نيۋ-يوركتە بۇۇ قاۋىپسىزدىك كەڭەسىنىڭ وتىرىسى قارساڭىندا «قاۋىپسىزدىك پەن دامۋدىڭ ءوزارا تاۋەلدىلىك ۇلگىسى رەتىندە اۋعانستان مەن ورتالىق ازيادا ايماقتىق سەرىكتەستىك قۇرۋ» تاقىرىبىندا ورتالىق ازيا - قازاقستان, قىرعىزستان, تاجىكستان مەن وزبەكستان سىرتقى ىستەر مينيسترلەرىنىڭ كەزەكتى كەزدەسۋى ءوتتى. كەزدەسۋگە تۇرىكمەنستاننىڭ اتىنان بۇۇ جانىنداعى تۇراقتى وكىل قاتىستى.
قازاقستاندىق تاراپ 2017 جىلى قاۋىپسىزدىك كەڭەسىنىڭ قۇرامىنداعى جۇمىسىنا قولداۋ كورسەتكەندەرى ءۇشىن ورتالىق-ازيالىق ارىپتەستەرىنە العىس ايتتى.
اتالعان كەزدەسۋدە ورتالىق ازياداعى احۋال بويىنشا جان-جاقتى پىكىر الماسىپ, وڭىرلىك ىنتىماقتاستىقتى ودان ءارى دامىتۋ ماسەلەلەرى قارالدى.
مينيسترلەر ورتالىق ازيا ەلدەرىنىڭ 2018 جىلعا سىرتقى ساياسي ءىس-شارالارىنىڭ كۇنتىزبەسىن تالقىلادى.
دەلەگاتسيا باسشىلارى ايماقتىق جانە حالىقارالىق كۇن تارتىبىندەگى كوپتەگەن ماسەلەلەر بويىنشا ورتالىق ازيا ەلدەرى ۇستانىمدارىنىڭ سايكەس كەلەتىنىن اتاپ ءوتتى.
جيىندا وا ەلدەرىنىڭ اۋعانستانمەن ۇزاق مەرزىمدى ىنتىماقتاستىقتى دامىتۋعا دەگەن ۇمتىلىسى اتاپ ءوتىلدى.
كەزدەسۋ سوڭىندا سىندارلى ديالوگ پەن ءوزارا ءتيىمدى ىنتىماقتاستىق نەگىزىندە ايماقتىق ماسەلەلەردىڭ بىرلەسكەن شەشىمىن ازىرلەۋ بويىنشا بەسجاقتى ءوزارا ارەكەتتەستىكتى جانداندىرۋ تۋرالى كەلىسىمگە قول جەتكىزىلدى.
