بيىلعى جىلدىڭ العاشقى كۇندەرىنەن باستاپ ەلەكتروندى ۇكىمەتتىڭ www.egov.kz پورتالىندا جاڭا كومپوزيتتىك قىزمەت پايدا بولدى. قىزمەتتىڭ اتاۋى – «زاڭدى تۇلعالاردى مەملەكەتتىك تىركەۋ, بانكتىك شوت اشۋ جانە ءوزىنىڭ ەڭبەك (قىزمەتتىك) مىندەتتەرىن ورىنداۋ كەزىندە جازاتايىم وقيعالاردان جۇمىسكەردى مىندەتتى ساقتاندىرۋدى ەسكەرە وتىرىپ ولاردىڭ فيليالدارى مەن وكىلدىكتەرىن ەسەپتىك تىركەۋ».
اتالعان قىزمەتتىڭ ارتىقشىلىعى جونىندە ايتار بولساق, وسى ۋاقىتقا دەيىن ازامات زاڭدى تۇلعانى مەملەكەتتىك تىركەۋگە تۇرعىزعاننان كەيىن بانكتىك شوت اشۋ ءۇشىن مەملەكەتتىك تىركەۋگە الىنعانى تۋرالى انىقتامانى بانككە اپارۋى مىندەتتى شارت ەدى, بۇدان بولەك, جۇمىسكەرلەردى مىندەتتى ساقتاندىرۋعا الۋ ءۇشىن ساقتاندىرۋ كومپانياسىنا بارۋى قاجەت بولاتىن. ال ەندى بىرىككەن جاڭا كومپوزيتتىك قىزمەتتىڭ ارقاسىندا ازاماتتارعا ەكى كۇننىڭ ىشىندە ء(وتىنىش بەرگەن ۋاقىتتى ەسەپتەمەگەندە) زاڭدى تۇلعانىڭ مەملەكەتتىك تىركەۋگە الىنعانى تۋرالى كۋالىكتى, بانكتەگى شوتتىڭ ءنومىرىن, قىزمەتكەرلەردى جازاتايىم وقيعالاردان ساقتاۋ تۋرالى قول قويىلعان كەلىسىمشارتتى الۋ مۇمكىندىگى تۋدى.
بۇل قىزمەتتى پايدالانۋ جولدارىن تۇسىندىرە كەتسەك, زاڭدى تۇلعانى تىركەۋ بارىسىندا پايدالانۋشى eGov.kz پورتالىندا زاڭدى تۇلعا تۋرالى كەلەسى اقپاراتتى تولتىرادى: زاڭدى تۇلعانىڭ اتاۋى, قىزمەتكەرلەر سانى, جەتەكشى مەن قۇرىلتايشى تۋرالى مالىمەت جانە ت.ب. سونىمەن قاتار بارلىق قۇرىلتايشىلاردىڭ الدىن الا ەلەكتروندى ۇكىمەتتە تىركەلۋى (ەتسق بولۋى) شارت ەكەنىن ەسكە سالامىز, سەبەبى پايدالانۋشىنىڭ جەكە كابينەتىنە زاڭدى تۇلعانى تىركەۋگە الۋ تۋرالى وتىنىشكە قول قويۋعا سۇراتۋ كەلەدى.
ودان ءارى وسى جاڭا قىزمەتتىڭ شەڭبەرىندە پايدالانۋشىعا بانكتىك شوت اشۋعا جانە قىزمەتكەرلەردى جازاتايىم وقيعالاردان ساقتاۋ تۋرالى كەلىسىمشارت بەكىتۋ ۇسىنىلادى. ول ءۇشىن پايدالانۋشى بەرىلگەن تىزىمنەن بانك پەن ساقتاندىرۋشى كومپانيانى تاڭداپ, بەنەفيتسيارلاردى, قول قويۋعا قۇقىلى تۇلعالاردى كورسەتىپ, ساۋالدامانى تولتىرىپ, eGov.kz-تە كورسەتىلگەن قۇجاتتاردى تىركەۋ كەرەك.
بۇگىنگى تاڭدا اتالعان كومپوزيتتىك قىزمەتكە ەكى بانك – «ForteBank» اق جانە «تسەسنابانك» اق, سونىمەن قاتار «مەملەكەتتىك اننۋيتەتتىك كومپانيا» ءومىردى ساقتاندىرۋ كومپانياسى» اق قوسىلدى.
اقپارات جانە كوممۋنيكاتسيالار مينيسترلىگى «ەلەكتروندى ۇكىمەتتى» جانە مەملەكەتتىك قىزمەتتەردى دامىتۋ دەپارتامەنتى ديرەكتورىنىڭ ورىنباسارى نازگۇل باجاەۆا حابارلاعانداي, جاڭا كومپوزيتتىك قىزمەتكە قوسىلاتىن بانكتەر مەن ساقتاندىرۋ كومپانيالارىنىڭ سانى وسەدى, سونداي-اق ازاماتتاردىڭ جايلىلىعى مەن ەلىمىزدەگى بيزنەس-كليماتتىڭ جاقسارۋى ءۇشىن بيىلعى جىلى بىرنەشە جاڭا قىزمەت جۇزەگە اسىرىلادى. سونىمەن قاتار ن.باجاەۆانىڭ پىكىرىنشە, جاڭا قىزمەت قازاقستاننىڭ حالىقارالىق «Doing Business» رەيتينگىندەگى پوزيتسياسىن ارتتىرۋعا سەبەپ بولادى.
ەستەرىڭىزگە سالا كەتەيىك, دۇنيەجۇزىلىك بانكتىڭ «Doing Business» اتتى رەيتينگىندە قازاقستان كاسىپورىنداردى تىركەۋ, ەلەكترمەن جابدىقتاۋ, مەنشىكتى تىركەۋ, كەلىسىمشارتتاردىڭ ورىندالۋىن قامتاماسىز ەتۋ كريتەريلەرى بويىنشا كورسەتكىشتەرىن جاقسارتىپ, 36-ورىندا تۇر.
دايىنداعان
جولدىباي بازار,
«ەگەمەن قازاقستان»
