قۇجاتتى قازاقستان سىرتقى ىستەر ءمينيسترى قايرات ءابدىراحمانوۆ رەسمي تۇردە جاريالادى.
ءىس-شارا بۇۇ-دا ۇلكەن قىزىعۋشىلىق تۋدىردى. جوبانى تانىستىرۋ مەن ونى تالقىلاۋعا 100-دەن استام ۇيىمعا مۇشە-مەملەكەت دەلەگاتسياسى قاتىستى. جوعارى دارەجەدەگى قاتىسۋشىلار اراسىندا كۋۆەيتتىڭ پرەمەر-ءمينيسترى - سىرتقى ىستەر ءمينيسترى شەيح ساباح ال-حالەد اس-ساباح پەن اۋعانستان سىرتقى ىستەر ءمينيسترىنىڭ ورىنباسارى حيكمەت كارزاي بولدى. بۇۇ كونترتەرروريستيك باسقارما باسشىسى - باس حاتشىنىڭ ورىنباسارى ۆلاديمير ۆورونكوۆ پەن بۇۇ باس حاتشىسىنىڭ ساياسي ماسەلەلەر جونىندەگى كومەكشىسى ميروسلاۆ ەنچا بايانداما جاسادى.
قازاقستانننىڭ سىرتقى ساياسي ۆەدومستۆوسىنىڭ باسشىسى ق. ءابدىراحمانوۆ وتىرىستى اشا وتىرىپ, قازاقستاننىڭ حالىقارالىق لاڭكەستىككە قارسى كۇرەسكە قوسقان ۇلەسى رەتىندە باستاماشىلىق جاساعان كودەكس بويىنشا جۇمىستىڭ ماقساتتارى مەن نەگىزگى مازمۇنىن اتاپ ءوتتى. قۇجاتتىڭ نەگىزگى ماقساتى - تەرروريزمنەن ازات الەم قۇرۋ ماقساتىندا 2045 جىلى بۇۇ-نىڭ ءجۇز جىلدىعىنا قول جەتكىزۋ جانە كونترتەرروريزم بويىنشا سەرىكتەس-ەلدەردىڭ كەڭ حالىقارالىق كواليتسياسىن قۇرۋ.
ۆ. ۆورونكوۆ قاۋىپسىزدىكتى قامتاماسىز ەتۋ جانە ونى تۇراقتى دامىتۋ جولىنداعى قازاقستاننىڭ قوسقان ۇلەسىن جوعارى باعالادى. سونداي-اق, ول بۇۇ قاۋىپسىزدىك كەڭەسىندەگى استانانىڭ ءرولى مەن جۇمىسىن اتاپ ءوتتى.
م. ەنچا ءوزىنىڭ بايانداماسىندا كونترتەرروريزم بويىنشا قازاقستان مەن بۇۇ ماقساتتارىنىڭ سايكەس كەلەتىنىن تىلگە تيەك ەتىپ, وسى باستامادا استاناعا ساتتىلىك تىلەدى.
اۋعانستان سىرتقى ىستەر ءمينيسترىنىڭ ورىنباسارى ءتارتىپ كودەكسىنىڭ جوباسىنا جوعارى باعا بەرىپ, حالىقارالىق ىنتىماقتاستىق پەن بۇۇ كونترتەرروريستىك ارحيتەكتۋراسىن نىعايتۋداعى ماڭىزدى قادام ەكەنىن اتاپ ءوتتى.
وتىرىستا ءسوز سويلەگەن قاۋىپسىزدىك كەڭەسىنىڭ مۇشە-ەلدەرى دەلەگاتسيالارى قازاقستاننىڭ باستاماسىن قولدادى جانە بولاشاقتا جوبانى جەتىلدىرۋ ماقساتىندا تالقىلاۋعا دايىن ەكەندىكتەرىن جەتكىزدى.
