ءبىزدىڭ ستۋدەنتتەر قاۋىمىنا بۇل كىتاپ كۇندەلىكتى قولداناتىن قۇندى وقۋلىق تا دەر ەدىم. ويتكەنى ءبىزدىڭ تاۋەلسىزدىگىمىزدىڭ تاريحى قامتىلعان, بولاشاعىمىزدى بەلگىلەپ بەرگەن كىتاپ. بۇگىندە ەگەمەن ەلدىڭ ەنتسيكلوپەدياسى دەپ باعالانعان, تاريحي پۋبليتسيستيكا جانرىندا جازىلعان تۋىندىدا جاس مەملەكەتتىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن 26 جىلدىق داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى باياندالادى. «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋتسياسى, باستى ۇستانىمدارىمەن قوزعاۋشى كۇشتەرى جان-جاقتى سارالانعان. قازاقستاندى جاڭعىرتۋدىڭ ءۇش تولقىنى كەڭىنەن اشىپ كورسەتىلگەن. جالپى تۋىندى اۆتورىنىڭ ءوزى ايتقانداي, كىتاپ كەمەل كەلەشەككە ءوزىنىڭ قازاقستاندىق جولىمەن قارىشتاعان جاسامپاز حالىققا ارنالعان. سونداي-اق ەلباسى جۋىردا جۋرناليستەرگە بەرگەن سۇحباتىندا كىتاپتى ءوزىنىڭ جەكە تاجىريبەلەرىنەن تۇيگەن نەگىزدى ويلارىنا سەنە وتىرىپ جازعانىن ايتىپ ءوتتى. ەلىمىز شيرەك عاسىردىڭ ىشىندە قالىپتاسقان ۇلتتىق مەملەكەتتىگى, ءتيىمدى نارىقتىق ەكونوميكاسى, دەموكراتيالىق قوعامدىق قۇرىلىسى مەن حالىقارالىق جوعارى بەدەلى بار زاماناۋي مەملەكەتكە اينالدى. قول جەتكىزگەن جەتىستىكتەرىمىزدىڭ بارلىعى اسا كورەگەندىلىكپەن جۇرگىزىلگەن رەفورمالار مەن يننوۆاتسيالاردىڭ ناتيجەسى.
ەلىمىزدىڭ جاڭا تاريحى تۇتاس قامتىلعان, مازمۇنى اسا باي كىتاپتىڭ ءار ءبولىمىنىڭ اتاۋلارىنا دا ەرەكشە ءمان بەرىلىپ, قازاقستاندىق قۇندىلىقتاردىڭ داۋىرلىك وقيعالارى ناقتى ءارى ءدال سۋرەتتەلگەن. ەلىمىزدىڭ جارقىن ساتتەرى باياندالعان. ەلباسى تۋىندىسىنداعى: «قازاقستاندى جوعارى دامىعان مەملەكەتكە اينالدىراتىن – ازات ويلى, جاڭاشىل دا جاسامپاز ازاماتتارى. ول ءۇشىن اركىم جان-جاقتى جانە كەمەل بىلىمگە دەن قويىپ, قاجىرلى ەڭبەك پەن ءوزىن-ءوزى تولاسسىز جەتىلدىرۋدى ءومىر سالتىنا اينالدىرۋى قاجەت», دەگەن ونەگەلى سوزدەرى دە اسىرەسە جاستاردى جىگەرلەندىرىپ, كەمەل ىستەرگە جەتەلەيدى. سوندىقتان دا جاڭعىرۋ جولىنا تۇسە العان قازاق ەلىنىڭ جاڭا داۋىردەگى دامۋ تاريحى كەڭىنەن تارقاتىلعان بۇل ەنتسيكلوپەديانى, اسىرەسە جاستارعا دارىپتەۋ ماڭىزدى. قازاقستاننىڭ جاڭا تاريحىنان سىر شەرتەتىن, ءاربىر داتا, وقيعا ناقتى كورسەتىلگەن تۋىندى ۋاقىت وتە كەلە ەل تۋرالى تاپتىرماس تانىمدىق وقۋ قۇرالىنا اينالارى ءسوزسىز.
ساتتار قۋاشباي,
ەكونوميكا عىلىمدارىنىڭ دوكتورى, پروفەسسور, وڭتۇستىك قازاقستان وبلىستىق ءماسليحاتىنىڭ دەپۋتاتى
