بيىل بۇل جارىستا اقپاراتتىق تەحنولوگيالار سالاسىندا قىزمەت ەتىپ جۇرگەن ولجاس ايتبەك, يسلام مادەنيەت, داۋرەن مالاەۆ, اراي سابىرجان مەن سەرگەي تياننىڭ جولى بولدى. ەندى ولار جارتى جىلعا كرەمني جازىقتىعىنا تاجىريبە جيناقتاۋ ءۇشىن جولعا شىعادى.
بۇل بايقاۋعا قاتىسۋعا 43 ادامنان ءوتىنىم كەلىپ تۇسكەن. ونىڭ ىشىندە 19 اۆتور كەلەسى تۋرعا ءوتتى. ەكىنشى تۋرعا وتكەندەر ەكى تاراپتىڭ, ياعني قازاقستاندىقتار مەن وسى ىسكە مۇددەلىلىك تانىتىپ وتىرعان امەريكالىقتاردىڭ بىرلەسۋىمەن وتكەن اڭگىمەلەسۋگە قاتىستى. ناتيجەسىندە, جوعارىدا اتى اتالعان بەس ادام ىرىكتەلىپ, ءبىلىم گرانتتارىنا يە بولدى. بۇل گرانت تاجىريبە جيناقتاۋشىلاردىڭ بارلىق شىعىندارىن وتەيدى.
ايتقانداي, بۇل بايقاۋ بيىل ەكىنشى رەت ۇيىمداستىرىلىپ وتىر. ونىڭ جەڭىمپازدارىنىڭ باعدارلامالاۋ, مالىمەتتەر بازاسىن جوسپارلاۋ ماشىقتارى وتە جوعارى.
وتانداستارىمىزدىڭ اربىرەۋىنە ەكى امەريكالىق ستارتاپتان تالاسىپ وتىر دەسەك تە بولادى. ولاردىڭ ىشىندە Amplifylive, Hexa, Vimchat, 11sight, Powr سىندى الپاۋىتتار دا بار.
– جەڭىمپازداردىڭ كەيبىرىمەن جۇمىس ىستەپ ۇلگەردىك. ءبىز ستارتاپتاردى تاڭداپ بىتكەن سوڭ ۆيزا ماسەلەسىن شەشۋمەن اينالىسامىز. ءبىز ءۇشىن ولاردىڭ تاجىريبەسىن ءوز ەلىندە پايدالانىپ, امەريكالىقتارمەن دە ارىپتەستىكتى ۇزبەي, قازاقستانعا قايتىپ ورالعانى اسا ماڭىزدى, – دەيدى وسى بايقاۋدى ۇيىمداستىرعان اكادەميك شاحماردان ەسەنوۆ اتىنداعى عىلىمي-ءبىلىم بەرۋ قورىنىڭ باعدارلامالار مەنەدجەرى يلزيرا الداعاروۆا.
ءوز كەزەگىندە العاشقى بايقاۋداعى جەڭىمپازداردىڭ جوعارى بىلىكتىلىگىنە كوزدەرى جەتكەن امەريكالىق تاراپ تا جاقسى پىكىر ءبىلدىرىپ وتىر.
– ءبىز قازاقستانمەن 2016 جىلدان باستاپ جۇمىس ىستەي باستادىق. سول كەزدە جەڭىمپازدار اراسىنان اباي نۇسىپبەكوۆتى تاڭداپ, ول بىزبەن بىرنەشە اي جۇمىس ىستەدى. ونىڭ كاسىبي دەڭگەيى وسكەنى سونشالىقتى, ناتيجەسىندە ابايدى تولىق جۇمىس كۇنىنە قىزمەتكە جالدادىق. ول قازىر قازاقستاندا وتىرىپ, ءبىزدىڭ ينجەنەرلىك ءبولىمدى باسقارادى. بيىل ەكىنشى رەت اتالمىش قورمەن ارىپتەستىك اياسىندا جەڭىمپازداردىڭ ايرىقشا قابىلەتىنە قايران قالىپ وتىرمىز. مۇمكىندىك بولسا, ءبارىن دە قىزمەتكە شاقىرار ەدىك. ءىس جۇزىندە ارقايسىسى كەز كەلگەن كومپانيادا جۇمىس ىستەي الادى, – دەيدى AmplifyLive نەگىزىن قالاۋشىلاردىڭ ءبىرى ءارى باس ديرەكتورى برايان كەنتي.
قازىرگى تاڭدا العاشقى بايقاۋدىڭ ءۇش جەڭىمپازى قازاقستاننان جىراقتاعى ستارتاپتاردا جۇمىستارىن جالعاستىرۋدا. ال ايگۇل يماديلداەۆا تىكەلەي جازىقتىقتىڭ وزىندە قىزمەت ەتۋدە.
وسى ارادا امەريكالىقتاردىڭ كەلەسى بايقاۋدى وتكىزۋگە ايگۇلدىڭ تىكەلەي ىقپال ەتكەنىن ايتا كەتكەن ءجون. سان-فرانتسيسكودان ءبىر-اق شىققان جەرلەسىمىز ءوزىنىڭ كوماندادا مىقتى باعدارلاما ازىرلەۋشى ەكەنىن دالەلدەگەن. وسىنداي تابىستى ارىپتەستىكتەن كەيىن POWr ستارتاپىنىڭ HR مامانى ماككەنزي رينگ قازاقستانمەن جۇمىس جاساۋدى جالعاستىرۋعا شەشىم قابىلداعاندارىن ايتادى.
ايناش ەسالي,
«ەگەمەن قازاقستان»
الماتى
