بۇل ءدۇبىرلى دوداعا قازاقستاننان بارلىعى 62 ۇمىتكەر, سپورتتىڭ توعىز تۇرىنەن, ونىڭ ىشىندە شىعىس قازاقستاننان 17 ۇمىتكەر سپورتتىڭ ءتورت تۇرىنەن قاتىسادى دەپ جوسپارلانىپ وتىر. شىعىسقازاقستاندىق ساڭلاقتار نەگىزىنەن فريستايل (موگۋل), شاڭعى جارىسى, بياتلون جانە شاڭعى تەبۋ سياقتى سايىستاردا باق سىنايدى.
وبلىس اكىمىنىڭ ءباسپاسوز قىزمەتىنىڭ تاراتقان مالىمەتتەرىنە سۇيەنسەك, ءدۇبىرلى دودادا ۇلتتىق قۇراما ساپىندا شاڭعى جارىسىنان ەل قۇراماسىنىڭ كوشباسشىسى الەكسەي پولتورانين, بياتلونشى گالينا ۆيشنەۆسكايا, فريستايلدان يۋليا گالىشەۆا, دميتري رەيحەرد سىندى ساڭلاقتار ونەر كورسەتەدى. سونداي-اق, ۇلتتىق قۇرامانىڭ ەڭ جاس مۇشەلەرى اياۋلىم امىرەنوۆا مەن پاۆەل كالماكوۆتىڭ اق وليمپيادادا جۇلدە الۋعا مۇمكىندىكتەرى بار.
قازىر بارلىق سپورتشىلار جارىسقا جەكە جوسپار بويىنشا دايىندالۋدا.
ايماق باسشىسى دانيال احمەتوۆتىڭ تاپسىرماسىنا سايكەس وبلىستىق دەنەشىنىقتىرۋ جانە سپورت باسقارماسى بارلىق سپورتشىلارعا ايلىق ەڭبەكاقى تۇرىندە قولداۋ كورسەتۋدە.
ء«بىزدىڭ سپورتشىلار XXIII وليمپيادا ويىندارىندا جاقسى ناتيجە كورسەتەدى دەپ ۇمىتتەنەمىز. ارينە, حالىقارالىق جارىستاردا جۇلدە العان جاقسى, بىراق ەلىشىلىك جارىستارعا دا جەتە كوڭىل ءبولۋ كەرەك. ءبىزدىڭ وبلىستا سپورتشىلارعا قارجىلىق جاعىنان دا, كلۋبتىق دايارلىق جاعىنان دا قولداۋ جاقسى بولا تۇرا قىسقى سپورت تۇرلەرىنەن ەلىمىزدە وتكەن جارىستاردا ەكىنشى ورىنعا ءتۇسىپ قالدىق. نەگە؟ وسى ماسەلەنى جاۋاپتى باسقارما باقىلاۋىنا الىپ, ءتيىستى قورىتىندى شىعارۋى كەرەك», - دەدى دانيال احمەتوۆ.
ايتا كەتەيىك, ەلىمىزدە قىسقى سپورت تۇرلەرى بويىنشا سپارتاكيادا 2017 جىلدىڭ قاڭتار-ناۋرىز ايلارىندا وتكەن. بۇل جارىستا شىعىسقازاقستاندىق سپورتشىلار جالپىكوماندالىق ەسەپتە الماتىلىقتاردى العا جىبەرىپ, ەكىنشى ورىندى يەلەنگەن بولاتىن.
ازامات قاسىم,
«ەگەمەن قازاقستان»
