان توكۋشەۆ.
ارينە, بۇل ايتىلعاندار كاسىپورىن باسشىلارىنىڭ تىكەلەي وزدەرى قىزمەتتىك كولىكتەردى جەكە باستىڭ مۇددەلەرىنە پايدالانبادى نەمەسە پايدالانبايدى دەگەن ۇعىمداردى بىلدىرمەيدى. مۇنداي دەرەكتەر دە بار. ولاردىڭ قاتارىندا اقتوبە قالاسى اكىمى اپپاراتىنىڭ بۇرىنعى باسشىسى جۇمان زەينەنىڭ, №10 اقتوبە قالالىق بالالار مەن جاسوسپىرىمدەرگە ارنالعان سپورت مەكتەبىنىڭ ديرەكتورى باقتيار تولەۋوۆتىڭ, تەمىر اۋداندىق اۋرۋحاناسىنىڭ باسشىسى ەسەنتەمىر دەمەگەنوۆتىڭ جانە قوبدا اۋداندىق ۆەتەريناريا ستانساسىنىڭ باسشىسى تيمۋر قۇلمەتەنوۆتىڭ اتى-جوندەرىن اتاي الامىز. قىزمەتتىك كولىكتەردى قىزمەتتەن تىس ماقساتتارعا پايدالانۋ كورىنىستەرى دەپارتامەنت ماماندارى مەن ساراپشىلارى جۇرگىزگەن رەيدتەر كەزىندە وبلىستىق مادەنيەت, قۇجاتتاما جانە ارحيۆتەر, كاسىپكەرلىك, قارجى, ءدىن ىستەرى, جەردىڭ پايدالانىلۋى مەن قورعالۋىن باقىلاۋ, جەر قاتىناستارى, دەنە شىنىقتىرۋ جانە سپورت باسقارماسىندا ورىن العانى قىنجىلتپاي قويمايدى. مۇنداي جاعىمسىز جايتتاردىڭ اقتوبە قالاسىنا جانە ىرعىز بەن حرومتاۋ اۋداندارىنا دا قاتىسى بار.
ەندەشە اتالعان باسقارمالاردىڭ باسشىلارى مارجان قورعانباەۆا, انار دارجانوۆا, گۇلقاسيما سۇيىنتاەۆا, جولداس قالماعامبەتوۆ, ءابدۋحات مىرزالين, قاباي سارسەنعاليەۆ, نۇرلىبەك ءجۇسىپوۆ پەن اقتوبە قالاسى جانە ىرعىز بەن حرومتاۋ اۋداندارىنىڭ اكىمدەرى ءىلياس وسپانوۆ, ءمادي ەلەۋسىزوۆ پەن امانعالي بەردالين بۇل جايتقا ءتيىستى باقىلاۋ قويادى دەگەن سەنىمدەمىز. ايتالىق, جوعارىدا اتالعان كەيبىر باسقارمالار مەن اقتوبە قالاسى اكىمدىگىنە قاراستى مەملەكەتتىك مەكەمەلەردىڭ قىزمەت كولىكتەرى جۇرگىزىلگەن رەيدتەر بارىسىندا بىرنەشە رەت ۇستالىپتى. بۇل دەرەكتىڭ ءوزى باسقارما باسشىلارى مەن قالا اكىمى تاراپىنان ءتيىستى باقىلاۋدىڭ جوقتىعىن كورسەتەدى.
ءسوز سوڭىندا ايتارىمىز, بۇگىنگى كەزدە تىلدىك قورىمىزدا «ستيكەر» دەگەن ءسوز پايدا بولا باستادى. بۇل تولىق اقپارات بەرەتىن ارنايى بەلگىنى مەملەكەتتىك اۆتوكولىككە ورناتۋ نەمەسە جاپسىرۋ دەگەن ۇعىمدى بىلدىرەدى. مۇندا ونىڭ قانداي باسقارما مەن دەپارتامەنتكە نەمەسە قانداي بيۋدجەتتىك مەكەمەگە قاراستى ەكەنى كورسەتىلىپ, بۇل ماسەلەگە تولىق اشىقتىق پەن جاريالىلىق بەرىلەدى. بۇل يگى ىسكە قوزعاۋ سالعان دا اگەنتتىك بولىپ شىقتى. سوعان سايكەس اقتوبە وبلىسىنداعى اۋماقتىق دەپارتامەنتتەرگە قاراستى قىزمەتتىك اۆتوكولىكتەرگە ارنايى ستيكەرلەر تولىقتاي ورناتىلعان. ال وسى باعىتتا وبلىستىق باسقارما باسشىلارىنىڭ قيمىلى ءالى دە بولسا باياۋ, سەلسوق, ەنجار بولىپ وتىر. مۇنىڭ ءوزى ولاردىڭ قىزمەتتىك كولىكتەردى جەكە باسىنىڭ مۇددەلەرىنە پايدالانۋدان باس تارتقىسى كەلمەيتىن ءىس-ارەكەتتى تانىتپاسىنا كىم كەپىل؟
قىزمەتتىك اۆتوكولىكتەرگە ستيكەرلەر ورناتۋ بەلگىلى ءبىر نورماتيۆتىك-قۇقىقتىق اكتىلەرمەن جانە زاڭدىق كۇشى بار تارتىپتەرمەن بەكىتىلگەن ءىس ەمەس. بۇل ازاماتتىق قوعام مەن ءوزارا ءىس-قيمىلدى دامىتۋدى كوزدەيتىن ءارى ورتاق ماقساتقا جەتۋدى باستى ۇستانىم سانايتىن اگەنتتىكتىڭ باستاماسى. ال تۇتاستاي العاندا «قىزمەتتىك كولىك – قىزمەتتىك ماقساتتا» اكتسياسىنىڭ باستى ماقساتى دا وسى ارنادان تامىر تارتادى. ءبىر سوزبەن ايتقاندا, قىزمەتتىك كولىكتەرگە ستيكەرلەر ورناتۋ – اردىڭ ءىسى بولماق.
تەمىر قۇسايىن,
«ەگەمەن قازاقستان»
اقتوبە
سۋرەتتە: ستيكەرلەر وسىلاي ورناتىلادى
