نۇرسۇلتان نازارباەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي شەت مەملەكەتتەردىڭ باسشىلارىنان قۇتتىقتاۋ جەدەلحاتتارى كەلىپ ءتۇستى.
يران يسلام رەسپۋبليكاسىنىڭ پرەزيدەنتى حاسان رۋحاني ءوزىنىڭ حاتىندا: «سوڭعى جىلدارى ورتاق ماقسات پەن مۇددەنىڭ ارقاسىندا ءبىزدىڭ ەكىجاقتى قارىم-قاتىناسىمىز جەمىستى دامىپ كەلە جاتىر. قازاقستان رەسپۋبليكاسى مەن يران يسلام رەسپۋبليكاسى وڭىردەگى ىنتىماقتاستىق پەن قاۋىپسىزدىكتى نىعايتۋ ىسىندە سەنىمدى سەرىكتەس بولىپ سانالادى», – دەپ اتاپ كورسەتكەن.
ماروككو كورولى VI مۇحاممەد جەدەلحاتىندا ءوزارا قۇرمەت پەن دوستىققا نەگىزدەلگەن ەكى ەل اراسىنداعى قارىم-قاتىناستارعا جوعارى باعا بەرىپ, ونىڭ ءارى قاراي تابىستى دامي تۇسەتىنىنە سەنىم ءبىلدىردى.
اۋستراليانىڭ گەنەرال-گۋبەرناتورى پيتەر كوسگروۋۆ ءوزىنىڭ جەدەلحاتىندا: «ەكسپو-2017 كورمەسىنىڭ استانا قالاسىندا تابىستى وتۋىمەن قۇتتىقتايمىن. بۇل شارا ۇكىمەتتەرىمىزدىڭ وكىلدەرى مەن ءبىلىم سالاسىنداعى ماماندارىمىزدىڭ كەزدەسۋلەر وتكىزۋىنە مۇمكىندىك بەردى», – دەپ اتاپ وتكەن.
مەملەكەت باسشىسىنا جانە قازاقستان حالقىنا ءوزىنىڭ قۇتتىقتاۋلارىن شۆەتسيا كورولى كارل XVI گۋستاۆ پەن برۋنەي سۇلتانى حادجي حاسسانال بولكياح جولداپ, باق-بەرەكە تىلەدى, سونداي-اق ەلىمىزدىڭ ءوسىپ-وركەندەۋىنە نيەتتەستىك ءبىلدىردى.
