تاياۋدا ەكاتەرينا دۆورەتسكايا ەسىمدى 19 جاستاعى ارۋ «قاراعاندى ارۋى-2017» بايقاۋىندا جەڭىمپاز اتانىپ, بايگەدە ەنشىلەگەن جارتى ميلليون تەڭگە قارجىنى بالالار ۇيىندەگى جەتىم بالالارعا اۋدارماققا نيەت ەتكەن بولاتىن. ەكاتەرينا ۋادەسىندە تۇرىپ, تاۋەلسىزدىك كۇنىنە وراي بالالارعا سىيلىق جاسادى.
«3 جىل بۇرىن «تاڭشولپان» بالالار ۇيىنە ەرىكتى رەتىندە كەلگەن ەدىم. سوندىقتان اقشالاي سىيلىقتى العاننان كەيىن, ونى بالالارعا سىيلاۋدى ۇيعاردىم», دەيدى دۆورەتسكايا.
مەكەمەنىڭ وقۋ ءىسى بويىنشا ديرەكتورىنىڭ ورىنباسارى گۇلميرا مايقامباەۆانىڭ سوزىنشە, ولار سىيعا بەرىلگەن اقشاعا فوتواپپارات, مۋزىكالىق اسپاپتار مەن ۇيىرمە جۇمىسىنا ارنالعان ماتەريالدار الماق.
ايتا كەتەيىك, دۆورەتسكايا بۇگىندە الماتىداعى جوعارى وقۋ ورىندارىنىڭ بىرىندە حالىقارالىق قاتىناستار ماماندىعى بويىنشا ءبىلىم الۋدا. اتالعان بايقاۋعا ول تەمىرتاۋ قالاسىنىڭ اتىنان قاتىسقان بولاتىن.
ميراس اسان,
«ەگەمەن قازاقستان»
قاراعاندى وبلىسى
