وبلىس اكىمىنىڭ ءباسپاسوز قىزمەتىنىڭ حابارلاۋىنشا, قۇقىق قورعاۋ قىزمەتتەرىنىڭ ورتالىعىنىڭ اشىلۋىنا باس پروكۋراتۋرا باستاماشىلىق تانىتىپ, «100 ناقتى قادام» ۇلت جوسپارىن ورىنداۋ ماقساتىندا ىسكە اسىپ وتىر. ورتالىقتىڭ باستى ەرەكشەلىگى - زاڭ قىزمەتتەرىن ءبىر جەردە شوعىرلاندىرۋ بولىپ تابىلادى. ادۆوكاتتار, سوت ورىنداۋشىلار, مەدياتورلار, ادىلەت دەپارتامەنتىنىڭ, قۇقىقتىق ستاتيستيكا باسقارماسىنىڭ, حالىققا قىزمەت كورسەتۋ ورتالىعىنىڭ وكىلدەرى, پروباتسيا قىزمەتكەرلەرى تەگىن كاسىبي زاڭ كومەگىن كورسەتىپ, كونسۋلتاتسيا جاسايدى.
ايماق باسشىسى كەزدەسۋگە قاتىسۋشىلاردى ورتالىقتىڭ اشىلۋىمەن قۇتتىقتاپ, ورتالىقتىڭ ماڭىزدىلىعىن اتاپ ءوتتى.
- بۇل ورتالىق حالىق ءۇشىن وتە پايدالى بولادى, اكىمشىلىك كەدەرگىلەردى جويادى, مەملەكەت پەن قۇقىق قورعاۋ ورگاندارىنىڭ ءيميدجىن كوتەرەدى. ورتالىقتىڭ جۇمىسى حالىقتىڭ كوڭىلىنەن شىعىپ, بولاشاقتا وبلىستىڭ ەڭ ۇلكەن قالالارى مەن اۋداندارىندا اشۋدى جوسپارلاۋ كەرەك دەپ ويلايمىن, - دەدى دانيال احمەتوۆ
اشىلعان ورتالىق - ەلەكتروندى كەزەك جۇيەسى, كۇتۋ زالى جانە باسقا قاجەتتى ينفراقۇرىلىممەن جابدىقتالعان. مۇمكىندىگى شەكتەۋلى ازاماتتار دا نازاردان تىس قالماعان. بۇل جەردە پاندۋستار, تاكتيلدى كورسەتكىش, جازبالار, مۇگەدەكتەرگە كومەك كورسەتە الاتىن مامانداردى شاقىرۋ ءۇشىن ارنايى تەتىكتەر ورناتىلعان. سونىمەن قاتار, كەز كەلگەن ازامات قۇزىرەتتى ورگانعا, ونىڭ ىشىندە ورتالىق دەڭگەيدەگى ورگاندارعا بەينەوتىنىش بەرە الادى. ورتالىق قالا پروكۋراتۋراسىنىڭ عيماراتىندا ورنالاسقان.
ازامات قاسىم,
«ەگەمەن قازاقستان»
وسكەمەن
