ەلباسى ۇلت جوسپارى – بەس ينستيتۋتتىق رەفورمانى جۇزەگە اسىرۋ جونىندەگى «100 ناقتى قادامدا» يندۋستريالاندىرۋ جانە ەكونوميكالىق ءوسىم تۋرالى ايتقان بولاتىن. ءوز كەزەگىندە وڭىرلەرگە ينۆەستيتسيا تارتۋ, جۇمىس ورىندارىن اشۋ دا ەگەمەن ەلدىڭ ەرەكشە قارىمىن ايقىندايتىن ۇردىسكە اينالۋدا. وسى ورايدا جامبىل وبلىسىندا وتكەن ءتورت جىلدىڭ جانە اعىمداعى جىلداعى ون ايدىڭ كولەمىندە 1096,9 ميلليارد تەڭگەگە ينۆەستيتسيا تارتىلىپتى. ال قازاقستان رەسپۋبليكاسى يندۋستريالىق-يننوۆاتسيالىق دامىتۋدىڭ 2015-2019 جىلدارعا ارنالعان مەملەكەتتىك باعدارلاماسى اياسىندا وڭىردە كاسىپكەرلىكتى قولداۋ كارتاسى بويىنشا جالپى قۇنى 568 ميلليارد تەڭگەنى قۇرايتىن 36 ينۆەستيتسيالىق جوبا جۇزەگە اسىرىلۋدا. اتالعان جوبالاردى ىسكە اسىرۋ بارىسىندا قۇرىلىس جۇمىستارى كەزەڭىندە 6951, ىسكە قوسىلۋ كەزەڭىندە 6085 جاڭا جۇمىس ورنىنىڭ اشىلۋى جوسپارلانۋدا.
مۇنداعى ءاربىر جوبانىڭ ءوڭىر دامۋىنا عانا ەمەس, مەملەكەتتىڭ ورلەۋىنە دە قوساتىن ۇلەسى از ەمەس. ماسەلەن, وڭىردە قىتاي, رەسەي, ۇلىبريتانيا, نيدەرلاند, فرانتسيا, چەحيا, يتاليا, يران, گەرمانيا, تۇركيا, جاپونيا, بىرىككەن اراب امىرلىكتەرى جانە مالايزيا سياقتى مەملەكەتتەردىڭ ينۆەستورلارى ينۆەستيتسيالىق جوبالاردى ىسكە اسىرىپ كەلەدى. تارتىلعان ينۆەستيتسيالار دا سان الۋان. ايتالىق, ەت ەكسپورتىن جۇزەگە اسىرۋدا ءباا ينۆەستورلارى جارقىن جوبالاردى قولعا الدى. سول سياقتى فرانتسيا ينۆەستورلارى دا وڭىردە قۇرىلىسقا قولدانىلاتىن تسەمەنت وندىرۋدە بەلسەندىلىك تانىتىپ وتىر. ال ۇلىبريتانيا ينۆەستورلارى جۇزەگە اسىرعان كۇن كوزىنەن قۋات الاتىن «بۋرنوە سولار» ەلەكتر ستانساسى جاسىل ەكونوميكانىڭ سەرپىندىلىگىن ارتتىرۋدا.
«2015-2016 جىلدارى جانە 2017 جىلدىڭ ون ايىندا جالپى قۇنى 35,2 ميلليارد تەڭگەنى قۇرايتىن 19 جوبا ىسكە اسىرىلىپ, 1170 تۇراقتى جۇمىس ورنى اشىلدى. اعىمداعى جىلدىڭ اياعىنا دەيىن قۇنى 4,7 ميلليارد تەڭگە بولاتىن تاعى 4 جوبانىڭ ىسكە اسىرىلۋى كوزدەلۋدە», دەيدى وبلىس اكىمىنىڭ ورىنباسارى تيمۋر جانكە.
بۇل كۇندە اۋليەاتا ءوڭىرى ينۆەستيتسيالىق ايماققا اينالىپ ۇلگەردى دەۋگە بولادى. ماسەلەن, قازىر جالپى قۇنى 6 ميلليارد اقش دوللارىنا جەتەتىن 32 ينۆەستيتسيالىق جوبا قاراستىرىلۋدا. سول سياقتى قىتايلىق كومپانيالاردىڭ قاتىسۋىمەن جالپى قۇنى 1,9 ميلليارد اقش دوللارىن قۇرايتىن 9 ينۆەستيتسيالىق جوبا قولعا الىنعان. ەلباسىنىڭ تاپسىرماسى بويىنشا وبلىستا جالپى قۇنى 2,2 ميلليارد اقش دوللارىن قۇرايتىن 4 ترانسۇلتتىق كومپانيانىڭ 4 ينۆەستيتسيالىق جوباسى جۇزەگە اسىرىلماق.
حاميت ەسامان,
«ەگەمەن قازاقستان»
جامبىل وبلىسى
