مەكەمە بيىل دا وسى داستۇردەن جاڭىلعان جوق. كومپانيانىڭ ەلىمىزدىڭ ءار وڭىرىندە ورنالاسقان وندىرىستىك كەشەنىنىڭ ماماندارى بالالار ۇيىنە, كامەلەتتىك جاسقا تولماعاندارعا ارنالعان بەيىمدەۋ ورتالىقتارى مەن باسقا دا الەۋمەتتىك مەكەمەلەرگە ارنايى بارىپ, بالالارعا ءارتۇرلى ساحنالىق كورىنىستەر قويىپ, سىيلىقتار تاپسىردى.
وسكەمەن مەتاللۋرگيالىق كەشەنىنىڭ قىزمەتكەرلەرى مامانداندىرىلعان بالالار ءۇيىنىڭ تاربيەلەنۋشىلەرىنە ويىنشىقتار, ءتاتتى-دامدىلەر جانە اياق كيىم مەن كيىمدەردى تارتۋ ەتتى. بۇل مەكەمەدە بەس جاسقا تولماعان 79 بالعىن تاربيەلەنۋدە.
ريددەر كەن-بايىتۋ كەشەنىنىڭ جۇمىسشىلارى «سۆەتوچ» جەتىم بالالار ۇيىندەگى 30 وسكىنگە ارناپ ەرتەڭگىلىك ۇيىمداستىردى. «بالالار ءان سالىپ, تاقپاقتار ايتىپ, بيلەپ, ءتاتتى-دامدىلەر مەن ويىنشىقتار الىپ, قۋانىپ, ءبىر سەرپىلىپ قالدى. ولاردى شاتتىققا بولەۋ ءۇشىن ستسەناري جازىپ, كارناۆالدىق كوستيۋمدەر ازىرلەگەنىمىزدىڭ ءوزى ءبىر عانيبەت ءىس ەكەن», دەيدى ريددەر كەن-بايىتۋ كەشەنىنىڭ الەۋمەتتىك قولداۋ قىزمەتىنىڭ مامانى يرينا حولودۋلينا.
زىريانداعى كەن-بايىتۋ كەشەنىنىڭ قىزمەتكەرلەرى كوررەكتسيالىق مەكتەپ-ينتەرناتتىڭ تاربيەلەنۋشىلەرىنە ەرتەگى كەيىپكەرلەرى وبرازىندا كەلىپ, ەرەكشە قۋانىش سىيلادى. ەستۋىندە, ءسوز سويلەۋىندە كەمىستىگى بار بالالار كوڭىلدى شوۋعا قاتىسىپ, ءماز-مەيرام بولىپ قالدى. كورىنىس سوڭىندا قاتىسۋشىلاردىڭ بارلىعىنا سىيلىقتار تاپسىرىلدى. «اياز اتا ءرولىن بۇلايشا شىنايى سومداپ شىعامىن دەپ ويلاماعان ەدىم. ءار بالانىڭ جۇزىنەن: «بىزگە ناعىز اياز اتا ەكەنىڭىزدى پاش ەتىڭىزشى» دەگەن ءسوزدى وقىعانداي بولدىم. تولقىعانىم دا راس. سوندىقتان مەيىرىمدى, كەڭپەيىل, ناعىز اياز اتا بولۋعا تىرىسىپ باقتىم», دەيدى زىريانداعى كەن-بايىتۋ كەشەنى كەن بايىتۋ فابريكاسىنىڭ تاس ۋاتۋشىسى انتون ۋشاكوۆ.
ال «Altyntau Kokshetau» قىزمەتكەرلەرى ەرەكشە قاجەتتىلىگى بار جەتپىس بالا تاربيەلەنىپ جاتقان ارنايى الەۋمەتتىك قىزمەت كورسەتۋ ورتالىعىندا بولدى. بۇعان دەيىن مۇنداعى ءار بالا ءوز ارمان-تىلەكتەرىن ايتىپ, اياز اتاعا حات جازعان بولاتىن. «Altyntau Kokshetau» قىزمەتكەرلەرى ءار بالانىڭ ارمانىن ورىنداۋعا تىرىسىپ, بارلىق تاربيەلەنۋشىلەرگە سىيلىقتار ۇسىنىپ, ورتالىق باسشىلىعىنا مەكەمەگە قاجەتتى ءدارى-دارمەكتەردى تابىس ەتتى.
ازامات ءابىل
شىعىس قازاقستان وبلىسى
