قالادا بيىلعى كولىك رەفورماسى اياسىندا سىيىمدىلىعى ءارتۇرلى 388 اۆتوبۋس الىنعان. ولاردىڭ 195-ءى باعىتتار بويىنشا قىزمەت كورسەتۋدە. وعان قوسا قالاعا اكەلىنگەن سۋ جاڭا 200 اۆتوبۋس كەزەڭدەر بويىنشا جولعا شىعادى. ءوز كەزەگىندە جەكە تاسىمالداۋشىلار دا 254 جاڭا اۆتوبۋس العان, قازىرگى ۋاقىتتا ولاردىڭ 91-ءى قالا جولدارىندا.
سوڭعى مالىمەتتەرگە سۇيەنسەك, قالانىڭ اۆتوبۋس پاركىنىڭ 30 پايىزعا جاڭارۋى جانە باعىت جەلىسىنىڭ ۇلعايۋى جولاۋشىلار لەگىن 20,6 پايىزعا ارتتىرعان. ەگەر 2016 جىلى 174,6 ملن ادام تاسىمالدانسا, 2017 جىلى بۇل كورسەتكىش 220,1 ملن جولاۋشىعا ارتقان. «تاسىمالداۋشى جوسپارلى شىعۋدى قامتاماسىز ەتە الماسا, ينتەرۆال مەن جىلجىمالى قۇرامدى جاڭارتۋ «الماتىەلەكتروترانسقا» بەرىلەدى. مىسالى, №70 باعىتتا اۆتوبۋستار جاڭاردى, ينتەرۆال قىسقاردى, سونىڭ ارقاسىندا جولاۋشىلار لەگى 12 ەسە ءوستى, ياعني تاۋلىگىنە 395 ادامنان 4,6 مىڭ ادامعا دەيىن جەتتى. جاقىندا 18 مەترلى اۆتوبۋس-گارموشكالار №201 باعىتى بويىنشا جۇرە باستادى, ول كۇنىنە 11,6 مىڭ ادامدى تاسىمالداۋدا, بولجامداعى جولاۋشىلار لەگى – 25 مىڭ ادام», دەيدى جاۋاپتى ماماندار.
№12 باعىتى بويىنشا جولعا شىققان 12 مەترلى تومەن ەدەندى اۆتوبۋستار ەۋرو-5 ەكولوگيالىق سىنىپقا ساي, سىيىمدىلىعى 100 ادامنان جوعارى, كونديتسيونەرلەرمەن, بەينەباقىلاۋ كامەرالارىمەن, پاندۋستارمەن جانە باسقا دا قاجەتتى قۇرالدارمەن تولىق جابدىقتالعان. اتالعان باعىتتى «الماتىەلەكتروترانس» جشس ۇيىمداستىرعان. ماسەلەن, جاي كۇندەرى اۆتوبۋستار اراسىنداعى ينتەرۆال التى مينۋتقا قىسقارسا, دەمالىس كۇندەرى ەكى مينۋتقا ازايعان. بوساعان اۆتوبۋستاردى «Green Bus company» جشس №120 باعىتتى كۇشەيتۋ ءۇشىن پايدالانادى, كەيىن بۇل باعىت اينالمالى بولادى دەپ كۇتىلۋدە.
ەسكە سالساق, بۇعان دەيىن الماتىدا كولىكتى رەفورمالاۋ اياسىندا №22, 70, 86, 65, 103, 50, 126, 112 باعىتتارى بويىنشا جاڭا اۆتوبۋستار جولعا شىعىپ, №77 باعىت قايتا اشىلىپ, كولىكتەر №201 ماگيسترالدى باعىتى بويىنشا جۇرە باستاعان ەدى. كورشى وبلىستان قالاعا قوسىلعان ەلدى مەكەندەرگە تولىق كولىك قىزمەتىن كورسەتۋ ماقساتىندا سەگىز باعىت اشىلعان بولاتىن. شاھار تۇرعىندارى مەن قوناقتارىن مەدەۋمەن قاۋىشتىراتىن سۋ جاڭا الىپ اۆتوبۋستار ءيىر-قيىر جولدار مەن كىلت بۇرىلىستاردان ىركىلمەي ءوتىپ, دەمالۋشىلاردى دىتتەگەن جەرىنە امان-ساۋ جەتكىزبەك.
ارمان وكتيابر,
«ەگەمەن قازاقستان»
الماتى
