«استانا» باسكەتبول كلۋبىنىڭ باس باپكەرى مىندەتىن اتقارۋشى بولىپ ميحايل كارپەنكو تاعايىندالدى.
ميحايل ۆلاديميروۆيچ كارپەنكو – رەسەيلىك مامان, 20 جىلدىق تاجىريبەسى بار باپكەر. ءوز مانسابىن كارپەنكو 1997 جىلى بالالار مەن جاسوسپىرىمدەر سپورت مەكتەبىندە باستاپ, وندا 10 جىل جۇمىس ىستەگەن. قىزمەتىندە م.كارپەنكو ساراتوۆتىڭ «اۆتودور» كاسىپقوي كلۋبىن باسقارعان, روستوۆ-نا-دونۋدىڭ «اتامان» باسكەتبول كلۋبىندا جۇمىس ىستەگەن. سوڭعى ءۇش ماۋسىمدا مامان اقتاۋلىق «كاسپي» كلۋبىندا بولىپ, وندا قازاقستاندىق باسكەتبولمەن, ويىنشىلارمەن جانە ۇلتتىق ليگا ەرەكشەلىكتەرىمەن تانىسقان. قازىرگى سپورت ماۋسىمىندا ميحايل كارپەنكو «استانا» باسكەتبول كلۋبى باس باپكەرىنىڭ اسسيستەنتى قىزمەتىندە بولعان.
سونىمەن قاتار, قازىرگى ۋاقىتتا مامان باسكەتبولدان قازاقستان ۇلتتىق قۇراماسىنىڭ باپكەرلىك شتابىن باسقارادى. كارپەنكونىڭ جەتەكشىلىگىمەن ۇلتتىق قۇراما وسى ماۋسىمدا الەم چەمپيوناتىنىڭ ىرىكتەۋ كەزەڭى اياسىنداعى بارلىق ماتچىن جەڭىلىسسىز وتكىزدى.
كوماندانى جانە ويىنشىلاردى جاقسى بىلۋىنە, كلۋبتىڭ نەگىزگى مىندەتتەرى مەن ماقساتتارىن تۇسىنۋىنە بايلانىستى, سونداي-اق, قازاقستان ۇلتتىق قۇراماسىنىڭ جاقسى كورسەتكىشتەرىنە بايلانىستى ميحايل كارپەنكو «استانا» باس باپكەرى مىندەتىن اتقارۋشى بولىپ تاعايىندالدى.
