– ماردان بىلتىر قولا جۇلدەگە قول جەتكىزدىڭدەر. وتكەن جىلعا وكپە جوق شىعار. قولانى قاناعات تۇتتىڭىزدار ما, الدە ودان دا جاقسى ناتيجەگە جەتۋگە بولار ما ەدى؟
– كوپ راحمەت. كلۋب باسشىلارىنىڭ ماۋسىم الدىندا قويعان تالاپتارىن ورىندادىق دەپ ويلايمىن. ارينە, وڭاي بولعان جوق. قازىرگى قازاق فۋتبولىندا «استانا» مەن «قايراتقا» قايرات كورسەتۋ قيىن. قوس كلۋبتىڭ قارجىلىق مۇمكىندىگى, قۇرامىنداعى فۋتبولشىلاردىڭ دەڭگەيى, الەۋەتى قالعان كوماندالاردان الدەقايدا جوعارى. مۇنى مويىنداۋعا ءتيىسپىز. بىزگە «ەرتىس» پەن «توبىلدى» تىزە بۇكتىرۋ ماڭىزدى بولدى. بارلىق ويىنداردا مۇمكىندىگىنشە ۇپاي جوعالتپاۋعا كۇش سالدىق. شۇكىرشىلىك ەتەمىز. قولاعا قولداۋ كورسەتكەن قالىڭ جانكۇيەرلەرىمىزدىڭ ارقاسىندا قول جەتكىزدىك.
– «ورداباسى» ەۋروپا ليگاسىنىڭ ىرىكتەۋ كەزەڭىندە ەكى جىل قاتارىنان ءساتسىز ويناپ كەلەدى. سەبەبى نەدە دەپ ويلايسىز؟
– راس. ءساتسىز وينادىق. «شيروكي بريەگ» كومانداسىن جەڭۋگە ءتيىس ەدىك. سونشالىقتى مىقتى قارسىلاس ەمەس-تۇعىن. فۋتبول بولعان سوڭ جەڭىس تە, جەڭىلىس تە قاتار جۇرەدى. بيىلعى ماۋسىمدا بۇل ساتسىزدىكتى بولدىرماۋعا تىرىسامىز. «استانا» كومانداسى سەكىلدى قازاق جانكۇيەرلەرىن جەتىستىكتەرىمىزبەن قۋانتقىمىز كەلەدى.
– «استانا» دەمەكشى, ەلوردا كلۋبىنىڭ جەتىستىكتەرىن قالاي باعالايسىز. باسقا كوماندالارىمىزعا ەۋروپا الاڭدارىندا جوعارى دەڭگەيدە ويناۋعا نە كەدەرگى؟
– بىرىنشىدەن, ەلوردا ۇجىمىنىڭ ەۋروپا ليگاسىنىڭ 1/16 كەزەڭىنە ءوتۋى كەرەمەت جەتىستىك. «سلاۆيامەن» بولعان ويىندى كوردىك. جانكۇيەر بولدىق. قازاق كومانداسى مىقتىلاردىڭ قاتارىنا قوسىلعانىنا قۋاندىق.
ەكىنشىدەن, بۇل باسقا كوماندالارىمىزعا سەرپىن بەرەدى دەپ ويلايمىن. «قايراتتى» دا بولاشاقتا بيىكتەردەن كورەتىنىمىز انىق. ءبىزدىڭ اۋىلدا دا ىرگەلى جەڭىستەر بولادى دەپ ۇمىتتەنەمىن. سول ماقساتتا بار كۇش-جىگەرىمىزدى سالۋعا دايىنبىز. وتكەن ويىنداردان قورىتىندى شىعارىپ, بيىلعى جىلى بارىنشا بيىك بەلەستەردى باعىندىرۋعا جۇمىس ىستەيمىز.
– ماردان, ەندى جەكە ءوزىڭىزدىڭ ويىندارىڭىزعا توقتالساق. ماۋسىمدا 26 ويىن وتكىزىپ, ءتورت گول سوقتىڭىز. ويىندارىڭىزعا كوڭىلىڭىز تولا ما؟
– بىرجاقتى جاۋاپ بەرۋ قيىن. ءساتتى دە, ءساتسىز دە كەزدەسۋلەر بولدى. نەگىزى, قالاي ويناعانىمنىڭ ناقتى باعاسىن فۋتبول جانكۇيەرلەرى بەرەدى دەپ ويلايمىن. باپكەر مەن جانكۇيەرلەردىڭ سەنىمىنەن شىعۋ ءۇشىن وينايمىز. جەكە ءوزىمىنىڭ كورسەتكىشتەرىمدى ەمەس, كوماندامىزدىڭ جەڭىسىن باستى نازاردا ۇستايمىن. ەگەر مۇمكىندىك بولىپ جاتسا, گول سوعۋعا دا تىرىسامىن.
– بارلىق گولدارىڭدى ايىپ دوبىن ورىنداۋ ارقىلى سوعىپسىڭ. كەرەمەت. ايىپ دوبىن سوعۋدىڭ سىرلارىمەن بولىسسەڭ. ارنايى جاتتىعۋ جاسايتىن بولارسىڭ؟
– سىرى جوق (ك ۇلىپ). جاسىرمايمىن, جاتتىعۋدان سوڭ, ءوزىم قالىپ جارتى ساعاتتاي دايىندىعىمدى پىسىقتايمىن. جالپى, جاتتىعۋسىز ەشقانداي ناتيجەگە قول جەتكىزۋ مۇمكىن ەمەس. مەنىڭشە, بارلىعى ەڭبەكتىڭ ارقاسىندا كەلەدى. سوندىقتان شەبەرلىگىمدى ارتتىرۋ ءۇشىن قوسىمشا ەڭبەكتەنەمىن.
– اڭگىمەڭىزگە راحمەت.
اڭگىمەلەسكەن
ەركەبۇلان جومارت,
«ەگەمەن قازاقستان»
