ەلباسىنىڭ يننوۆاتسيالىق تەحنولوگيانى ءبىرىنشى ورىنعا قويۋىنىڭ ءوز سەبەبى بار. دامىعان جاڭا تەحنولوگيانى قولدانۋعا ۇندەپ وتىر. ەلىمىزدە بىرقاتار ونەركاسىپتىك كاسىپورىندارىن تسيفرلاندىرۋدى قاناتقاقتى جوبا رەتىندە ىسكە اسىرىپ, بۇل تاجىريبەنى كەڭىنەن تاراتۋ كەرەك ەكەنىنە توقتالدى.
جولداۋدىڭ تاعى ءبىر ماڭىزدى تۇسى رەتىندە ناقتى سەكتوردىڭ جاڭا تەحنولوگيالارعا دەگەن سۇرانىسىن ىنتالاندىرۋدى جانە ۆەنچۋرلىق قارجىلاندىرۋدىڭ جەكە نارىعىنىڭ قىزمەتى جونىندەگى ناقتى تاپسىرمالاردى ايتۋعا بولادى. عالىمدار, ماماندار ءتۇرلى جاڭالىق ۇسىنىپ, ال ولارعا بيزنەستەن سۇرانىس بولماسا, وندا جاڭالىقتاردىڭ پايداسى شامالى. سوندىقتان مەملەكەت تاراپىنان ءتۇرلى قولداۋدى ەنگىزسەك بيزنەس سالاسى دا سوعان مۇددەلىلىك تانىتادى. ياعني وسى ارقىلى كاسىپكەرلىكتى جاڭا تەحنولوگياعا يتەرمەلەيمىز.
ەلباسى جولداۋدا جاسىل تەحنولوگياعا دا توقتالدى. وسى سالاعا ينۆەستيتسيا سالۋ ءۇشىن بيزنەستى ىنتالاندىرۋ جونىندە تاپسىرما بەردى. مەنىڭشە, بۇل ەڭ اۋەلى اۋىل شارۋاشىلىعىنا تىكەلەي كومەكتەسەدى. ءبىر مىسال كەلتىرەيىن. كورشى مەملەكەتتەرگە بارعاندا ونداعى تۇرعىنداردىڭ قازاقستاننان شىققان اۋىلشارۋاشىلىق ونىمدەرىن ساپالى سانايتىنىن بايقادىم. وسى ورايدا, ونىمدەردىڭ تازالىعىن ۇلتتىق برەند رەتىندە ۇتىمدى پايدالانىپ, جاسىل تەحنولوگيانى مۇقيات تۇردە اۋىل شارۋاشىلىعىمەن ينتەگراتسيالاعانىمىز ءجون.
قازىرگى تاڭدا الەمدى تولعاندىرىپ وتىرعان ماسەلە – قوقىستى ءتيىمدى پايدالانۋ. مۇنداي ماسەلە ءبىزدىڭ ەلدە دە بار. وڭىرلەردە پوليەتيلەن پاكەتتەردىڭ شاشىلىپ جاتقانىنا كۋا بولىپ ءجۇرمىز. تاياۋدا ەنەرگەتيكا ءمينيسترى قانات بوزىمباەۆ كەزەڭ-كەزەڭىمەن ونداي پاكەتتەردەن باس تارتاتىنىمىزدى مالىمدەدى. جالپى, ماسەلە پوليەتيلەن پاكەتىنە عانا قاتىستى ەمەس. ەلىمىزدە ءتۇرلى سالالاردان قالاتىن قوقىستار جەتەرلىك. سولاردى ءتيىمدى جۇمساۋ ماڭىزدى ماسەلە. وسى تۇرعىدان العاندا, جولداۋدىڭ جاسىل تەحنولوگياعا قاتىستى تارماعىنىڭ ماڭىزى ەرەكشە.
جولداۋدان اۋىل شارۋاشىلىعىنا اقىلدى تەحنولوگيالاردى پايدالانۋ قاجەتتىگى جونىندە وقىپ قاتتى قۋاندىم. ءبىز ءالى كۇنگە كەڭەس وداعىنان قالعان تەحنولوگيالاردى پايدالانا وتىرىپ جۇمىس ىستەيمىز. الايدا دامىعان ەلدەردەگى اگروتەحنولوگيا سالاسى الدەقايدا وزىپ كەتكەن. سوندىقتان ەلباسى ايتقانداي, جاڭا تەحنولوگيالاردى ترانسفەرتتەۋ ارقىلى اۋىل شارۋاشىلىعىن جاڭا دەڭگەيگە كوتەرەمىز.
ازات پەرۋاشەۆ,
پارلامەنت ءماجىلىسىنىڭ دەپۋتاتى
