قازاقستان پرەزيدەنتى دوڭگەلەك ۇستەل قاتىسۋشىلارىمەن كەزدەسۋ ۇيىمداستىرىلعانى ءۇشىن ريزاشىلىق ءبىلدىردى.
نۇرسۇلتان نازارباەۆ قازاقستان مەن اقش اراسىندا ورنىققان قاتىناستاردىڭ ماڭىزدىلىعى مەن ستراتەگيالىق سيپاتىنا توقتالدى.
– امەريكا قازاقستان ەكونوميكاسىنا سالىنعان تىكەلەي ينۆەستيتسيالاردىڭ كولەمى بويىنشا ەكىنشى ورىندا. تاۋەلسىزدىك جىلدارى ىشىندە سىزدەردىڭ كومپانيالارىڭىز تاراپىنان قازاقستانعا 50 ميلليارد دوللاردان استام ينۆەستيتسيا قۇيىلدى. وتكەن جىلى ەكى ەل اراسىنداعى تاۋار اينالىمى 2 ميلليارد دوللارعا جەتتى. ءبىزدىڭ ەلدە ەنەرگەتيكا, كولىك, يننوۆاتسيا, مەديتسينا جانە باسقا دا سالالاردا امەريكا كاپيتالىنىڭ قاتىسۋىمەن 500-دەن اسا كومپانيا تابىستى جۇمىس ىستەپ كەلەدى. ءبىزدىڭ ءىرى سەرىكتەستەرىمىزدىڭ قاتارىندا شەۆرون, ەكسون موبيل, دجەنەرال ەلەكتريك, حەلليبيورتون جانە باسقا دا كومپانيالار بار, – دەدى نۇرسۇلتان نازارباەۆ.
مەملەكەت باسشىسى ەكى جاقتى قاتىناستاردىڭ كەڭ اۋقىمىن قامتيتىن كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەنى قابىلداۋدىڭ ەرەكشە ماڭىزدىلىعىن اتاپ ءوتتى.
سونداي-اق, نۇرسۇلتان نازارباەۆ قازاقستاننىڭ كولىك-ترانزيتتىك الەۋەتىن دامىتۋ ۇدەرىسىنە توقتالىپ, بيزنەس جۇرگىزۋ ءۇشىن مەملەكەت تاراپىنان جاعداي جاساۋعا باعىتتالعان شارالار جونىندە اڭگىمەلەدى.
– ينۆەستيتسيالىق احۋالدى جاقسارتىپ, ينۆەستورلاردىڭ قۇقىقتارىن قورعاۋ ءۇشىن تۇراقتى جۇمىستار جۇرگىزىلۋدە. قازاقستان ەكونوميكالىق ىنتىماقتاستىق جانە دامۋ ۇيىمىنىڭ ينۆەستيتسيالار جونىندەگى كوميتەتىنىڭ قاۋىمداستىرىلعان مۇشەسى بولدى جانە حالىقارالىق ينۆەستيتسيالار جونىندەگى دەكلاراتسياعا قوسىلدى. 62 ەلدىڭ, سونىڭ ىشىندە اقش ازاماتتارى ءۇشىن بىزدە ۆيزاسىز رەجىم ەنگىزىلدى. كاسىپكەرلىك سالاسىنداعى زاڭناما جەتىلدىرىلۋدە. 11 ارنايى ەكونوميكالىق ايماق جانە 22 يندۋستريالىق ايماق جۇمىس ىستەۋدە. وندا قاجەتتى ينفراقۇرىلىم مەن جەڭىلدىكتەر كوزدەلگەن, – دەدى قازاقستان پرەزيدەنتى.
سونىمەن قاتار, مەملەكەت باسشىسى قازاقستان ەكونوميكاسىن تسيفرلاندىرۋ جانە وندىرىسكە يننوۆاتسيانى ەنگىزۋ بارىسىنا ەرەكشە نازار اۋداردى.
– «تسيفرلىق قازاقستان» ارنايى مەملەكەتتىك باعدارلاماسى قابىلداندى. وسىعان وراي, ەكونوميكا سالالارىن تسيفرلاندىرۋ جانە يننوۆاتسيالىق ەكوجۇيەنى دامىتۋ جونىندەگى جوبالاردى جۇزەگە اسىرۋ ماڭىزدى بولىپ سانالادى. ماسەلەن, نازارباەۆ ۋنيۆەرسيتەتى جانە يننوۆاتسيالىق تەحنولوگيالار پاركى سياقتى يننوۆاتسيالىق كلاستەرلەر جۇمىس ىستەۋدە. بيىل استانادا ءىت-ستارتاپتاردىڭ جاڭا حالىقارالىق تەحنوپاركى اشىلادى. وسىنىڭ ءبارى ىنتىماقتاستىعىمىز ءۇشىن پەرسپەكتيۆتى باعىت بولا الادى, – دەدى نۇرسۇلتان نازارباەۆ.
قازاقستان پرەزيدەنتى امەريكالىق بيزنەسمەندەرگە ارنالعان سوزىندە اگروونەركاسىپ كەشەنىندەگى بىرلەسكەن جوبالاردى جۇزەگە اسىرۋ ءۇشىن شەتەلدىك ينۆەستورلاردى قاتىسۋعا شاقىردى.
بۇدان بولەك, مەملەكەت باسشىسى ەلىمىزدەگى جەكەشەلەندىرۋ باعدارلاماسىنىڭ ىسكە اسىرىلۋ بارىسى جانە «جاسىل ەكونوميكا» سالاسىنداعى جوبالاردى دامىتۋ پەرسپەكتيۆاسى تۋرالى ايتتى.
– وتكەن جىلى «بولاشاقتىڭ ەنەرگياسى» اتتى تاقىرىپتا حالىقارالىق «ەكسپو-2017» مامانداندىرىلعان كورمەسىن تابىستى وتكىزدىك. بۇل كورمە بۇكىل پلانەتانىڭ «تازا» ەنەرگەتيكا سالاسىنداعى جوعارى تەحنولوگيالىق جانە زياتكەرلىك الەۋەتىن كورسەتۋگە كەرەمەت مۇمكىندىك تۋعىزدى. كورمە مۇراسى يننوۆاتسيالىق جانە ورنىقتى دامۋ مىندەتتەرىنە ءارى قاراي دا قىزمەت ەتە بەرەتىن بولادى. اتاپ ايتقاندا, ەكسپو ينفراقۇرىلىمىنىڭ بازاسىندا «جاسىل» تەحنولوگيالاردى جانە ينۆەستيتسيالاردى دامىتۋ جونىندەگى حالىقارالىق ورتالىق جۇمىس ىستەيتىن بولادى. ول ەلىمىزدە جانە وڭىردە «جاسىل» جوبالاردى جۇزەگە اسىرۋعا سەپتىگىن تيگىزۋگە ارنالعان, – دەدى قازاقستان پرەزيدەنتى.
سونداي-اق, نۇرسۇلتان نازارباەۆ «استانا» حالىقارالىق قارجى ورتالىعىنىڭ ەرەكشە مارتەبەسىن اتاپ ءوتىپ, ونىڭ جۇمىسىنىڭ الداعى جوسپارلارىنا توقتالدى.
– «استانا» حالىقارالىق قارجى ورتالىعىنىڭ قاتىسۋشىلارىنا 50 جىلعا دەيىن سالىقتىق, ۆاليۋتالىق, ۆيزالىق جانە ەڭبەك رەجىمدەرى سياقتى جەڭىلدىكتەر بەرىلەدى. بۇل – جۇمىسى اعىلشىن قۇقىعىنا نەگىزدەلگەن وڭىردەگى بىردەن-ءبىر ورتالىق. «استانا» حالىقارالىق قارجى ورتالىعىنىڭ جوعارى تەحنولوگيالىق بيرجاسىن قۇرۋعا شانحاي قور بيرجاسى جانە NASDAQ امەريكالىق بيرجاسى تارتىلدى. «استانا» حالىقارالىق قارجى ورتالىعىنىڭ «جاسىل», يسلامدىق جانە يننوۆاتسيالىق قارجىلىق قۇرالداردى دامىتۋ جونىندەگى وڭىرلىك ورتالىققا اينالۋىنا بارلىق مۇمكىندىگى بار. جاز ايىندا ءبىز حالىقارالىق قوعامداستىق ءۇشىن «استانا» حالىقارالىق قارجى ورتالىعىنىڭ رەسمي تانىستىرىلىمىن وتكىزۋدى جوسپارلاپ وتىرمىز, – دەدى مەملەكەت باسشىسى.
سوڭىندا قازاقستان پرەزيدەنتى وتكىزىلگەن كەزدەسۋدىڭ ەكى ەلدىڭ جاقىنداسۋىنا جانە ءوزارا ءتيىمدى ارىپتەستىكتى نىعايتۋعا سەرپىن بەرەتىنىنە سەنىم ءبىلدىردى.
