رەسپۋبليكا اۋماعى بويىنشا 1600 رەسپوندەنت پەن دەموكراتيالىق كۇشتەر كواليتسياسىنىڭ ساراپشىلارى اراسىندا وتكەن سۇراۋ ناتيجەلەرىن ورتالىقتىڭ ديرەكتورى, الەۋمەتتانۋ عىلىمدارىنىڭ كانديداتى يۋليا كۋچينسكايا جانە سوتسيولوگيالىق زەرتتەۋلەر ءبولىمىنىڭ مەڭگەرۋشىسى, الەۋمەتتانۋ عىلىمدارىنىڭ كانديداتى سالتانات ەرماحانوۆا تانىستىردى.
يۋليا كۋچينسكايانىڭ ايتۋى بويىنشا, اتالعان زەرتتەۋ رۋحاني جاڭعىرۋ باعىتىندا جەتىستىككە قول جەتكىزۋ جانە پرەزيدەنتتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىن جۇزەگە اسىرۋ جولىندا قوعامدىق سانا جاي-كۇيىنىڭ ماڭىزدىلىعىنا نەگىزدەلگەن.
«ستسزو-نىڭ بليتس-سۇراۋىنا سايكەس, حالىقتىڭ 71,3 پايىزى پرەزيدەنتتىڭ جولداۋىنان حاباردار. ەندىگى مىندەت – جولداۋدىڭ مازمۇنىن بارىنشا تولىق اشىپ, حالىققا جەتكىزۋ بولماق. بۇل ورايدا الەۋمەتتىڭ كوڭىل كۇيىن ءتۇسىنۋ ماڭىزدى. وتكەن جىلدىڭ ءتورتىنشى توقسانى, سول سياقتى 2017 جىلدىڭ اعىمىندا قازاقستان حالقىنىڭ الەۋمەتتىك جاعدايى جالپى العاندا جاقسى كورسەتكىشكە يە. دەرەكتەرگە ۇڭىلسەك, تۇرعىنداردىڭ 86,2 پايىزىنىڭ كوڭىل كۇيى جاقسى. ساۋالناماعا قاتىسۋشىلاردىڭ پىكىرى بويىنشا, سوڭعى ءۇش اي ىشىندە ولاردىڭ ومىرىندە جاعىمسىز وقيعادان گورى, جاعىمدى وقيعالار 5,2 ەسەگە ارتقان. بۇل قوعامدىق كوڭىل كۇيدىڭ جالپى كورىنىسىن بەرەدى», دەدى يۋليا كۋچينسكايا.
سونداي-اق ول وتكەن جىلدىڭ سوڭعى توقسانىندا تۇرعىنداردىڭ كوڭىل كۇيىنە ەڭ كوپ اسەر قالدىرعان جايتتارعا دا توقتالىپ ءوتتى.
ورتالىق باسشىسى ويىن قورىتىندىلاي كەلە, تۇرعىنداردىڭ ەڭ وتكىر ماسەلەلەرى ۇشتىگىن دە اتاپ, سولاردىڭ العاشقىسى ماتەريالدىق پروبلەمالار ەكەنىن تىلگە تيەك ەتتى.
جيىنعا قاتىسۋشىلار الەۋمەتتىك كوڭىل كۇيدىڭ قالىپتى بولۋىنا ەلدەگى ەكونوميكالىق دامۋ مەن الەمدىك ساياساتتىڭ اسەرى دە تيەتىنىن جەتكىزدى.
راۋان قايدار,
«ەگەمەن قازاقستان»
