قايىرماداعى:
«قىزداردا دا قىزدار بار,
جارىلماعان قاۋىزداي,
جىگىتتە دە جىگىت بار,
توننىڭ ىشكى باۋىنداي»,
دەيتىن شۋماعى:
«قىزداردا دا قىزدار بار,
جارىلماعان قاۋىنداي,
جىگىتتە دە جىگىت بار, بازار توننىڭ (كەيدە, قامقا توننىڭ) باۋىنداي» دەلىنىپ ايتىلىپ ءجۇر.
بۇل جەردە قايىرمانىڭ ءبىرىنشى تارماعى قازاقتىڭ قىزعا بايلانىستى ايتاتىن «ون ەكىدە ءبىر گ ۇلى اشىلماعان» دەيتىن ءسوزىن ەسكە ءتۇسىرىپ تۇرعان جوق پا؟! جارىلماعان قاۋىزداي قىز دەپ وسى نەگىزدە ايتىپ وتىر. ونى ەندى ءارى قاراي تالداپ جاتپايىق. ال جىگىتتىڭ جىگىتىنە بايلانىستى ارنايى ايتۋعا بازار توننىڭ نەمەسە قامقا توننىڭ باۋىنىڭ قانداي كەرەمەتى بار؟ ايتا المايمىز. ەندەشە, ماتىندەگى توننىڭ ىشكى باۋى تۋرالى ايتالىق.
قاتال تابيعاتتا مال باعىپ ات ۇستىندە جۇرگەن قازاقتىڭ تونىنىڭ ىشكى باۋىنىڭ راحاتىن كورمەگەنى كەمدە-كەم شىعار.توننىڭ ىشكى باۋى – توننىڭ ىشىنەن, قولتىقتىڭ استىنان سۇيەم, ءيا, قارىس تومەن تاعىلاتىن باۋ. قارىن تۇستان ءسال جوعارى بايلانىپ توندى ارقاعا جابىستىرىپ تۇرادى. ونى باسقاشا دا تاعۋعا بولادى. توننىڭ ىشكى باۋى بايلانعاننان كەيىن جەلبەگەي سالىپ تا جۇرە بەرۋگە بولادى. قازىرگى كۇندە دە جەدەل جاردەم جانە وزگە دە وسىنداي قىزمەتتەردەگى كيىمدەردىڭ بارلىعى ىشكى باۋمەن بايلانادى. ال, «قامقا توننىڭ باۋىنداي» دەلىنىپ ايتىلىپ كەتۋىنىڭ ءبىر سەبەبىن «ىشكى باۋ كوبىنەسە قامقا تونعا تاعىلادى» دەلىنەتىن دەرەكتەرمەن ۇشتاستىرۋعا بولاتىن شىعار. ەندى ءمانى تۋرالى ايتالىق.
ىستەگەن يگى ءىسى كوزدەن گورى, كوڭىلگە كوبىرەك ءبىلىنىپ تۇراتىن جىگىتتەر بولادى. سىرت كوزگە كوبىرەك دوس سەكىلدى كورىنىپ, جانىڭا جىلۋ قاجەت ساتتە جاقىنداماي جوعالاتىن جالتاقتىقتان اۋلاق, ىشكى تىلەۋلەستىگى وراسان. جاساعان قىزمەتى دە ارزان اتاق نەمەسە باقاي ەسەپ ءۇشىن ەمەس, قايىرىمىن قۇدايدان كۇتكەن ىزگى تىلەكتى, ۇلكەن جۇرەكتى ەرلەر ولار. مىنە, جانىڭا وتە جاقىن, ناعىز (تانىڭە دە وتە جاقىن تۇراتىن) توننىڭ ىشكى باۋىنداي دوستىقتا بولاتىن جىگىت دەپ وسىلاردى ايتسا بولادى. بۇل – ءاننىڭ ءماتىنى بولىپ بىزگە جەتكەن ناعىز جىگىتتىڭ سىنى, دوستىقتىڭ سيپاتى بولاتىن.
ۇلاربەك نۇرعالىم ۇلى,
«ەگەمەن قازاقستان»
ءانشى ءاليا ابىكەنوۆانىڭ ورىنداۋىندا «گۇل-گۇل جاينا» ءانى
