كوشەدە دابىلداتقان «جەدەل جاردەم» كورە قالساق, «كىمنىڭ كەلىنى تۋعالى جاتىر ەكەن؟», دەپ جاقسىلىققا جورىعىش قاسيەتىمىز بار عوي. كولىك كىلتتەرىن تابىستاعان وبلىس اكىمى دە اق حالاتتىلاردىڭ الدىندا سويلەگەن ءسوزىن وسى توڭىرەكتەن باستادى.
– جىل قورىتىندىسى وبلىسىمىز ءۇشىن تابىستى بولىپ وتىر. كورسەتكىشتەر وتە جاقسى. سىزدەردىڭ ارقالارىڭىزدا وبلىسىمىزدا دەموگرافيا دا قارىشتاپ دامۋدا. جىل سايىن 50-55 مىڭ نارەستە دۇنيە ەسىگىن اشادى. ءتىپتى قاسكەلەڭدەگى اۋرۋحانادا سابيلەردىڭ كوپتەپ دۇنيەگە كەلۋىنەن دارىگەرلەردىڭ جۇمىسى قاربالاس بولىپ تۇر. بۇل ۇلكەن قۋانىش! وسىعان وراي كەلەسى جىلى ۇزىناعاشتان جاڭا ەمحانا سالىنادى. بيىل مەكتەپ تابالدىرىعىن 49 مىڭعا جۋىق وقۋشى اتتاعان. وسىعان وراي جاڭا تەحنيكامەن قامتاماسىز ەتىپ جاتىرمىز. كەلەسى جىلدان باستاپ وبلىسىمىزدا زاماناۋي قۇرال-جابدىقتارمەن قامتىلعان اۋرۋحانالار مەن ەمحانالار سالىنادى. بۇگىنگى كۇنى اسا كۇردەلى وپەراتسيالاردى وبلىستا ءوز دارىگەرلەرىمىز جاساي باستادى جانە شەتەلدە بىلىمدەرىن جەتىلدىرۋگە مۇمكىندىك الدى. تەك سوڭعى 3 جىلدا 50-دەن استام دارىگەر ۇلىبريتانيا, وڭتۇستىك كورەيا, لاتۆيا, پولشا, يزرايل, تۇركيا سىندى الىس شەتەلدەردە ءبىلىمىن جەتىلدىردى. ەلباسىنىڭ باسشىلىعىمەن اتقارىلعان وسى يگى شارالاردىڭ ءبارى دە سىزدەردىڭ بولاشاققا سەنىممەن قاراپ, الاڭسىز ەڭبەك ەتۋلەرىڭىزگە جاسالعان جاعداي دەپ بىلىڭىزدەر, – دەدى اماندىق باتالوۆ.
سوڭعى جىلدارى ەمدەۋ مەكەمەلەرىنە 218 سانيتارلىق اۆتوكولىك كىلتى تابىستالعان. ال سول ساندى تولىقتىرىپ وتىرعان 51 كولىكتى ساتىپ الۋعا وبلىستىق بيۋدجەتتەن 640 ميلليون تەڭگە قارجى جۇمسالعان. ونىڭ 33-ءى سانيتارلىق, 18-ءى جەلىلىك, رەانيماتسيالىق جانە كارديو-رەانيماتسيالىق بريگاداعا ارنالعان كولىكتەر. اۋداندار مەن قالالارعا قاجەتتىلىككە ساي ۇلەستىرىلەتىن بولادى.
الماس ءنۇسىپ,
«ەگەمەن قازاقستان»
الماتى وبلىسى
