ورىس ميسسيونەرى, پروفەسسور ن.يلمينسكيي بۇراتانا حالىقتى ورىسشا وقىتىپ, بىرتە-بىرتە ءوز انا ءتىلىن ۇمىتتىرىپ, شوقىندىرۋدى ويلاستىرىپ ءجۇرىپ, ءوزى قازاق ءتىلىن ۇيرەنۋگە قۇشتار بولعان. قازاق ءتىلىن سۇيگەنى سونداي, ونى جاقسى مەڭگەرىپ, گرامماتيكاسىن جاساپ, سوزدەرىن قۇراستىرعان تۇڭعىش عالىم. ونىڭ جاس ىبىرايعا جاساعان قامقورلىعى دا ءبىر توبە.
ىبىرايدىڭ اكەسى التىنسارىنى بالعوجا ءبيدىڭ اۋىلىن شاپقان كەزدە كەنەسارى جاساعى ءولتىرىپ كەتكەنى تاريحتان بەلگىلى. سوعان قاراماستان ىبىراي دا كەنەسارى مەن ناۋرىزباي تۋرالى اڭىز اڭگىمە جازىپتى. بۇل تۋىندىنى جاقىندا 1901 جىلى جارىق كورگەن «تۋرگايسكايا گازەتانىڭ» 21 نومىرىنەن تاپتىق. اڭىز سوڭىندا «ي.ا.» دەپ قول قويىپتى. بۇل – ى.ءالتىنساريننىڭ بۇركەنشىك اتى. «ورەنبۋرگسكي ليستوك» گازەتىندە شىققان پۋبليتسيستيكالىق ماقالالارىنىڭ سوڭىنا دا ۇلى ۇستاز وسىلاي قول قويعان.
راس, 1901 جىلى ىبىراي بۇل دۇنيەدەن ءوتىپ كەتكەن بولاتىن. الايدا, قايتىس بولعاننان كەيىن دە شىعارمالارى جارىق كورە بەرمەي مە؟! «ي. ا.» باسقا بىرەۋدىڭ اتى مەن تەگىنىڭ العاشقى ارىپتەرى شىعار دەپ ىزدەستىرىپ كورىپ ەدىك, تابا قويمادىق. ونىڭ ۇستىنە ول كەزدە (ىبىراي زامانىندا) ورىس تىلىندە مۇنداي شىعارما جازا الاتىن ادام قازاق دالاسىندا جوقتىڭ قاسى ەدى. كەنەسارى-ناۋرىزباي تاريحىنىڭ تاسقا باسىلۋىن, ەل ەسىندە قالۋىن ويلاعان كەمەڭگەر ۇستاز اكە ءولىمىن دە كەشىرگەندەي عوي. اسىلى, ىزگىلىك قاتالدىقتان مىقتى ما دەيسىڭ...
سەرىكباي وسپان ۇلى,
اقىن, قوستاناي مەملەكەتتىك پەداگوگيكالىق
ينستيتۋتىنىڭ پروفەسسورى
