UN NEWS CENTRE
بىرىككەن ۇلتتار ۇيىمىنىڭ شتاب-پاتەرىندە قازاقستان پرەزيدەنتىنىڭ توراعالىعىمەن وتكەن قاۋىپسىزدىك كەڭەسىنىڭ جوعارى دەڭگەيدەگى پىكىرتالاسىندا نۇرسۇلتان نازارباەۆ سولتۇستىك كورەياداعى يادرولىق پروبلەمانى شەشۋ ءۇشىن يرانمەن كەلىسىمگە كەلۋگە مۇمكىندىك بەرگەن كونسترۋكتيۆتى جولدى قولدانۋ كەرەكتىگىن ايتتى. سونىمەن قاتار قازاقستان پرەزيدەنتى بۇل تۋرالى دونالد ترامپپەن سويلەسكەنىن جەتكىزدى. نۇرسۇلتان نازارباەۆتىڭ ايتۋىنشا, تۋىنداعان كەلىسپەۋشىلىكتى ەڭسەرۋگە بولادى.
«بۇل پروبەلمانى شەشۋ ءۇشىن اقش, رەسەي, قىتاي اراسىنداعى سەنىمدى قايتا قالپىنا كەلتىرۋ كەرەك. بۇل تۋرالى مەن اق ۇيدە دونالد ترامپپەن سويلەستىم. مەنىڭ ويىمشا, بۇل جەردە بارلىعىمىزدىڭ ۇستانىمىمىز بىردەي. اقش-تىڭ, رەسەي مەن قىتايدىڭ قاتىسۋىنسىز بۇل پروبلەمانى شەشۋ قيىن», دەدى نۇرسۇلتان نازارباەۆ. سونداي-اق ول بارلىق تاراپتاردى جىلدام جانە كونسترۋكتيۆتى شەشىمگە شاقىرىپ, «يادرولىق بەستىكتىڭ» كەلىسسوزدەر جاساۋ كەرەكتىگىن اتاپ ءوتتى. ن.نازارباەۆتىڭ ايتۋىنشا, قازاقستان كەلىسسوزدەر وتكىزۋگە الاڭ ۇسىنۋعا دايىن.
ءوز سوزىندە قازاقستان پرەزيدەنتى الەم بويىنشا بەيبىتشىلىك پەن قاۋىپسىزدىكتى قامتاماسىز ەتۋدەگى بۇۇ قاۋىپسىزدىك كەڭەسىنىڭ ءرولى زور ەكەنىن اتاپ ءوتتى. سونىمەن قاتار ول قازاقستان الەمدەگى ءتورتىنشى يادرولىق قارۋ ارسەنالىنان باس تارتقانىن, سەمەيدەگى الەمدەگى ەڭ ءىرى يادرولىق سىناق الاڭدارىنىڭ ءبىرىن جاپقانىن ەسكە سالدى. نۇرسۇلتان نازارباەۆتىڭ ايتۋىنشا, قازاقستان ورتالىق ازياداعى يادرولىق قارۋسىز ايماقتى قالىپتاستىرۋدا ماڭىزدى ءرول اتقاردى. قازاقستاننىڭ يادرولىق قارۋسىز الەم قۇرۋعا قوسقان تاعى ءبىر ۇلەسى – ماگاتە-مەن تومەن بايىتىلعان ۋران بانكىن قۇرۋ تۋرالى كەلىسىمى ەكەنى ءسوزسىز.
جيىندا ن.نازارباەۆ تاياۋ شىعىستا يادرولىق قارۋسىز ايماق قۇرۋعا شاقىردى. «كۇش يادرولىق بومبا مەن راكەتالاردا ەمەس. ولار كوپ بولسا دا, تولىعىمەن قورعان بولا المايدى. الەمدى تەك حالىقارالىق قوعامداستىقتىڭ سەنىمى قورعاپ قالا الادى», دەدى قازاقستان باسشىسى. سونداي-اق ول يادرولىق قارۋدى تاراتپاۋ رەجىمىنە باعىتتالعان بىرنەشە شارا ۇسىندى. «يادرولىق دەرجاۆالار ءبىز يادرولىق قارۋدى ۇستايمىز جانە ونى دامىتا بەرەمىز, ال باسقالارىنا تىيىم سالامىز دەسە, دۇرىس بولا ما؟ جوق, مەنىڭ ويىمشا, بۇل دۇرىس ەمەس», دەپ اتاپ ءوتتى ن.نازارباەۆ.
قازاقستان 2018 جىلعى قاڭتارداعى توراعالىعى مەرزىمىندە تابىستى جۇمىس ىستەپ جاتىر. قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋى جانە توراعالىق قىزمەتى الەمدىك قوعامداستىقتىڭ نۇرسۇلتان نازارباەۆتىڭ بەيبىتشىل ساياساتىنا دەگەن سەنىمىن كورسەتەدى.
THE NEW YORK TIMES
بىرىككەن ۇلتتار ۇيىمىنىڭ شتاب-پاتەرىندە قازاقستان پرەزيدەنتى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: سەنىم شارالارى» تاقىرىبى بويىنشا جوعارى دەڭگەيدەگى پىكىرتالاسى ءوتتى. جيىندا نۇرسۇلتان نازارباەۆ سەنىم احۋالىن قالىپتاستىرۋدىڭ جانە پحەنياننىڭ كەلىسسوز ۇستەلىنە ورالۋىنىڭ ماڭىزدى شارتى رەتىندە «يادرولىق بەستىكتىڭ» كحدر-ءدىڭ قاۋىپسىزدىگىنە كەپىلدىك بەرۋىن جاقتايتىنىن ايتتى. پرەزيدەنتتىڭ ايتۋىنشا, مۇددەلى تاراپتار قاجەت ەتكەن جاعدايدا, قازاقستان كەلىسسوز الاڭىن ۇسىنۋعا دايىن.
نۇرسۇلتان نازارباەۆ بۇۇ قاۋىپسىزدىك كەڭەسىنە يادرولىق قارۋدان باس تارتۋ ارقىلى قازاقستاننىڭ حالىقارالىق بەدەلىنىڭ ارتقانىن جەتكىزدى. ونىڭ ايتۋىنشا, سولتۇستىك كورەيانىڭ يادرولىق قارۋعا ۇمتىلۋىن اقش, رەسەي مەن قىتاي اراسىنداعى سەنىمدى نىعايتا وتىرىپ شەشۋ كەرەك.
FOREIGN BRIEF
قازاقستان وسى ايدا بۇۇ قاۋىپسىزدىك كەڭەسىنە توراعالىق ەتۋدە. نيۋ-يوركتە قازاقستان پرەزيدەنتى نۇرسۇلتان نازارباەۆتىڭ توراعالىعىمەن قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: سەنىم شارالارى» تاقىرىبى تالقىلاندى. ودان كەيىن كەڭەستە قازاقستاننىڭ توراعالىعىمەن اۋعانستانداعى تەرروريزم مەن ەسىرتكى ترافيگىنە قارسى كۇرەسكە بايلانىستى پىكىرتالاس ءوتتى.
كەڭەستىڭ قاڭتار ايىنداعى پرەزيدەنتى رەتىندە قازاقستان سولتۇستىك اۋعانستانداعى يسلام مەملەكەتى مەن تاليبتەردىڭ قاۋپىنە قارسى كۇرەسكە الاڭداۋشىلىق ءبىلدىردى. قاۋىپسىزدىكتى ەسكەرە وتىرىپ, استانا شيەلەنىسكە كەشەندى شەشىم تابۋ كەرەكتىگىن قولدايتىنىن ايتتى.
جيىندا بىلتىر اۋعانستانداعى ەسىرتكى ساۋداسى 87 پايىزعا جەتكەنى, ودان تۇسكەن قارجى «تاليبان» قىزمەتىن قارجىلاندىرۋعا جۇمسالعانى كولدەنەڭ تارتىلدى. قازاقستاننىڭ بۇۇ-داعى تۇراقتى وكىلى قايرات وماروۆ كەڭەستىڭ 15 ادامنان تۇراتىن دەلەگاتسياسىنىڭ اۋعانستانعا بارىپ كەلگەنىن اتاپ ءوتتى. ءبىر ايتا كەتەرلىگى, 7 جىلدان كەيىن العاش رەت ۇيىمداستىرىلعان بۇل ساپارعا بۇۇ قاۋىپسىزدىك كەڭەسىنىڭ قاڭتارداعى توراعاسى - قازاقستان باستاماشى بولدى.
دايىنداعان
گۇلنۇر قۋانىشبەكقىزى,
«ەگەمەن قازاقستان»
