سولاردىڭ قاتارىندا زاڭ ۇستەمدىگىنە ەرەكشە ماڭىز بەرىلدى. مەن 30 جىلدان استام سۋديالىق قىزمەتتە بولعان مامان رەتىندە ەلباسىنىڭ زاڭ ۇستەمدىگىنە ۇنەمى نازار اۋدارۋىنىڭ توركىنىن جاقسى تۇسىنەمىن. ءبىز 2030-2050 جىلدارعا ستراتەگيالىق دامۋ جوسپارىن قۇرىپ وتىرعان ەلمىز. وسى جىلدار ىشىندە ەلىمىزدى ەڭ دامىعان ەلدەر قاتارىنان كورگىمىز كەلەدى. ال وعان قول جەتكىزۋ ءۇشىن زاڭ ۇستەمدىگىن ورناتۋدىڭ ماڭىزى زور. ولاي بولماعان ەلدە – ەكونوميكالىق دامۋ بولمايدى. سوتتىڭ ادىلەتتى ءارى تاۋەلسىز بولۋى, قۇقىق قورعاۋ قىزمەتى سالاسىنىڭ نەعۇرلىم اشىق, قىزمەتى حالىققا قولايلى بولۋى دا باستى ماسەلە.
ەلباسى جولداۋدا سوت جانە قۇقىق قورعاۋ جۇيەلەرىن ينستيتۋتسيونالدى تۇرعىدان وزگەرتۋ جۇزەگە اسىرىلىپ جاتقانىن, زاڭناماعا قىلمىستىق پروتسەستەگى ازاماتتاردىڭ قۇقىقتارىن قورعاۋ ءىسىن كۇشەيتۋدى, ونىڭ اسىرە قاتاڭدىعىن باسەڭدەتۋدى كوزدەيتىن نورمالار ەنگىزىلگەنىن, ادۆوكاتتاردىڭ قۇقىقتارى مەن سوتقا دەيىنگى ساتىداعى سوت باقىلاۋىنىڭ اياسى كەڭەيگەنىن, قۇقىق قورعاۋ ورگاندارىنىڭ وكىلەتتىگى مەن جاۋاپكەرشىلىك شەگى ايقىندالعانىن ايتا كەلىپ, بولاشاقتا ازاماتتاردىڭ كونستيتۋتسيالىق قۇقىقتارىنا كەپىلدىكتى نىعايتۋ, قۇقىق ۇستەمدىگىن قامتاماسىز ەتۋ, قۇقىق قورعاۋ قىزمەتىن ىزگىلەندىرۋ جۇمىستارىن جالعاستىرۋ قاجەتتىلىگىن مىندەتتەپ وتىر.
مەن ەلباسى جولداۋىنداعى قوعامدىق ءتارتىپتى ساقتاۋ جانە قاۋىپسىزدىكتى قامتاماسىز ەتۋ سالاسىندا كوشەلەردە جانە ادام كوپ جينالاتىن قوعامدىق ورىنداردا بەينەباقىلاۋ جۇرگىزەتىن, ازاماتتاردى انىقتايتىن جانە جول قوزعالىسىن قاداعالايتىن ينتەللەكتۋالدى جۇيەلەردى بەلسەندى تۇردە ەنگىزۋ كەرەكتىگى تۋرالى تاپسىرماسىن بۇگىنگى كۇننىڭ قاجەتتىلىگى جانە ۋاقىت تىنىسىن ءدوپ باسقان شەشىم دەپ بىلەم. ولاي دەيتىنىم, وتكەن اپتادا مەن بىرقاتار ارىپتەستەرىممەن قىزىلوردا وبلىسىندا بولىپ, حالىقپەن جۇزدەستىم, پىكىرلەرىن تىڭدادىق. ساپار بارىسىندا جەدەل جانە ايقىن قۇقىقتىق قىزمەت كورسەتۋ ماقساتىندا قۇرىلعان قۇقىق قورعاۋ قىزمەتى ورتالىعىنىڭ جۇمىسىمەن تانىستىق. ازاماتتارعا قۇقىقتىق ماسەلەلەردى شەشۋدە كەشەندى تۇردە كومەك كورسەتەتىن بىلىكتى ماماندار – پروكۋرور, ادۆوكات, مەدياتور, اكىمدىك وكىلدەرى قىزمەت ەتەتىن ورتالىق قازىرگى زامانعى ينجەنەرلىك-تەحنيكالىق قۇرالدارمەن جابدىقتالعان. كەلۋشىلەرگە جايلى جاعداي جاسالعان.
سونداي-اق قالادا 500-گە جۋىق كامەرا جۇمىس ىستەيتىن بەينەباقىلاۋ جۇيەسىمەن تانىستىق. بۇل قۇرىلعىلار قىلمىس دەڭگەيىن تومەندەتۋگە ۇلكەن مۇمكىندىك بەرىپ وتىر. وسى جاڭالىقتى ەلىمىزدىڭ باسقا دا وڭىرلەرىنە كەڭىنەن تاراتۋدى ۇسىنعان ەدىك. بۇگىن تۋرا وسى, بەينەباقىلاۋ جانە باسقا دا ينتەللەكتۋالدىق جۇيەلەردى ەنگىزۋ ماسەلەسى جولداۋدا ايتىلعانىن كورىپ, ەلباسىنىڭ ەل تىنىسىن تەرەڭ سەزىنىپ وتىرعانىنا كۋا بولدىق.
ءبىز وسى وتكەن جىلى جەلتوقسان ايىندا عانا وسى قۇقىقتىق قورعاۋ ورگاندارىنىڭ قىزمەتىن جاڭعىرتۋ تۋرالى جاڭا زاڭ قابىلدادىق. زاڭنىڭ ماقساتى - ءاربىر ازاماتتىڭ - مەيلى ول ايىپتالۋشى, جابىرلەنۋشى, كۋا, شاعىمدانۋشى بولسىن بارىنشا ءتيىستى جاعداي جاساۋەكەنى ناقتىلاندى.
بۇل جاريالانعان جولداۋ – ءبىزدىڭ ەلىمىزدىڭ ودان ءارى قاراي الەۋمەتتىك, ەكونوميكالىق دامۋىنا سەرپىن بەرەتىن ماڭىزى زور جولداۋ دەپ ەسەپتەيمىن. پارلامەنت قابىلداعان زاڭدارى ارقىلى بۇل جولداۋدى جۇزەگە اسىرۋعا ەڭبەكتەنەدى دەپ سەنەمىن.
